ټرمپ: له ایران سره جګړه به په راتلونکو څو ورځو کې نه، خو ډېر ژر پای ته ورسېږي
د امریکا ولسمشر ډونالډ ټرمپ د جمهوري غوښتونکو ګوند د استازو د کلنۍ غونډې په څنډه کې د خپلو هغو پخوانیو څرګندونو په اړه د یوې پوښتنې په ځواب کې چې له ایران سره جګړه «یو لنډ ماموریت» دی، وویل چې دا نښته به «ډېر ژر» پای ته ورسېږي.
کله چې یوه خبریال ترې وپوښتل، ایا فکر کوي چې دا جګړه به همدې اوونۍ یا په راتلونکو څو ورځو کې پای ته ورسېږي؟ ټرمپ ځواب ورکړ: «دومره ژر نه، خو ډېر ژر. ډېر ژر».
لږ شېبې وروسته هغه د بل خبریال د پوښتنې په ځواب کې چې د امریکا د دفاع وزیر د دې څرګندونو په اړه یې وپوښتل: «دا پوځي عملیات تازه پیل شوي دي»، وویل: «دواړه خبرې سمې کېدای شي».
ټرمپ زیاته کړه: «فکر کوم ویلای شو چې دواړه سم دي. دا د یوه نوي هېواد د جوړولو پیل دی».
هغه په دوام کې د تېرو نهو ورځو بریدونه داسې توصیف کړل: «موږ همدا اوس دا یو ستر بری ګڼلی شو او له دې ځایه تللی شو. زه کولی شم همدا اوس دا پای ته رسېدلی اعلان کړم، یا کولی شو مخکې ولاړ شو او موږ به مخکې هم ولاړ شو. خو په دې جګړه کې اصلي خطر درې ورځې وړاندې پای ته ورسېد. موږ رژیم په هماغه لومړیو دوو ورځو کې په بشپړه توګه له کاره وغورځاوه».
