د افغانستان انټرنشنل ـ پښتو خبریال
د خیبر پښتونخوا ایالت د خیبر ولسوالۍ په لنډي کوتل کې د پاکستان او طالبانو ترمنځ د روان کړکېچ د پای ته رسولو لپاره سولهییز لاریون شوی. لاریون والو «موږ په دواړو هېوادونو کې امن غواړو، جنګ بربادي ده او امن خوشحالي ده» شعارونه ورکول.
لاریون کوونکو د سې شنبې په ورځ له خبریالانو سره په خبرو کې وویل، چې د پاکستان او طالبانو ترمنځ روان کړکېچ تر ټولو زیات د د کرښې په دواړو غاړو کې پر پرتو خلکو اغېز کړی دی.
هغوی زیاته کړې چې جګړه د هېڅ ستونزې حل نه دی بلکې له دې سره به په سیمه کې بېثباتي او ستونزې نورې هم زیاتې شي.
لاریون والو د پاکستان له حکومت او طالب چارواکو وغوښتل چې روانه لانجه ژر تر ژره د خبرو اترو او ډیپلوماټیکو لارو حل کړي.
دوی ټینګار وکړ چې په سیمه کې د تلپاتې سولې د ټینګښت لپاره به خپل غږ پورته کوي.
په لاریون کې د مدني ټولنې او سیاسي ګوندونو استازو تر څنګ د سیمې مشرانو او ګڼ شمېر سوداګرو ګډون کړی و.
لاریون د لنډي کوتل بازار له باچا خان چوک څخه پیل شو او ددغه بازار تر پریس کلب پورې وغځېد.
د طالبانو او پاکستان ترمنځ په اته ورځنۍ جګړې کې د کرښې په دواړو غاړو کې ګڼ خلک له خپلو سیمو نه بې ځایه شول او یو شمېر ووژل شول او ټپیان شول.
د یوناما د یوه رپوټ له مخې، په افغانستان کې ددې جګړې له امله لسګونه ملکي کسان وژل شوي او په لسګونو زره نور له خپلو سیمو نه بې ځایه شوي دي.
دغه راز د خیبر ولسوالۍ په سلګونو کورنۍ د جګړې له ویرې له خپلو سیمو بې ځایه شوې دي.
د دواړو خواوو ترمنځ له تېرو دوو ورځو راهیسې پر ډیورنډ کرښه جګړې او هوايي بریدونه درېدلي، خو لاهم په رسمي ډول اوربند نه دی اعلان شوی.
