د تورخم له لارې ۱۱۰نور پاکستاني محصلان خپلو سیمو ته ستانه شوي دي. دغه محصلان له لسو میاشتو راهیسې په افغانستان کې پاتې وو. په تورخم کې سرچینې وايي، چې ۵۹۲ پاکستاني کارګو موټر هم بېرته پاکستان ته رسیدلي دي.
په افغانستان کې بند پاتې ۱۱۰نور پاکستاني محصلان د تورخم له لارې خپل هېواد ته ستانه شوي دي، په داسې حال کې چې ۵۹۲بار وړونکي موټر هم پر تورخم اوښتي دي.
په پېښور کې د طالبانو د کونسلګرۍ د سرچینو په وینا، په تیرو لسو میاشتو کې په افغانستان کې بند پاتې ۱۱۰نور پاکستاني محصلان د تورخم له لارې پاکستان ته د ننوتلو وروسته په خوندي ډول خپل هېواد ته ستانه شوي دي.
یوه میاشت وړاندې ۷۰پاکستاني محصلانو ته د ستنیدو اجازه ورکړل شوې وه.
په ورته وخت کې، په افغانستان کې بند پاتې ۵۹۲پاکستاني بار وړونکي موټر هم د تورخم له لارې پاکستان ته رسېدلي دي.
تحریک طالبان پاکستان ادعا کړې چې د جولای په میاشت کې یې په ټول پاکستان کې ۳۱۵ وسله وال بریدونه کړي دي. د دغې ډلې په وینا، په دغو بریدونو کې تر ۳۰۰ ډېر پاکستاني امنیتي سرتېري وژل شوي دي.
تحریک طالبان پاکستان (ټي ټي پي) په یوه خبرپاڼه کې ویلي، چې د جولای په میاشت کې یې په ټول هیواد کې ۳۱۵ بریدونه کړي او له ۳۰۰ ډېر پاکستاني پوځیان او امنیتي سرتېري یې وژلي دي.
ډیری بریدونه د خیبر پښتونخوا په جنوبي ولسوالیو کې شوي، چې ۱۸۱ ته یې شمېر رسیږي.
د ټي ټي پي رسمي عمر میډیا د شنبې په ورځ په یوه خپره خبرپاڼه کې ویلي چې تر ټولو ډیر بریدونه په شمالي وزیرستان او جنوبي وزیرستان کې شوي، چې په ترتیب سره ۸۶او ۶۴دي، په داسې حال کې چې ۱۶بریدونه په ټانک او ۱۵ په ډیره اسماعیل خان ولسوالیو کې شوي دي.
د ټي ټي پي په وینا،« ۲۴بریدونه په پیښور ولسوالۍ کې، ۱۹په باجوړ، ۱۲په کویټه او برنول ولایتونو کې، ۱۱په کورمه ولسوالۍ کې، ۱۰په لکي مروت کې او نهه په بنو، خیبر او اورکزۍ ولسوالیو کې شوي دي».
د ټي ټي پي په وینا، په جولای کې درې بریدونه په جنوبي پنجاب او یو په کراچۍ کې شوي دي.
د پاکستاني طالبانو په وینا، په دغو بریدونو کې ټولټال ۷۸۱کسان وژل شوي او ټپیان شوي، په داسې حال کې چې ۶۸کسان نیول شوي دي.
په تیرو څو اونیو کې په خیبرپښتونخوا او بلوچستان کې د پاکستان پر امنیتي منسوبینو بریدونه زیات شوي دي.
د پاکستان د پوځ ویاند پرون په یوه خبري غونډه کې تایید کړه چې سږکال په وسله والو او ځانمرګو بریدونو کې زیاتوالی راغلی دی.
پاکستاني پوځ ویلي، چې په شمالي وزیرستان کې د استخباراتي عملیاتو پر مهال د دوی یو لوړپوړی پوځي افسر وژل شوی. د وژل شوي پوځي نوم جګړن احسان الهی او د میانوالې اوسېدونکی ښودل شوی.
د پاکستان د پوځ د رسنیو څانګې په یوه اعلامیه کې د پنځو وسله والو د وژلو خبر هم ور کړی دی.
په اعلامیه کې ویل شوي چې د میانوالې ولسوالۍ ۳۴کلن پوځي جګړن احسان الهي د پوځیانو د مشرۍ پرمهال په برید کې وژل شوی دی.
په تیره اونۍ کې په خیبر پښتونخوا کې د پاکستان پر امنیتي ځواکونو بریدونه زیات شوي ، چې له دېرشو زیات پرسونل او حکومتي ملاتړي په ټانک، هنګو، شمالي وزیرستان او سوات کې پکې وژل شوي دي.
