شهباز شریف: «د افغانستان له خاورې په پاکستان کې ترهګري روانه ده»
د پاکستان لومړي وزیر شهباز شریف یوځل بیا په خپلو تازه څرګندونو کې ویلي چې د افغانستان له خاورې په پاکستان کې شپه او ورځ «ترهګري روانه ده» او په دغه هېواد کې بېګناه خلک وژني.
د پاکستان لومړي وزیر شهباز شریف یوځل بیا په خپلو تازه څرګندونو کې ویلي چې د افغانستان له خاورې په پاکستان کې شپه او ورځ «ترهګري روانه ده» او په دغه هېواد کې بېګناه خلک وژني.
نوموړي پېښور ته د خپل سفر پرمهال د عملي پلان کمېټې په ناسته کې ویلي چې د افغانستان له خاورې په پاکستان کې د ترهګریزو بریدونو او د بېګناه خلکو د وژنو د مخنیوي لپاره اړ شو چې په خیبر پښتونخوا کې والي واکمني او بېړنۍ حالت اعلان کړي.
نوموړي زیاته کړې چې « د افغاستان له خاورې د پاکستان دننه شپه او ورځ ترهګري روانه ده. له هغه ځایه ترهګر په پاکستان کې بریدونه کوي او بېګناه خلک وژني».
نوموړي ویلي چې د دې لړۍ بشپړ پای ته رسول اړین دي.
شهباز شریف ویلي چې فدرالي حکومت به له پوځ سره په ګډه د خیبر پښتونخوا د خلکو ستونزې حل کړي. شریف ټینګار وکړ چې په دغه ایالت کې پورته شوی وروستی ګام له اساسي قانون او د حکومت له قانوني واکونو سره سم دی.
شهباز شریف په خپلو خبرو کې وویل چې خیبر پښتونخوا د ترهګرۍ او د بنسټیزو عامه خدماتو د نشتوالي له امله سخته اغېزمنه شوې ده.
نوموړي څرګنده کړه چې حکومت له ناچارۍ په دغه ایالت کې بېړنی حالت او د والي واکمني لګولې، ځکه په تېرو څو کلونو کې رامنځته شویو حالاتو د سیمې امن او عامه نظم ته لوی زیان اړولی دی.
د پاکستان لومړي وزیر پر تحریک انصاف نیوکه وکړه او ویې ویل چې د دوی په واکمنۍ کې پوهنه، روغتیا، سوله او د عامه هوساینې ټولې چارې له پامه غورځول شوې وې چې له امله یې ترهګري بیا زیاته شوه.
هغه همدارنګه زیاته کړه چې په تېرو دوه نیمو کلونو کې د سیاسي او پوځي مشرتابه د پرلهپسې هڅو له امله د هېواد اقتصاد بېرته د ثبات پر لور روان شوی دی.
د امریکا د پوځ متقاعد جنرال او د ملي امنیت پخواني چارواکي کېت کېلوګ په یوه مقاله کې د طالبانو د یوې مخالفې جبهې له یوه غړي سره د خپلې لیدنې یادونه کړې او ویلي یې دي چې امریکا باید د طالبانو د واکمنۍ د بدیل په لټه کې له باوري افغان سیاسي جریانونو سره اړیکې وساتي.
کېلوګ واشنګټن پوسټ ته په یوه مقاله کې چې د پنجشنبې په ورځ خپره شوې، لیکلي چې افغانستان د ازادۍ حرکت غړی الیاس فیضي غوریاني واشنګټن ته تللی و، څو د افغانستان د راتلونکي په اړه د خپل حرکت لیدلوری ورسره شریک کړي.
د کېلوګ په وینا، د افغانستان د ازادۍ حرکت هڅه کوي چې د افغان سیاسي او مخالفو جریانونو غږونه د یوې ګډې سیاسي تګلارې تر چتر لاندې سره راټول کړي. د هغه په لیکنه کې د دې تګلارې مهم محورونه مشروع حکومتولي، اقتصادي فرصتونه او د طالبانو له واکمنۍ وروسته د افغانستان راتلونکی بلل شوي دي.
