افغان خبریال همایون خان چې له افغانستان نه تر وتلو وروسته په کاناډا کې مېشت شوی وایي، د جلاوطنۍ له ژوند سره، سره لاهم هڅه کوي د افغانانو غږ نړۍ ته ورسوي؛ څو د افغانستان د خلکو ستونزې د نړۍوالو له پامه ونه لوېږي.
همایون خان په ۲۰۰۸کال کې په افغانستان کې د خبریال په توګه خپله دنده پیل کړه. هغه وایي، د جګړه ځپلې سیمې په یوه کلي کې لوی شوی او د خلکو کړاوونو، ناامنۍ او بېثباتۍ دې ته وهڅاوه چې د خبریالۍ له لارې د بېغږه خلکو غږ پورته کړي.
هغه وایي، د خپل مسلک پرمهال یې د فساد، امنیتي پېښو او د عادي افغانانو د ژوند په اړه ګڼ راپورونه جوړ کړي او د فساد د افشا کولو له امله له جدي ګواښونو سره هم مخ شوی دی.
د ۲۰۲۱کال په اګست میاشت کې د طالبانو له بیا واکمنېدو وروسته د افغانستان د رسنیو وضعیت په چټکۍ بدل شو او ګڼ خبریالان د امنیتي اندېښنو له امله هېواد پرېښودو ته اړ شول.
همایون خان هم وروسته کاناډا ته ولاړ او هلته یې پناه واخیسته. هغه وایي، که څه هم اوس په ټورنټو کې ژوند کوي؛ خو لاهم د افغانستان په اړه راپورونه جوړوي او هڅه کوي د افغانانو د ژوند، ستونزو او هیلو کیسې نړۍوالو ته ورسوي.
د نوموړي په وینا؛ حقیقتمحوره خبریالي د خلکو د غږ پورته کولو تر ټولو اغېزمنه وسیله ده. په راپور کې ویل شوي، افغانستان لاهم د څو لسیزو جګړو، سیاسي بېثباتۍ او ټولنیزو ستونزو له اغېزو سره مخ دی او تر ۲۰۲۱کال وروسته د نجونو پر زدهکړو او د ښځو پر حقونو محدودیتونه د خلکو له لویو اندېښنو څخه دي.
همایون خان وایي، په جلاوطنۍ کې خبریالي اسانه نهده، ځکه لومړنیو معلوماتو ته لاسرسی محدود وي؛ خو د افغانانو کیسې باید ژوندۍ پاتې شي. هغه زیاتوي، افغانان هم د نړۍوالې ټولنې برخه دي او د افغانستان د عادي خلکو د وضعیت د ښه کېدو لپاره به خپلې خبریالۍ ته دوام ورکړي.
