طالبان وايي، چې په تېرو ۲۴ ساعتونو کې د پکتیکا، پکتیا او خوست پر ولایتونو د پاکستان په هوايي بریدونو کې ۴ ملکیان وژل شوي او ۳ نور ټپیان دي. دوی زیاتوی، چې پاکستان د کونړ په ناړۍ ولسوالۍ ۶۰ ثقيله مرمۍ توغولي او د دوکلام مرکزي کلي دويالي بند يې ويجاړ کړی.
د طالبانو د ویاند مرستیال حمدالله فطرت نن شنبه، د کب میاشت پر ۱۶مه په اېکس کې لیکلي، چې د جمعې شپه او ورځ(۲۴ساعتونو کې) د پکتيا په څمکنيو او ډنډ پټان ولسواليو کې د پاکستان پوځ له لوري د عامو خلکو کورونه او د دواړو ولسواليو بازارونه هدف ګرځیدلي چې خلکو ته پکې درانه مالي او ځاني زيانونه اوښتي، ۱ تن (چمن ولد باجوړ) وژل شوی او بل تن (باغچه ګل ولد علي محمد) زخمي شوی، ۱۰ کورونه، ۱۴ دوکانونه، ۲ مارکيټونه يو مسجد پکې تخريب شوي.فطرت زیاتوي، چې د پکتيکا په برمل او شکين ولسواليو کې هم د پاکستان پوځ له لوري کلي او بازارونه هدف ګرځول شوي، چې په شکين بازار کې ۲ تنه ملکيان وژل شوي دي، دواړو ولسواليو کې ۶ کورونه او څو دوکانونه تخريب شوي.
دوی زیاتوی، چې د خوست عليشيرو او تريزيو ولسواليو کې د پاکستان پوځ په بمباريو کې يو ملکي کس وژل شوی او دوه ملکي ځوانان ټپيان شوي، ۱۰ کورونه زيانمن شوي ۱ جومات ویجاړ شوی او تر ۱۰۰ زياتې کورنۍ بيځايه شوي.
دغه راز په ځاځي ميدان ولسوالۍ کې هم د يو هيوادوال کور په نښه شوی چی له نيکه مرغه ځاني زيان نلري خو کور يې تخريب شوی او مالي زيان وراوښتی.
د ملګرو ملتونو د راپور پر بنسټ پر افغانستان د پاکستان هوايي بریدونو کې ۵۶ ملکیان وژل شوي دي او ۱۲۹ ملکیان ټپیان شوي دي.
