د طالبانو د بهرنیو چارو وزارت ویاند عبدالقهار بلخي د بنګلهدېش په سویل ختیځو سیمو او پلازمېنه ډاکه کې د ورښتونو او ویجاړوونکو سېلابونو له امله د اوښتې مرګژوبلې په تړاو د بنګلهدېش له حکومت، ولس او قربانیانو کورنیو سره خپله خواخوږي څرګنده کړې ده.
عبدالقهار بلخي د یکشنبې په ورځ (د چنګاښ ۲۱مه) په خپله اېکسپاڼه همداراز ټپيانو ته د عاجلې او بشپړې روغتیا او د بېځایه شویو کورنیو لپاره د ژر عادي ژوند د بېرته تامین هیله څرګنده کړې ده.
په بنګلهدېش کې پرون د موسمي بارانونو، سختو سېلابونو او ځمکې ښوېیدنې له امله ۴۴ کسان مړه شوي او له یو میلیون څخه زیات نور په خپلو سیمو کې بند پاتې شوي وو.
د بنګلهدېش د طبیعي پېښو پر وړاندې د مبارزې وزارت د شنبې په ورځ (د چنګاښ ۲۰مه) اعلان وکړ، چې د دغه هېواد په اوو سویل ختیځو ولسوالیو، چاټوګرام، کوکس بازار، بندربان، رانګامتي، خاګراچاري، مولويبازار او هابيجنګ کې سېلابونو د خلکو عادي ژوند ګډوډ کړی او شاوخوا ۲۶۷ زره او ۹۱۸ کورنۍ یې په خپلو کورونو کې ایسارې کړې دي.
د بنګلهدېش پوځ او سمندري ځواکونو د کښتیو په وسیله اغېزمنو شویو سیمو ته خواړه، څښاک اوبه، درمل او نور اړین توکي لېږدوي.
