د غزې روغتیايي چارواکو ویلي، چې د سېشنبې په ورځ د غزې په تړانګه کې د اسراییل په هوايي بریدونو کې لږترلږه ۱۲ فلسطینیان وژل شوي دي. په دغه برید کې د یوې ښځې او څلورو ماشومانو په ګډون د یوې کورنۍ شپږ غړي وژل شوي دي.
د اسراییل پوځ د برید پخلی کړی او ویلي یې دي، چې په دغه برید کې یې د حماس یو غړی په نښه کړی دی. یاد پوځ زیاته کړې، چې د عملیاتو د پایلو او د ملکي تلفاتو د راپورونو په اړه څېړنه کوي.
د یادې کورنۍ یو خپلوان رویټرز ته ویلي، چاودنه هغه مهال وشوه کله چې دغه کورنۍ ویده وه. هغه وویل: «موږ نشو کولی خپل ماشومان او لمسیان له دغه ډول وژونکو بریدونو او ویجاړۍ وژغورو. د یاد برید ډېری قربانیان ماشومان او ښځې دي او تر برید وړاندې هیڅ ډول خبرداری نه و ورکړل شوی».
د اسراییل پوځ ویلي، چې له جمعې ورځې راهیسې یې په څلورو جلا بریدونو کې د حماس او اسلامي جهاد څلور غړي وژلي دي. یاد پوځ ویلي، چې له دې ډلې درې کسان د ۲۰۲۳کال د اکتوبر د ۷مې په برید کې ښکېل وو.
د غزې د روغتیايي چارواکو د شمېرو له مخې؛ د تېر کال په اکتوبر میاشت کې د اسراییل او حماس ترمنځ د اوربند له ټینګېدو راهیسې د اسراییل په بریدونو کې تر ۱۱۶۰ زیات فلسطینیان وژل شوي دي، چې ډېری یې ملکي وګړي دي.
ورته مهال د مصر، قطر، ترکیې او امریکا په ګډون د منځګړو هڅې دوام لري؛ ترڅو د غزې د جګړې د پای ته رسولو لپاره د متحده ایالاتو د ولسمشر ډونالډ ټرمپ پلان پرمخ یوسي. په دغه پلان کې د حماس بېوسلې کول او له غزې د اسراییلي ځواکونو وتل شامل دي؛ خو تراوسه پورې په خبرو اترو کې کوم د پام وړ پرمختګ نهدی شوی.
