د امریکا د بهرنیو چارو وزارت په منځني ختیځ کې د سختو ترینګلتیاوو او د وضعیت د ناڅاپي لا خرابېدو له احتماله په خبرداري سره، له خپلو وګړو غوښتي چې که په ایران کې وي، «هرڅومره ژر چې امکان لري» له دغه هېواده ووځي او له منځني ختیځ څخه د سفر یا تېرېدو په اړه دې له سره غور وکړي.
د امریکا د بهرنیو چارو وزارت د ایران د امنیتي وضعیت په اړه په یوه تازه خبرداري کې ویلي، په سیمه کې امنیتي وضعیت لا هم پېچلی دی او د ترینګلتیاوو د ناڅاپي زیاتېدو احتمال شته. دغه وزارت په سیمه کې له مېشتو امریکايي اتباعو غوښتي چې احتیاط ته دوام ورکړي او د وروستیو بدلونونو لپاره خبرونه په دوامداره توګه تعقیب کړي.
د امریکا حکومت هغو امریکايي وګړو ته چې منځني ختیځ ته سفر کوي یا له دې سیمې تېرېږي، سپارښتنه کړې چې له خپلو هوايي شرکتونو سره اړیکه ونیسي او د الوتنو د دوام په اړه ډاډ ترلاسه کړي.
د امریکا د بهرنیو چارو وزارت ویلي: «امریکايي وګړي باید ایران ته سفر ونه کړي او منځني ختیځ ته د سفر یا له دې سیمې څخه د تېرېدو په اړه له سره غور وکړي.»
دغه وزارت له هغو امریکايي اتباعو چې لا هم په ایران کې دي، غوښتي چې «هرڅومره ژر چې امکان لري» له دغه هېواده ووځي او د احتمالي شخړې په صورت کې د نږدې پناهځای له موقعیت څخه ځان خبر کړي.
