د طالبانو د اطلاعاتو او کلتور وزیر شیر احمد حقاني په کابل کې له رسنیزو مسوولانو سره په یوه غونډه کې په بدخشان کې د دې ډلې او مخالفانو ترمنځ د وروستیو نښتو په اړه خپل تحلیل شریک کړ.
د طالبانو د اطلاعاتو او کلتور وزیر شیراحمد حقاني د دوشنبې په ورځ په کابل کې یوې غونډې ته د وینا پر مهال په بدخشان کې د طالبانو د مخالفو ډلو بریدونه تحلیل کړل. حقاني رسنیو او هغو شنونکو ته، چې طالبانو ته نږدې بلل کېږي، سپارښتنه وکړه چې د مخالفو ډلو بریدونه له پنځو اړخونو وڅېړي. د هغه په وینا، د هرې جګړې په ارزونه کې پنځه عناصر مهم دي: بریدګر او د هغوی تمویلوونکي څوک دي، څوک هغوی ته پناه ورکوي، د بریدګرو موخې څه دي او د جګړې په جغرافیه کې تر کومې کچې د خلکو ملاتړ ورسره دی. دغه طالب چارواکي ادعا وکړه چې د دغو پنځو عناصرو په تحلیل سره څرګندېږي چې «په حقیقت کې هېڅ د پام وړ څه نه دي پېښ شوي.»
شیراحمد حقاني ادعا وکړه چې د طالبانو اداره کولای شي خلکو، «حتی مخالفانو او بهرنیانو» ته ثابته کړي چې د افغانستان وضعیت تر پخوا ښه شوی او «خلک خوښ او راضي دي.»
شیراحمد حقاني د دوشنبې په ورځ، د زمري په پنځمه، په بدخشان کې د مخالفانو د بریدونو په غبرګون کې د طالبانو تر واک لاندې د افغانستان وضعیت «ښه او بېساری» وباله. هغه ادعا وکړه چې خلک د طالبانو له ادارې سره همکاري کوي. هغه په ورته وخت کې د طالبانو مخالفې ډلې په تندو الفاظو یادې کړې او هغوی یې «قاتلان، قطاعالطریق او ظالمان» وبلل. حقاني وویل چې دغه ډلې د خلکو ترمنځ هېڅ ځای او ملاتړ نه لري.
دا په داسې حال کې ده چې په وروستیو اوونیو کې د طالبانو مخالفو جبهو د افغانستان په شمال ختیځ کې په ځانګړي ډول په بدخشان ولایت کې، زیات کړي دي. وروسته له هغه چې د سپاه میهن جبهې د څو ساعتونو لپاره د یفتل ولسوالۍ کنټرول په خپل لاس کې واخیست، د ازادۍ جبهې د بدخشان په زیباک ولسوالۍ کې له طالبانو سره نښته وکړه او ادعا یې وکړه چې د طالبانو دوه بېپیلوټه الوتکې یې نسکورې کړې دي.ل ه بلې خوا، د مقاومت جبهې هم ادعا کړې چې د بدخشان د کران او منجان ولسوالۍ کې یې د طالبانو یو غړی وژلی دی.
