د چین د بهرنیو چارو وزارت وايي، چې د اپرېل له لومړۍ څخه تر اوومې پورې په ارومچي کې د پاکستان او طالبانو د استازو ترمنځ غیر رسمي خبرې وشوې. چین وايي، دواړو اړخونو هوکړه کړې، چې داسې ګامونه به نه اخلي، چې وضعیت ترینګلی کړي.
د چین د بهرنیو چارو وزارت ویاند لین جیان د چارشنبې په ورځ وویل، چې د چین، افغانستان او پاکستان استازو د اپرېل له لومړۍ تر ۷مې پورې د سنکیانګ ایالت په ارومچي ښار کې یوه اوونۍ غیررسمي خبرې کړې دي.
د ویاند په وینا، په دغو خبرو کې د درې واړو هېوادونو د بهرنیو چارو، دفاع او امنیتي ادارو استازو ګډون درلود، چې تمرکز یې د ستونزو پر حل او د اړیکو پر ښه کېدو و.
هغه زیاته کړې چې د طالبانو او پاکستان استازو یو ځل بیا ټینګار وکړ چې د ملګرو ملتونو د منشور له اصولو او د سولهییز ګډ ژوند له اصولو سره سم به خپل اختلافات د خبرو له لارې حل کړي.
چین وايي، دواړو لوریو ژمنه وکړه چې له پاروونکو او وضعیت ترینګلي کوونکو اقداماتو به ډډه کوي.
د چین د بهرنیو چارو وزارت ویاند ویلي، چې د ارومچي بهیر یو عملي او مهم ګام دی او درې واړه هېوادونه به خپلې اړیکې او خبرې اترې دوامدارې ساتي، څو سیمهییز ثبات پیاوړی شي.
