د طالبانو د سرحدونو، قومونو او قبایلو چارو وزیر نورالله نوري په کابل کې د شیعه علماوو یوې غونډې ته د وینا پرمهال ویلي، چې د افغانستان امنیت او د هېواد له خاورې ساتنه د طالبانو له لومړیتوبونو دي. نوموړي ویلي، هیچا ته به اجازه ورنه کړل شي چې د افغانستان امنیت ګډوډ کړي.
نوري ویلي، هر هغه «یرغلګر» چې افغانستان ته په بد نیت راغلی؛ له ماتې سره مخ شوی او دغه موضوع باید د ټولو لپاره د عبرت او درس په توګه وکتل شي. د طالبانو د سرحدونو او قبایلو چارو وزیر له خلکو غوښتي، چې ملي یووالی وساتي او د دوی ملاتړ وکړي. د نوموړي په وینا؛ خلک دې د دوی ملاتړ وکړي او دوی به د خلکو ساتنه وکړي.
د افغانستان پر درېیو ولایتونو د پاکستان بریدونه په کور دننه او بهر له پراخو غبرګونونه سره مخ شوي. د طالبانو په وینا؛ د افغانستان په درېیو ولایتونو کې په دغه هوایي بریدونو کې لږترلږه ۳۶ ملکي وګړي وژل شوي او ۱۶۳ نور ټپیان دي.
خو د پاکستان پوځ ادعا کړې، چې په دغه عملیاتو کې یې د وسلهوالو پټنځایونه په نښه کړي دي. د یوناما د شمېرو له مخې؛ د وژل شویو کسانو شمېر ۲۸ او د ټپیانو شمېر ۴۹ ته رسېدلی دی.
