د پاکستان د وګړو د ثبت ملي ادارې (نادرا) اعلان کړی، هغه کسان چې پخوا یې اېسيسي یا پي او ار کارت ترلاسه کړی؛ خو ځانونه د پاکستان قانوني وګړي ګڼي، کولای شي د خپل پاکستاني تابعیت د ثابتولو لپاره رسمي غوښتنلیک وړاندې کړي.
نادرا وایي، که د چا ملي پېژندپاڼه د افغان کارت لرلو له امله ځنډول شوې یا لغوه شوې وي او هغه د خپل پاکستاني تابعیت د ثابتولو لپاره کره او د باور وړ اسناد ولري؛ نو کولای شي د خپلې دوسیې د بیاکتنې غوښتنه وکړي.
د یادې ادارې په وینا؛ د پاکستان د تابعیت قانون له مخې د نادرا مشر ته واک ورکړل شوی، چې دغه ډول غوښتنې وڅېړي او د شته اسنادو او شواهدو پر بنسټ پرې پرېکړه وکړي.
غوښتونکي باید د تابعیت اړوند ټول اسناد وړاندې کړي. په دغه اسنادو کې تر ۱۹۷۹کال وړاندې د ځمکو رسمي ثبوتونه، پخواني مېشتېدو سندونه، زاړه پاکستاني پاسپورټونه، پخوانۍ ملي پېژندپاڼې، د ۱۹۹۰کال دمخه د دولتي دندې اسناد، د کورنۍ تصدیق شوې شجره او نور رسمي اسناد شاملېدای شي.
د نادرا د کړنلارې له مخې؛ غوښتونکی به لومړی له خپلو اصلي اسنادو سره ټاکلي مرکز ته ورځي، هلته به یې د ګوتو نښې او نور اړین معلومات ثبتېږي. وروسته به د تصدیق ځانګړې جرګه د هغه څرګندونې واوري او اسناد به یې وڅېړي. همداراز به اړونده دولتي ادارې د وړاندې شویو اسنادو او معلوماتو د کرهوالي معلومولو لپاره خپل تایید وړاندې کړي.
که د ارزونې او پلټنو له بشپړېدو وروسته د غوښتونکي پاکستاني تابعیت ثابت شي؛ نو افغان کارت به یې لغوه او ملي پېژندپاڼه به یې بېرته فعاله یا نوې صادره شي. نادرا ټینګار کړی، چې د افغان کارت لغوه کېدل یا د ملي پېژندپاڼې بېرته ترلاسه کول څوک د پاکستان د تابعیت قانون د وګړو د ثبت مقرراتو او یا د نادرا د قانون له مخې له قانوني مسوولیتونو نه معاف کوي.
یادې ادارې خبرداری ورکړی، که څوک جعلي اسناد وړاندې کړي، مهم حقایق پټ کړي او یا په قصدي ډول ناسم معلومات ورکړي؛ نو د قانون له مخې به ورسره چلند وشي او ترلاسه شوي اسناد او امتیازات هم لغوه کېدای شي.
نادرا زیاته کړې، که د کوم غوښتونکي غوښتنلیک رد شي، هغه حق لري چې د قانون له مخې د بیا کتنې لپاره اړوندې مرجع یا محکمې ته مراجعه وکړي.