د خیبر پښتونخوا سویلي وزیرستان په برمل تحصیل کې د جمعیت علمای اسلام ګوند اړوند دیني عالم مولانا محمد اسماعیل د نامعلومو وسلهوالو په ډزو وژل شوی دی.
د ولسوالۍ د پولیسو مشر محمد طاهر ویلي، پېښه د جمعې تر لمانځه وروسته د اعظم ورسک په سیمه کې رامنځته شوې، چې دوه موټرسایکل سپرو وسلهوالو پر مولانا محمد اسماعیل ډزې وکړې او هغه یې په ځای وواژه.
د پولیسو په وینا، بریدګر له سیمې تښتېدلي او د پېښې په اړه لومړنی راپور ثبت شوی دی.
پولیس وایي، د پېښې پلټنې پیل شوې او قضیه له بېلابېلو اړخونو ارزول کېږي.
د پولیسو او سیمهییزو مشرانو د معلوماتو له مخې، مولانا محمد اسماعیل د کژه پنګې اوسېدونکی و او په سیمه کې یې په یوه دیني مدرسه کې د استاد په توګه دنده ترسره کوله.
دا په داسې حال کې ده چې د روان کال په مې میاشت کې د جمعیت علمای اسلام (ف) مشهور عالم او د خیبر پښتونخوا د صوبايي اسمبلۍ پخوانی غړی مولانا محمد ادریس هم په چارسده کې د وسلهوالو په برید کې وژل شوی و.
همدارنګه د جنورۍ په میاشت کې د جمعیت علمای اسلام (ف) یو بل مشر مولانا سلطان محمد وزیر د جنوبي وزیرستان د واڼه ښار په یوه چاودنه کې تر ټپي کېدو وروسته ساه ورکړې وه.
د خیبر پښتونخوا د بېلابېلو سیمو د ۳۷ ځوانانو کورنۍ وايي، خپل عزیزان یې د کار او ښه راتلونکي په هیله د لیبیا له لارې اروپا ته تللي، خو له شاوخوا اتو میاشتو راهیسې یې هېڅ درک نشته او له پاکستاني حکومته غواړي چې د هغوی د موندلو لپاره بېړنۍ ډیپلوماټیکه مداخله وکړي.
د دغو ځوانانو کورنۍ د لومړي ځل لپاره په ګډه د پېښور پرېس کلب ته راټولې شوې او له حکومت څخه یې وغوښتل چې له لیبیايي چارواکو سره سمدستي اړیکه ونیسي، د ورکو شویو کسانو د برخلیک په اړه معلومات ترلاسه کړي او که په زندانونو کې بنديان وي، د خوشې کېدو او پاکستان ته د ستنېدو لپاره یې عملي اقدامات وکړي.
کورنۍ اندېښنه لري چې ښايي ځینې ځوانان په لیبیا کې بندیان وي، خو تر اوسه د پاکستان د حکومت یا کومې خپلواکې سرچینې له لوري په دې اړه رسمي تایید نه دی شوی.
د ورک شوي ۲۵ کلن عمر خان تره، مولانا سلامت خېل، وویل چې وراره یې د ۲۰۲۵ کال د سپټمبر په ۱۳مه د کار او ښه راتلونکي په هیله له پاکستانه وتلی و.
هغه وویل: «عمر خان د ښه راتلونکي او روزګار په هیله له پاکستانه روان شوی و. له هغه سره مو وروستۍ ټیلیفوني خبرې د ۲۰۲۵ کال په ډسمبر کې کړې وې، خو له هغې وروسته یې هېڅ درک نه شته.»
سلامت خېل زیاته کړه چې د ورک شویو ځوانانو کورنۍ د خیبر پښتونخوا له بېلابېلو سیمو، په ځانګړي ډول کرم، پېښور، باجوړ، صوابۍ او نوشهرې څخه دي.
د کورنیو په وینا، دوی د پاکستان لومړي وزیر، ولسمشر، د کورنیو چارو وزارت، د بهرنیو چارو وزارت، د بهر مېشتو پاکستانیانو وزارت او نورو اړوندو ادارو ته څو ځله غوښتنلیکونه سپارلي، خو تر اوسه یې د خپلو عزیزانو د برخلیک په اړه کوم روښانه او وروستی معلومات نه دي ترلاسه کړي.
د دغو کورنیو یوه غړي وویل: «موږ یوازې دا غواړو چې پوه شو زموږ بچیان چېرته دي. که حکومت عملي ګامونه وانخلي، نو خپل احتجاج به نور هم پراخ کړو.»
