د افغانستان لپاره د ملګرو ملتونو د دایمي استازولۍ سرپرست، نصیر احمد فایق، د ملګرو ملتونو د منشور د تصویب د ۸۰مې کلیزې په مناسبت ویلي چې میلیونونه افغانان لا هم له هغو بنسټیزو حقونو څخه محروم دي چې دغه منشور یې د ساتنې لپاره رامنځته شوي و.
فایق د جمعې په ورځ پر اېکس پاڼه لیکلي، ۸۰ کاله وړاندې نړۍ د «زموږ خلک» تر شعار لاندې د ملګرو ملتونو منشور تصویب کړ، خو نن ورځ افغانان لا هم د همدې منشور له اساسي ژمنو بېبرخې دي.
هغه زیاته کړې، چې په افغانستان کې نجونې له زدهکړو منع دي، ښځې له عامه ژوند څخه ایستل شوي، ځوانان د خپل راتلونکي له هیلو او فرصتونو بېبرخې شوي او د طالبانو تر واکمنۍ لاندې یو ملت چوپ کړای شوی دی.
د نوموړي په وینا، په افغانستان کې بنسټیز بشري حقونه په سیستماتیک ډول تر پښو لاندې کېږي او د هېواد خلک لا هم د بشري حقونو، کرامت او عدالت د هغو ژمنو د عملي کېدو په تمه دي چې د ملګرو ملتونو په منشور کې راغلې دي.
فایق ټینګار کړی، د ملګرو ملتونو د منشور اعتبار هغه وخت ساتل کېدای شي چې دا سازمان له هغو خلکو دفاع وکړي چې د ساتنې لپاره یې منشور رامنځته شوی دی.
هغه د ملګرو ملتونو د منشور د ورځې په مناسبت ویلي، یوازې څرګندونې او خبرې بسنه نه کوي، بلکې د افغانستان د خلکو د حقونو د خوندي کولو لپاره د عملي اقداماتو وخت رارسېدلی دی.