کېلوګ ویلي چې له غوریاني سره یې خبرې لومړنۍ وې، خو هغه د دې فرصت هرکلی کړی چې د عملي سیاسي برنامې په بڼه د افغانستان د ازادۍ حرکت د موخو په اړه واوري.
هغه زیاته کړې چې د افغانانو په مشرۍ او د پراخ ایتلاف پر جوړولو د دغه حرکت ټینګار داسې پوښتنې راپورته کوي چې د لا ارزونې وړ دي.
د امریکا دغه پخوانی امنیتي چارواکی وايي، د افغانستان د ازادۍ حرکت د بریا معیار، د نورو نوظهورو سیاسي جریانونو په څېر، په افغانستان کې د خلکو د ملاتړ ترلاسه کول، د بېلابېلو ټولنو د یوځای کولو وړتیا او د حکومتولۍ لپاره د یوه باوري بدیل وړاندې کول دي.
کېلوګ په مقاله کې له واشنګټن غوښتي چې له هغو افغان سیاسي څېرو او جریانونو سره تعامل وکړي چې د طالبانو د واکمنۍ لپاره د یوه مشروع بدیل په لټه کې دي. د هغه په باور، امریکا باید د دغو جریانونو مشرتابه او د ملاتړ د جلبولو وړتیا وارزوي او په ورته وخت کې د ډیپلوماټیکو، اقتصادي او مالي ابزارو له لارې پر طالبانو فشار وساتي.
هغه ټینګار کړی چې دا ډول تعامل افغانستان ته د امریکايي ځواکونو د بیا لېږلو، د ملتجوړونې د نوې پروژې پیلولو یا د امریکايي مالیه ورکوونکو پر اوږو د نویو مالي لګښتونو د اچولو غوښتنه نه کوي. د کېلوګ په وینا، په افغانستان کې هر دوامدار بدلون باید د افغانانو له خوا رامنځته شي.
د افغانستان د ازادۍ حرکت له استازي سره د کېلوګ د لیدنې یادونه په داسې حال کې کېږي چې د طالبانو له بیا واکمنېدو وروسته د افغانستان د راتلونکي سیاسي جوړښت او د یوه بدیل نظام د رامنځته کېدو پر څرنګوالي بحثونه روان دي.
کېلوګ په خپله مقاله کې له افغانستان سره د امریکا د اړیکو پر بیا ارزولو او د افغان سیاسي جریانونو پر ارزونې ټینګار کړی، خو د افغانستان د ازادۍ حرکت د ملاتړ، په رسمیت پېژندلو یا ورسره د رسمي همکارۍ اعلان یې نه دی کړی.
کیلوګ د ټرمپ په دویمه اداره کې د اوکراین لپاره ځانګړی استازی و، چې په ۲۰۲۵ کال کې یې دنده پای ته رسېدلی ده.
د ننګرهار پوهنتون محصلینو ته د «سلام اچولو» د ارزښت او فضیلتونو په اړه د یوه سیمینار له جوړېدو وروسته، د ټولنیزو رسنیو یو شمېر کاروونکو د پوهنتون د لومړیتوبونو پر څرنګتیا نیوکې کړې دي. ځینو کاروونکو دا ډول سیمینارونه د محصلینو د علمي کچې له اړتیاوو سره نامتناسب بللي دي.
د ننګرهار پوهنتون د دعوت او ارشاد امریت په خپره کړې خبرپاڼه کې ویلي چې د لیلیې محصلینو ته د سلام اچولو د اهمیت او فضیلتونو په اړه اصلاحي سیمینار وړاندې شوی دی.
د خبرپاڼې له مخې، د امام ابوحنیفه دیني جامعې استاد مفتي شاهدالله حقاني په دغه سیمینار کې د سلام دیني ارزښت، د مسلمانانو ترمنځ د مینې او ورورولۍ پیاوړتیا، د سلام اچولو او ځواب ورکولو اداب، شرعي حکم او ټولنیزې ګټې تشریح کړې دي.
خو د سیمینار د موضوع د اړتیا په اړه منتقدان او تبصره کوونکي وايي، چې پوهنتونونه باید د معاصرې نړۍ له علمي او ټکنالوژیک پرمختګ سره سم د محصلینو د مهارتونو، څېړنې او نوښت لپاره پروګرامونه جوړ کړي.
