د کابل یو اوسېدونکي افغانستان انټرنشنل ته د یوې ویډيو په لېږلو سره ویلي، چې طالبانو د یکشنبې په شپه په خېرخانې مېنې کې سراي شمالي ته نږدې شاوخوا ۴ نجونې تر سختو وهلو وروسته نیولې دي.
د دغه کابل مېشتي د معلوماتو له مخې؛ طالب ځواکونو نجونې تر وهلو وروسته له ځان سره بېولې دي. د دغه نجونو د وهلو او نیولو په اړه لاتراوسه کره معلومات نهدي شریک شوي.
دغه پېښه داسې مهال شوې، چې تر دې وړاندې هم سرچینو د کابل په تایمني سیمه کې د شاوخوا اتو ښځو د نیول کېدو خبر ورکړی و.
په افغانستان کې د ملګرو ملتونو مرستندویه پلاوي (یوناما) هم د غبرګولي په میاشت کې په هرات کې د شاوخوا ۳۰ ښځو د نیول کېدو پخلی کړی و. د یوناما په وینا، د دغه ښځو د نیول کېدو لامل د طالبانو «د خوښې جامو له مقرراتو سرغړونه» بلل شوې ده.
د طالبانو د کورنیو چارو وزارت د روان کال د لومړیو خپرو کړو شمېرو له مخې، د افغانستان په زندانونو کې ۱،۸۲۵ ښځې ساتل کېږي چې له دې ډلې ۴۶۹ یې یوازې په کابل کې بندیانې دي.
