د طالبانو او پاکستان استازو د تورخم لارې د پرانېستلو په اړه ګډه مشورتي ناسته کړې
د افغانستان انټرنشنل ـ پښتو خبریال
پر ډیورنډ کرښه د تورخم دروازې په صفري نقطه کې د طالبانو او د پاکستان سرحدي چارواکو ترمنځ د همغږۍ ناسته شوې ده. په یاده ناسته کې د تورخم د احتمالي پرانیستلو، امنیتي وضعیت او د دواړو لوریو تر منځ د همکارۍ پر بېلابېلو اړخونو خبرې شوې دي.
سرچینو افغانستان انټرنشنل ته ویلي، چې په دې غونډه کې پاکستاني چارواکو ټینګار کړی چې له شین کنډو څخه تر داوود پوستې پورې د امنیت بشپړ مسوولیت طالبان پرغاړه واخلي.
دغه راز د وضعیت تر ښه کېدو پورې دلته د اوسنیو سرحدي ودانیو تړل کېدو باندې ټینګار شوی دی.
د سرچینو په وینا، دواړو لوریو هوکړه وکړه چې صفري نقطې ته په نږدې سیمو کې به د وسلو له نندارې او لیږد رالېږد څخه ډډه کوي.
په ناسته کې د پلي تګ راتګ لپاره پر لنډمهاله لارې د تګ اجازې ورکولو وړاندیز هم شوی او د لارې ساعتونه د سهار له ۸بجو څخه تر ماښام ۸بجو پورې تایید شوي دي.
د یادولو وړ ده، چې د ډیورنډ پر کرښه د تورخم دروازه د پاکستان او طالبانو د نښتو له امله نږدې یوه میاشت تړل شوې وه، چې تېره ورځ یو ځل بیا د افغان کډوالو د ستنولو لپاره پرانیستل شوه، خو د ورځې په پای کې بېرته وتړل شوه.
