اکسیوس وېبپاڼې د دوشنبې په ماښام (د چنګاښ ۲۹مه) راپور ورکړی، پهداسې حال کې چې د امریکا ولسمشر ډونالډ ټرمپ له ایران سره د بشپړې جګړې پیلولو په اړه فکر کوي؛ منځګړي لاهم هڅه کوي چې د تهران او واشنګټن ترمنځ یو نوی اوربند رامنځته کړي.
د اکسیوس په وینا؛ ډونالډ ټرمپ له ایران سره د جګړې یو پرېکنده پړاو ته نږدې کېږي، امریکایي او اسراییلي چارواکي د شخړې د پای ته رسولو لپاره یوازې دوه سناریوګانې لري: یا دې د هرمز تنګي د بیا پرانیستلو په لپاره نوی لس ورځنی اوربند وڅاري او یاهم د تهران د تسلیمېدو لپاره له اسراییل سره په لویه کچه ګډ پوځي عملیات پیل کړي.
اکسیوس د امریکايي چارواکو په حواله لیکلي، که څه هم د فارس خلیج د سقوط او د جګړې د دوام لپاره لږ وخت پاتې دی؛ ټرمپ لاتراوسه خپله وروستۍ پرېکړه نهده کړې، خو په راتلونکو څو ورځو کې به دا روښانه شي چې هغه کومه لاره غوره کوي.
دوو سیمهییزو منځګړو اکسیوس ته ویلي، چې قطر، مصر، پاکستان او نورو سیمهییزو منځګړو امریکا او ایران ته د لس ورځني اوربند وړاندیز کړی دی. امریکايي چارواکو ویلي، د ټرمپ اداره پر یاد وړاندیز غور کوي او له اسراییل یې غوښتي چې د ډیپلوماتیکو حل لارو د تړلو لپاره اقدام ونه کړي.
