د خیبر پښتونخوا د لنډي کوتل سوداګر وايي، د تورخم دروازې اوږدمهاله تړل کېدو او له افغانستان سره د سوداګرۍ په ټپه درېدو د دوی کاروبار سخت زیانمن کړی او بازار د تېرو څو میاشتو تر ټولو بد اقتصادي حالت تجربه کوي.
د لنډي کوتل تاریخي بازار چې په سیمه کې د «سرای» په نوم یادېږي، پخوا د افغانستان او پاکستان ترمنځ د سوداګرۍ یو مهم مرکز و؛ خو سوداګر وايي چې د تورخم تړل پاتې کېدو او د تګراتګ محدودیتونو د دوی د عاید ډېره برخه لهمنځه وړې ده.
ټوکر پلورونکی یارمحمد شاه ویلي، د تورخم پرانیستی تګراتګ د دوی د کاروبار ملا وه او افغان پېرودونکي به د مصرفي توکو د اخیستو لپاره لنډي کوتل ته راتلل؛ خو اوس د ویزو محدودیتونو او د لارو تړل کېدو د سوداګرۍ کچه په بېساري ډول راټیټه کړې ده.
د خوراکي توکو عمده پلورونکي حاجي شراب ګل ویلي، د تورخم له تړل کېدو وروسته یې پلور نږدې نیمايي ته راکم شوی دی. د هغه په وینا؛ افغان پېرودونکي نور پاکستان ته نهشي راتلای او د سیمې خلک هم د عاید له کمېدو سره د پخوا په څېر د پېرلو توان نهلري.
هغه زیاته کړې، پخوا به یې وریجې او نور خوراکي توکي پر افغان سوداګرو پلورل چې وروسته به یې تاجکستان، ازبکستان او اوکراین ته لېږدول؛ خو اوس دغه سوداګري په بشپړه توګه درېدلې ده.
د عمومي توکو پلورونکي بلال خان هم ویلي، د پېرودونکو شمېر یې ډېر کم شوی او یوازې د سیمې خلک د ورځني اړتیا وړ ارزانه توکي اخلي. هغه زیاتوي، په تورخم کې یوشمېر هټۍوال چې له ده څخه یې په پور مال اخیستی و، د بازارونو د تړل کېدو له امله اوس د پورونو د ورکړې توان نهلري.
بلخوا د لنډي کوتل د مشهورو رستورانونو خاوندان حاجي اختر او حاجي دادین وايي، د پېرودونکو د کمېدو له امله د خپلو ورځنیو لګښتونو پوره کول ورته ستونزمن شوي دي. د حاجي اختر په وینا؛ پخوا به یې هره ورځ لس تر دولسو پورې پسونه حلالول؛ خو اوس د دوو یا درېیو پسونو غوښه هم په سختۍ پلورل کېږي، ځکه له افغانستان نه د څارویو پر وارداتو بندیز د غوښې بیې لوړې کړې او خلک ارزانه خوړو ته مخه کوي.
