د جمهوري نظام پر مهال د کانونو او پټرولیم وزارت پخوانۍ وزیرې نرګس نهان د افغانستان لپاره د ملګرو ملتونو د ځانګړې استازې په توګه د رباب فاطمې له ټاکل کېدو هرکلی کړی او غوښتنه یې کړې چې نوموړې باید د افغان ښځو حقونو، عدالت او ټولګډونه سولې ته لومړیتوب ورکړي.
نرګس نهان د جمعې په ورځ (د چنګاښ ۲۶مه) په خپله اېکسپاڼه په یوې لیکنه کې ټینګار کړی، چې رباب فاطمه باید په هېواد دننه او بهر کې له افغانانو سره په تعامل کې ښکېله شي. هغې وویل، د یوې ښځې په توګه له نوې استازې هیله لري، چې د خپلو حقونو لپاره د افغان ښځو له مدني مبارزو ملاتړ وکړي.
د کانونو او پټرولیم دغې پخوانۍ وزیرې همدارنګه پر داسې تګلارو ټینګار کړی، چې د افغان ښځو ترمنځ د ښاري- کليوالي یا د هېواد دننه او بهر په کچه د تفرقې او نورو وېشنو مخه ونیسي. هغې له رباب فاطمې وغوښتل، چې د ښځو ترمنځ له یووالي ملاتړ وکړي او له داسې کړنو ډډه وکړي، چې د دوی ترمنځ واټن زیاتوي.
دا غبرګون په داسې حال کې دی، چې د ملګرو ملتونو د سرمنشي له لوري د افغانستان لپاره د نوې ځانګړې استازې په توګه د رباب فاطمې ټاکل کېدو د افغان ښځو، مدني فعالانو او نړیوالو بنسټونو ترمنځ پراخ غبرګونونه راپارولي دي.
بل خوا، د اروپايي ټولنې ویاند انور العنوني هم د افغانستان لپاره د ملګرو ملتونو د سرمنشي د نوې ځانګړې استازې په توګه د رباب فاطمې له ټاکل کېدو هرکلی کړی دی. نوموړي ټینګار وکړ، چې اروپايي اتحادیه د دوحې د بهیر د راتلونکو ګامونو ملاتړ کوي او زیاته یې کړه: «نړۍ باید هېڅکله افغانستان هېر نهکړي».
