بریتانوۍ ټېلګراف ورځپاڼې راپور ورکړی، چې د ایران اسلامي جمهوریت بریتانیا ته د خپلو استخباراتي ادارو اړوندو کسانو د لېږدولو لپاره د انسانانو د قاچاق له شبکو څخه ګټه پورته کوي. ایران لا تر اوسه د ټېلګراف د دغه راپور په غبرګون کې څه نهدي ویلي.
د دغه راپور پر بنسټ، بریتانوي چارواکو د ایران د اسلامي جمهوریت له استخباراتي بنسټونو سره اړوند یو شمېر کسان هغه مهال پېژندلي او توقیف کړي، چې د مانش کانال له لارې يې په وړو کښتیو کې دغه هېواد ته د ننوتلو هڅه کوله.
ټېلګراف د انسانانو د قاچاقبرانو او ایراني چارواکو له قوله لیکلي، چې د منځني ختیځ او مانش کانال ترمنځ د قاچاق ځینې لارې د ایران د سپاه پاسداران تر ولکې لاندې دي او له دغو شبکو څخه بریتانیا ته د هغو کسانو د لېږد لپاره کار اخیستل کېږي چې «انقلابي ځواکونه» بلل کېږي.
د بریتانیا کورنیو چارو وزارت ویلي، هغه کسان چې د دغه هېواد د ملي امنیت لپاره د ګواښ په توګه تشخیص شي، سمدستي نیول کېږي او په لومړي فرصت کې به له دغه هېواد څخه واېستل شي.
ایران لا تر اوسه د ټېلګراف د دغه راپور په غبرګون کې څه سپیناوی نهدی کړی.
