نصیراحمد فایق: د طالبانو عادي کېدل باید د بشري حقونو له پرمختګ پرته ونه منل شي
په ملګرو ملتونو کې د افغانستان د دایمي استازولۍ سرپرست نصیر احمد فایق ویلي، د طالبانو په اړه د ملګرو ملتونو هر ډول تعامل باید د امنیت شورا له پرېکړو سره سم، پر اصولو او شرطونو ولاړ وي او د طالبانو د اوسني حکومت د عادي کېدو لامل نهشي.
نوموړي د یوې اعلامیې په خپرولو سره ویلي، چېد سرمنشي د ځانګړې استازې او د راتلونکي ځانګړي استازي رولونه باید یو بل بشپړ او پیاوړي کړي؛ څو د افغانستان په اړه د ملګرو ملتونو د همغږې تګلارې د پیاوړتیا لپاره ګډ کار وکړي.
اعلامیه زیاتوي، چې د ملګرو ملتونو هڅې باید د افغان ښځو، مدني ټولنې، دیموکراتیکو ځواکونو او نورو باوري افغان استازو ترمنځ د معناداره اړیکو او خبرو اترو د رامنځته کولو ملاتړ وکړي.
د اعلامیې له مخې؛ د افغانستان لپاره هر سیاسي بهیر باید د یوه سولهییز، استازولیز، ټولګډونه، مشروع او حساب ورکوونکي نظام د جوړېدو لامل شي؛ څو د افغانانو اراده او د هېواد ټولنیزه تنوع پهکې منعکس شي.
په اعلامیه کې ټینګار شوی، چې د طالبانو له حکومت سره هر ډول نړۍوال تعامل باید د ښځو او نجونو د حقونو، ټولګډونه حکومتولۍ او نړۍوالو ژمنو په برخه کې له «معناداره او نه بدلېدونکو پرمختګونو» سره وتړل شي.
هغه ویلي، د افغانستان په اړه د ملګرو ملتونو د مرستندویه ماموریت «یوناما» د ستراتیژیکې ارزونې پایلې به د یادې ادارې د سولې، ثبات، بشري حقونو، بشري مرستو، سیمهییزې همکارۍ او د افغانانو په مشرۍ د سیاسي بهیر د ملاتړ وړتیا نوره هم پیاوړې کړي.
اعلامیه زیاتوي، چې د افغانستان لپاره د ملګرو ملتونو له پیاوړي، اغېزمن او بېپرې حضور څخه ملاتړ څرګندوي او وايي، د ملګرو ملتونو، غړو هېوادونو، سیمهییزو شریکانو او نورو اړخونو سره به د داسې افغانستان لپاره همکارۍ ته دوام ورکړي چې سولهییز، باثباته، سوکاله، استازولیز، ټولشموله، مشروع او حساب ورکوونکی وي او د خلکو اراده، بشري حقونه او بنسټیزې ازادۍ پهکې خوندي وي.
