د بخښنې نړېوال سازمان د جنوبي اسیا سیمهییز دفتر وایي، په نړۍ کې د افغان کډوالو د جبري ایستنې لړۍ په چټکۍ سره روانه ده او ورځ تر بلې یې شمېر زیاتېږي. دغه سازمان زیاتوي چې دا له نړیوالو قوانینو سرغړونه ده او باید ودرول شي.
د بښنې نړیوال سازمان وايي چې په کوربه هېوادونو کې افغان کډوال له بېدليله نیونو او د کورنیو له جلا کېدو سره مخ دي او بېرته افغانستان ته په ستنېدو سره د نړۍ له سختو بشري او انساني حقونو له کړکېچ سره مخامخ کېږي.
بخښنې نړیوال سازمان د “انسانیت وښایئ” تر عنوان لاندې په خپل راپور کې ویلي چې میلیونونه افغان کډوال له ایران او پاکستان څخه په ناقانونه ډول ایستل شوي دي او دا لړۍ لا هم روانه ده.
په راپور کې ویل شوي چې له ۲۰۲۳ کال راهیسې تر ۵ میلیونو ډېر افغانان بېرته هېواد ته ستانه شوي او دا شمېر ورځ تر بلې لوړېږي.
دغه اداره زیاتوي چې اروپایي هېوادونه هم د افغان کډوالو د ایستلو په اړه له طالب لوري سره بحثونه کوي.
ایمنسټي ټینګار کوي چې د کډوالو جبري ستنول د نړیوال قانون له «بېرته ستنولو ته نه» اصل سرغړونه ده، چې له مخې یې هېڅ څوک هغه هېواد ته نه شي استول کېدای چېرته چې د شکنجې، ځورونې یا جدي خطر سره مخ وي.
په راپور کې راغلي چې افغان کډوال له بېدلیله نیونو، د کورنیو له جلا کېدو، د ښځو او ماشومانو جبري ایستلو، د پولیسو له چاپو او له مناسبې ارزونې پرته له اخراج سره مخ دي.
د ملګرو ملتونو د معلوماتو له مخې، شاوخوا ۲۱ میلیونه افغانان لا هم بشري مرستو ته اړتیا لري.
