افغانستان انټرنشنل ـ پښتو، بلوچستان
د افغان محصلینو ټولنې مشر صدیق شریعتي افغانستان انټرنشنل پښتو ته ویلي، نږدې یو کال کېږي چې افغان محصلینو په پاکستان د خپلو تحصیلي ویزو د غځولو غوښتنلیکونه سپارلي؛ خو تراوسه یې نه ویزې تمدید شوې او نه هم ورته کوم رسمي ځواب ورکړل شوی دی.
شریعتي وویل، د ویزو د نه غځېدو له امله د افغان محصلینو ټولې چارې ټکنۍ شوې دي. د هغه په وینا؛ محصلین نهشي کولی په ازاد ډول تګراتګ وکړي، بانکي حسابونه وکاروي، روغتیايي خدمتونه ترلاسه کړي او یاهم د اړتیا پرمهال له پاکستان نه بهر سفر وکړي.
هغه وویل، که یو محصل ناروغ شي، د ویزې د نشتوالي له امله نهشي کولی له لیلیې څخه د درملنې لپاره روغتون ته ولاړ شي. نوموړي زیاته کړه، چې افغان محصلان په لیلیو کې د سیاسي بندیانو په څېر ژوند کوي او د ویزو د ستونزې له امله له سخت رواني او ټولنیز فشار سره مخ دي.
نوموړي ادعا کړې، چې افغان محصلین د پولیسو له ځورونې سره هم مخ دي. شریعتي وویل، هغه افغان محصلان چې په خپلو شخصي لګښتونو په پاکستان کې زدهکړې کوي، له ناروښانه برخلیک سره مخ دي او د دغه محصلانو شمېر شاوخوا ۳زرو ته رسېږي.
هغه زیاته کړه، چې د ویزو ټول اسناد د پاکستان د لوړو زدهکړو کمېسیون ته سپارل شوي؛ خو د یوه کال له تېرېدو سره، سره لاهم د زرګونه افغان محصلینو غوښتنلیکونه په تمه پاتې دي.
د هغه په وینا؛ د دغه ستونزې په اړه یې د پاکستان د اپوزېسیون له مشر محمودخان اڅکزي، د طالبانو د بهرنیو چارو وزارت او نورو اړوندو ادارو سره خبرې کړې؛ خو تراوسه یې کومه عملي پایله نهده ترلاسه کړې.
شریعتي ادعا وکړه، چې د پاکستان لهخوا د افغان کډوالو د اېستلو له پالیسۍ وروسته، تر ټولو زیات فشار پر افغان محصلینو راغلی او دوی د سیاسي پرېکړو قرباني شوي دي. هغه وویل، په دې وروستیو کې په ملتان او بهاولپور کې هم یوشمېر افغان محصلین نیول شوي او د یوې افغان ډاکټرې د نیول کېدو پېښه یې هم یاده کړه.
د افغان محصلینو ټولنې مشر وویل، د ویزو ستونزه یوازې د زدهکړو پر وړاندې خنډ نهده؛ بلکې د زرګونه افغان محصلینو رواني، ټولنیز او حقوقي ژوند یې هم اغېزمن کړی دی. هغه له پاکستاني چارواکو غوښتي، چې د افغان محصلینو د ویزو موضوع له سیاسي مسایلو جلا کړي، د هغوی د ویزو د تمدید بهیر چټک کړي او اجازه ورکړي چې خپلې زدهکړې بشپړې کړي.
