د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې تیره ورځ ۴۱۳ کډوالۍ کورنۍ چې شمیر یې ۲۱۸۳ تنه و له ایران او پاکستان نه افغانستان ته جبري ستنې کړل شوې دي.
د یاد کمېسیون د راپور له مخې، دغه کډوال د ننګرهار د تورخم، د کندهار د سپین بولدک او د هرات د اسلامکلا له لارې ستانه شوي دي.
راپور زیاتوي، له یادو کورنیو څخه ۳۶۳ کورنۍ د تورخم له لارې، ۳۲کورنۍ د سپین بولدک له لارې او ۱۸کورنۍ د اسلامکلا له لارې افغانستان ته ستنې شوې دي.
د کمېسیون د معلوماتو پر بنسټ، راستنو شویو کورنیو سره د اړتیا وړ مرسته هم شوې ده.
دا په داسې حال کې ده چې له پاکستان نه د افغان کډوالو جبري ستنیدنه په چټکۍ دوام لري. وړاندې د طالبانو د کډوالو او بېرته راستنېدونکو چارو وزارت خبر ورکړی، چې یوازې تېره اونۍ د پاکستان له زندانونو تر ۸۰۰ ډېر افغانان خوشې شوي دي.
د طالبانو تر واک لاندې د افغاني سرې میاشتې ټولنې مسوولین بیا وایي، چې په تېرو درېیو میاشتو کې یوازې د تورخم له لارې نږدې ۶۰زره کونۍ افغانستان ته ستنې شوې دي. په تورخم کې د طالبانو د افغاني سرې میاشتې ټولڼې مسوول شاکرالله شاکر د یادې ډلې تر واک لاندې ملي ټلویزېون ته ویلي، په تېرو درېیو میاشتو کې ۵۹زره او ۸۳۳ کورنۍ له پاکستان نه راستنې شوې دي.
