ایران د سې شنبې په ورځ په بحرین، کویت او اردن کې پر امریکايي پوځي اهدافو د بریدونو اعلان کړی او ویلي یې دي، چې دغه بریدونه یې د ایران په سوېل او لوېدیځ کې د امریکا تر بریدونو وروسته کړي دي.
امریکايي ځواکونو د ایران د پوځي قوماندې مرکزونه، د توغندیو او بې پیلوټه الوتکو اډې، سمندري تاسیسات او د هوايي دفاع سیستمونه بمبار کړل. امریکا ویلي، دغه بریدونه د امریکايي سرتېرو د وژل کېدو په غبرګون کې شوي چې شمېر یې ۱۷ تنو ته رسېدلی دی.
د ایران سپاه پاسداران ادعا کړې چې په بحرین کې یې د امریکا اړوند تاسیسات، د شیخ عیسی هوايي اډې د امریکايي پوځیانو استوګنځي او د امازون شرکت پورې تړلې زیربناوې په نښه کړې دي.
ایران همدارنګه ویلي، په کویت کې یې پر درېیو امریکايي پوځي اډو د بې پیلوټه الوتکو بریدونه کړي او په اردن کې یې هم یو امریکايي پوځي هدف ویشتی دی.
خو رویټرز ویلي، د ایران دغه ادعاوې په خپلواکه توګه نه دي تایید شوې.
امریکايي پوځ، بحرین او امازون تر اوسه په دې اړه غبرګون نه دی ښودلی او اردن ویلي، ځواکونو یې پنځه ایراني بې پیلوټه الوتکې نسکورې کړې دي.
د راپور له مخې، په همدې ورځ د هرمز تنګي کې یوه نفت وړونکې بېړۍ هم د نامعلوم توغندي له لګېدو وروسته زیانمنه شوې او عمله یې د بېړۍ پرېښودو ته اړه شوې ده.
سپاه پاسداران بیا ویلي، دوو نورو نفت وړونکو بېړیو هم د چاودنو له امله اور اخیستی دی.