کورنۍ وايي، دا موضوع تر دې مخکې هم له حکومتي ادارو سره مطرح شوې وه. د ۲۰۲۶ کال په فبرورۍ کې هم دوی د خپلو ورک شویو عزیزانو د موندلو لپاره د حکومت د مرستې غوښتنه کړې وه، خو د دوی په وینا، له څو میاشتو تېرېدو وروسته لا هم د پلټنو په بهیر کې د پام وړ پرمختګ نه دی شوی.
د دغو ځوانانو د ورکېدو په اړه د لیبیا د چارواکو له لوري هم تر اوسه داسې رسمي معلومات نه دي خپاره شوي چې د هغوی د اوسني وضعیت په اړه وضاحت وکړي.
لیبیا له اوږدې مودې راهیسې له افریقا او اسیا څخه اروپا ته د ناقانونه سفر کوونکو لپاره د مدیترانې سمندر پر لور یوه مهمه ترانزیټي لاره ده. د بشري حقونو نړیوالو سازمانونو په دغه هېواد کې د کډوالو د نیول کېدو، شکنجې، قاچاق او ناوړه چلند په اړه په وار وار اندېښنه څرګنده کړې ده.
د کډوالۍ نړیوال سازمان (IOM) د معلوماتو له مخې، له لیبیا څخه د مدیترانې سمندر له لارې اروپا ته د تېرېدو مسیر د نړۍ له تر ټولو خطرناکو کډوالۍ لارو څخه دی.
د خیبر پښتونخوا سویلي وزیرستان ولسوالۍ ادارې د خراب امنیتي وضعیت او احتمالي وسلهوالو ګواښونو له امله ګرځبندیز او یو لړ نور امنیتي محدودیتونه لګولي دي.
د ولسوالۍ ادارې د خبرتیا له مخې، د اګست په لومړۍ نېټه په واڼه کې له سهار ۶ بجو تر ماښام ۷ بجو پورې بشپړ ګرځبندیز نافذ دی. د دغه بندیز له مخې په واڼه ښار، بازار، بایپاس او شاوخوا سیمو کې د خلکو پر تګ راتګ، بازارونو، دوکانونو او سوداګریزو فعالیتونو بندیز لګېدلی دی.
همدارنګه د واڼه، تیارزه ګېټ، کرب کوټ، تنایي، عزیز اباد څلورلارې، درګۍ پل، ګل کڅ او توی خلې په ګډون پر یو شمېر لارو د مسافر وړونکو او بار وړونکو موټرو او موټرسایکلونو تګ راتګ هم منع شوی دی.
د ښکته سویلي وزیرستان مرستیال کمېشنر مسرت زمان افغانستان انټرنیشنل-پښتو ته ویلي، دغه محدودیتونه د «باوري استخباراتي معلوماتو» له ترلاسه کېدو وروسته د خلکو د امنیت د خوندي کولو او د احتمالي وسلهوالو ګواښونو د مخنیوي لپاره د پاکستان د جزا قانون د ۱۴۴مې مادې له مخې لګول شوي دي.
د نوموړي په وینا، نوي امنیتي بندیزونه د جولای له ۲۸مې نافذ شوي او د ۳۰ ورځو لپاره به دوام وکړي. د امنیتي ځواکونو د مرکزونو، پولیسو تاڼو، پوستو او نورو مهمو دولتي ودانیو شاوخوا د ملکي موټرو درول او پارکېنګ هم منع شوی دی.
مرستیال کمېشنر ویلي، موټر چلوونکي باید امنیتي پوستو ته له رسېدو لږ تر لږه ۲۰۰ متره وړاندې خپل موټر په خوندي ځای کې ودروي او د امنیتي ځواکونو له اجازې پرته د پوستې پر لور تګ نه شي کولای.
هغه زیاته کړې چې د امنیتي ځواکونو د کاروانونو د تېرېدو پر مهال باید ټول ملکي موټر د سړک غاړې ته ودرول شي او د کاروان تر بشپړ تېرېدو پورې انتظار وکړي. د امنیتي تاسیساتو او پولیسو مرکزونو په ۲۰۰ مترۍ کې د ملکي موټرو موجودیت هم منع شوی دی.
مسرت زمان خبرداری ورکړی چې د ۱۴۴مې مادې د بندیزونو د سرغړونې په صورت کې به د پاکستان د جزا قانون د ۱۸۸مې مادې او نورو اړوندو قوانینو له مخې قانوني اقدام وشي.
دغه امنیتي اقدامات یوه ورځ وروسته له هغه شوي چې د سویلي وزیرستان په لنډي دوګ سیمه کې پر یوه مدرسه د یوه ادعا شوي ډرون برید له امله دیني عالم مولوي امان الله وژل شوی و.