مسعود خان مسعودي په یوه تبصره کې د سلام اچولو د سیمینار او د نړۍ د علمي پرمختګ ترمنځ واټن ته اشاره کړې ده.
هغه لیکلي چې نړۍ د مصنوعي ځیرکتیا، چپونو، روبوټونو او فضايي پرمختګونو په اړه خبرې کوي، خو د ننګرهار پوهنتون محصلینو ته د سلام اچولو د طریقې په اړه سیمینار وړاندې کوي.
مسعودي پوښتنه کړې چې ولې هغه محصل چې باید په لابراتوار کې کمپیوټري کوډ زده کړي او د انجینرۍ ډیزاین وکړي، د دې پر ځای د سلام اچولو د ادابو په اړه سیمینار ته کېني. د هغه په باور، پوهنتونونه باید د محصلینو د مهارتونو د لوړولو لپاره کار وکړي، نه دا چې د لومړنیو ټولګیو موضوعات بیا تکرار کړي.
د نصیبالله په نامه بل تن د ټکنالوژۍ د پرمختګ یادونه کړې او په طنزیه ډول یې پوښتنه کړې چې ولې د ټکنالوژۍ په اړه سیمینارونه نه جوړېږي.
ضیا شمس جبارخېل هم له پوهنتونونو غوښتي چې له نړۍ سره د سیالۍ لپاره د اختراع، کشف او علمي پرمختګونو پر موضوعاتو تمرکز وکړي. هغه ویلي چې د سلام اداب د ماشومتوب له وخته خلکو ته ورښودل کېږي او پوهنتونونه باید د لویو علمي موخو لپاره کار وکړي.
دا ډول موضوعات باید په ښوونځیو کې تدریس شي
یو شمېر کاروونکو ویلي چې د سلام اچولو ارزښت او اداب د لومړنیو ښوونیزو ټولګیو له موضوعاتو څخه دي او په پوهنتون کې ورته د ځانګړي سیمینار جوړول د لوړو زدهکړو د علمي کچې په اړه پوښتنې راپورته کوي.
د نثار احمد په نامه یو تن ویلي، چې ماشومان باید د سلام اچولو فضیلتونه د ښوونځي په لومړنیو ټولګیو کې زده کړي، په داسې حال کې چې پوهنتونونه باید د علمي مقالو او څېړنو پر پیاوړتیا تمرکز وکړي. هغه پوښتنه کړې چې که پوهنتونونه هم د لومړنیو ټولګیو موضوعات تدریسوي، نو د څېړنې او علمي فعالیتونو معیار به څنګه لوړ شي؟
د عمران یارمل په نامه بل تن نیوکه کړې، چې د سلام موضوع په دویم ټولګي کې زدهکوونکو ته ورښودل کېږي او پوښتنه یې کړې چې ولې پوهنتون په داسې ابتدایي موضوعاتو بوخت شوی دی. هغه په طنزیه ډول د ننګرهار پوهنتون د «ننګرهار وړکتون» په نوم یاد کړی دی.
زمري ستانکزي هم پوښتنه کړې چې «ایا دا پوهنتون دی او که د ښوونځي لومړی ټولګی».
د نصیر احمد میاخېل په نامه بل کس ویلي، چې د سلام اچولو په اړه پوهه د خلکو د ماشومتوب له وخته د دیني بنسټونو ترڅنګ د فرهنګ برخه ګرځېدلې ده. د هغه په باور، په پوهنتون کې باید داسې سیمینارونه جوړ شي چې د ننني عصر له اړتیاوو سره تړاو ولري.
میاخېل د مصنوعي ځیرکتیا، څېړنې، د وخت مدیریت او تولیدیت، انګلیسي ژبې، علمي لیکنې، کمپیوټري مهارتونو او ډیجیټلي سواد په څېر موضوعات د محصلینو لپاره مهم بللي او ټینګار یې کړی چې د سیمینار موضوع باید د محصلینو د واقعي اړتیاوو پر بنسټ وټاکل شي.
د پوهنتون تدریسي کیفیت
د سیمینار په اړه ځینو تبصرو د پوهنتونونو د تدریسي کیفیت او علمي معیارونو موضوع هم راپورته کړې ده.
