د بې پولې ډاکټرانو سازمان وايي، په بلخ ولایت کې د ۲۸ کلنې نفیسې پنځهګوني ماشومان، چې له وخته مخکې او په کم وزن نړۍ ته راغلي وو، د دغه سازمان په ملاتړ د ابوعلي سینا حوزوي او تدریسي روغتون د نوي زېږېدلو ماشومانو د جدي پاملرنې په څانګه کې تر اته ورځنۍ درملنې وروسته روغ شوي دي.
د دغه سازمان په وینا، پنځهګوني ماشومان له زیږون وروسته د شیدو له خوړلو عاجز وو، په ژېړوالي او کانګو اخته شوي وو او د یوه ماشوم روغتیايي وضعیت دومره خراب شوی و چې مور یې د هغه د ژوندي پاتې کېدو په اړه اندېښمنه وه.
نفیسې ویلي: «زما هېڅ یوه ماشوم شیدې نه شوای څښلی. یو یې ډېر ناروغ شو او وېرېدم چې ژوندی به پاتې نه شي.»
د «بې پولې ډاکټرانو» په خبره، له اته ورځو تخصصي پاملرنې وروسته د ماشومانو روغتیايي وضعیت په تدریجي ډول ښه شو او وروسته د نوي زېږېدلو ماشومانو څانګې ته ولېږدول شول.
نفیسې وايي: «نن زما پنځه واړه ماشومان ژوندي او روغ دي. هغوی شیدې څښلی شي او ژېړوالی یې هم له منځه تللی دی.»
بې پولې ډاکټران وايي، څوګوني زېږونونه، په ځانګړي ډول پنځهګوني ماشومان، له جدي روغتیايي خطرونو سره مل وي او له وخته مخکې زېږېدلي او کموزنه ماشومان د ژوند په لومړیو ورځو کې تخصصي طبي پاملرنې ته اړتیا لري.
