د طالبانو عدلیې وزارت خبر ورکړی، چې د تېرې یوې میاشتې په ترڅ کې یې په کابل ښار کې د معاملاتو لارښوونې اته دفترونه د قانوني سرغړونو او ناقانونه فعالیتونو له امله تړلي دي.
د دغه وزارت په خبرپاڼه کې راغلي، چې د معاملاتو لارښوونې او عریضه لیکونکو چارو ریاست د محرم میاشتې پرمهال د کابل ښار د معلوماتو لارښوونې ۵۴ دفترونه ارزولي دي. د خبرپاڼې له مخې؛ د دغه دفترونو د ثبت کتابونه، رسمي اسناد، مهرونه، لوحې او نور اړین اسناد څېړل شوي، چې په پایله کې یې اته دفترونه تړل شوي دي.
دغه وزارت همدارنګه ویلي، چې په یاده موده کې یې ۱۷۳ کسانو ته د معاملاتو لارښوونې نوي جوازونه ورکړي او د ۵۸ نورو دفترونو جوازونه تمدید کړي دي. د دغه وزارت د معلوماتو له مخې؛ ۳۲۱ کسانو ته د معاملو د منځګړیتوب او قانوني کړنلارې په اړه روزنیز پروګرامونه هم ترسره شوي دي.
طالبانو ویلي، چې په دې موده کې یې د کورونو د کرایې او نورو معاملو په تړاو د ۹۸ ښاریانو شکایتونه هم ارزولي او څېړلي دي. د یاد وزارت په وینا؛ دغه دفترونه د سرغړونو، د فعالیت جواز نهلرلو یا نه تمدیدولو او نورو ناقانونه فعالیتونو له امله تړل شوي دي.
وړاندې د طالبانو عدلیې وزارت خبر ورکړی و، چې د ۱۴۰۴کال په اوږدو کې یې د کابل په بېلابېلو ناحیو او ولسوالیو کې د معاملاتو لارښوونې ۲زره او ۲۴۴ دفترونه څارلي او له دې ډلې ۲۶۳ دفترونه تړل شوي دي.
