د ازادۍ جبهې په یوه اعلامیه کې په رسمي توګه خبر ورکړی، چې د بدخشان په زیباک ولسوالۍ کې یې د طالبانو دوه پوځي ډرون څرخکې ویشتلي او له منځه وړې دي. ازادۍ جبهې د ډرونونو ویډیو هم خپره کړې ده.
جبهې په یوه اعلامیه کې ویلي چې دغه دوه ډرونونه د شنبې په ورځ، د زمري په درېیمه، هغه مهال په نښه شول چې د زیباک په هغو سیمو کې یې عملیات کول چې د ازادۍ جبهه یې تر خپل کنټرول لاندې بولي.
ازادۍ جبهه ادعا کوي چې طالبان په وروستیو ورځو کې هڅه کوي د خپلو پوځي امکاناتو او تجهیزاتو په کارولو سره د جبهې پر مواضعو د پرمختګ لپاره پراخ عملیات وکړي، خو د جبهې په وینا، د دوی منظم مقاومت د طالبانو د پرمختګ مخه نیولې ده.
د جبهې په اعلامیه کې همدارنګه ادعا شوې چې د دغو نښتو پر مهال طالبانو ته مرګژوبله او پوځي زیانونه اوښتي، خو د تلفاتو په اړه یې مشخص شمېر نه دی ورکړی.
ازادۍ جبهې د تېرې ورځې د یوې بلې پېښې په اړه ویلي چې د زیباک په ولسوالۍ کې یې د طالبانو د مرستندویه ځواکونو د لېږد لپاره د هلیکوپټرو د ښکته کېدو مخه هم نیولې ده.
د جبهې په وینا، دغې چورلکې د مرستندویه ځواکونو د انتقال هڅه کوله، خو د جبهې له بریدونو سره مخ شول او په پایله کې یې سیمه پرېښوده او شاتګ یې وکړ.
تر اوسه د ازادۍ جبهې دغه ادعاوې په خپلواکه توګه نه دي تایید شوې او د طالبانو له لوري هم د دوو ډرونونو د له منځه تلو، د هلیکوپټرو د شاتګ او د خپلو ځواکونو د احتمالي تلفاتو په اړه رسمي څرګندونې نه دي شوې.
