طالبانو د ملګرو ملتونو له امنیت شورا وغوښتل چې د پاکستان د بریدونو مخه ونیسي

هغهد پاکستان وروستیو بریدونو ته په اشارې، چې د افغانستان په یو شمېر ولایتونو کې شوي، همداراز په پاکستان کې د افغان کډوالو ایستل او ځورول او د ملکي وګړو تلفات یاد کړي او ویلي یې دي چې امنیت شورا باید د دې وضعیت د درولو لپاره خپله مسوولیت ادا کړي.

هغه د شنبې په ورځ د پاکستان اقدامات «غیرانساني» وبلل او ویې ویل چې د دغو بریدونو له امله ګڼ شمېر ملکي وګړي وژل شوي او بې‌کوره شوي دي.

د طالبانو ویاند همداراز وویل چې افغان کډوال په پاکستان کې له سختو شرایطو سره مخ دي.

مجاهد له امنیت شورا وغوښتل چې پر پاکستان فشار راولي څو له «داسې غیرانساني کړنو او د بشري حقونو له سرغړونو» لاس واخلي.

ذبیح‌الله مجاهد تر دې وړاندې هم څو ځله ویلي چې د ملګرو ملتونو امنیت شورا خپل اصلي ماهیت له لاسه ورکړی او د هغه په وینا د «لویدیځو هېوادونو په لاس کې په یوه وسیله» بدله شوې ده.

دا په داسې حال کې ده چې د ملګرو ملتونو د امنیت شورا څو ځله په افغانستان کې د ترهګرو ډلو د فعالیت او حضور په اړه اندېښنه څرګنده کړې ده.