د ثناءالحق راسخ په نامه یو تن د سیمینار پر موضوع نیوکه کړې او ویلي یې دي چې د پوهنتونونو د تدریسي کتابونو کیفیت او معیارونو ته باید ډېره پاملرنه وشي. هغه د تعلیمي معیارونو د لوړولو غوښتنه کړې او د دې اړتیا یې مطرح کړې چې د پوهنتونونو علمي فعالیتونه باید د لوړو معیارونو له مخې وارزول شي.
د سیمینار په اړه د ځینو کاروونکو غبرګونونه طنزیه بڼه لري. یو شمېر کسانو د سلام د ادابو د تدریس د اړتیا په اړه پوښتنې کړې او په طنز یې د اودس ماتي او استنجا په څېر موضوعاتو لپاره د ورته سیمینارونو د جوړولو وړاندیز کړی دی.
د احمد ویاړ په نامه یوه کاروونکي په لنډه تبصره کې پوښتنه کړې چې «د استنجا کولو سیمینار به کله جوړېږي»
نوراغا میاخېل هم په طنزیه ډول د استنجا په اړه د راتلونکي سیمینار وړاندیز کړی او ویلي یې دي چې «موضوع دې په انګلیسي ژبه هم خپره شي، څو نړیوال ترې ګټه واخلي».
فردوس عمر د سیمینار په اړه په انتقادي ډول لیکلي چې ګواکې د ننګرهار محصلین تېر کال مسلمان شوي او اوس ورته د سلام فضیلت ورښودل کېږي.
امید فضلي هم د سیمینار په اړه د طنزیه غبرګون ترڅنګ د هېواد د وضعیت په اړه خواشیني څرګنده کړې ده.
له نیوکو سره سره، ځینو کاروونکو د سیمینار پر موضوع د خلکو د نیوکو او طنز په اړه اندېښنه څرګنده کړې او ویلي یې دي چې د سلام په څېر دیني او اخلاقي ارزښتونو ته باید په درنه سترګه وکتل شي.
د وحیدالله حسن په نامه یو تن د تبصرو په اړه لیکلي چې د خلکو له نظرونو داسې ښکاري چې دیني موضوعات ورته بېارزښته شوي دي.
د سیمینار د ملاتړ کوونکو په نظر، دیني او اخلاقي پوهاوی هم د ټولنیز ژوند یوه مهمه برخه ده او د دې موضوعاتو په اړه خبرې کول پخپله د پوهنتون له رسالت سره په ټکر کې نه دي، خو منتقدانو یې ویلي، چې سلام په ښوونځیو او کورونو کې زده کیږي او د پوهنتون د سیمینارونو موضوعات باید علمي او د نوي عصر له اړتیاوو سره سم وي.
د نیویارک ټایمز د د خپلو سرچینو له قوله ویلي، چې د پاکستان پوځي او استخباراتي چارواکو په وروستیو میاشتو کې د طالبانو د مخالفو وسلهوالو ډلو له مشرانو سره لیدلي او د احتمالي ملاتړ وړاندیز یې ورته کړی دی.
ورځپاڼې د یوه پاکستاني استخباراتي چارواکي، د ملي امنیت د یوه پخواني چارواکي چې د دغو لیدنو په اړه معلومات ورکړل شوي او د طالبانو ضد یوې وسلهوالې ډلې د یوه لوړپوړي افغان غړي له قوله لیکلي چې پاکستاني پوځي او استخباراتي چارواکو له دغو ډلو سره خبرې کړې دي.
د نړیوال کړکېچ ډلې د افغانستان چارو کارپوه ابراهیم بهیس وايي، چې د افغانستان او پاکستان ترمنځ جګړه ښايي نوره هم پېچلې او له اټکل څخه ووځي، ځکه دواړه لوري نیابتي ډلو ته مخه کوي.
د هغه په وینا، د نیابتي ډلو ترمنځ تقابل مخ په زیاتېدو دی او دا د کړکېچ خطرناک پړاو دی.
د طالبانو او پاکستان ترمنځ جګړه د ۲۰۲۶ کال د فبرورۍ په وروستیو کې هغه مهال پراخه شوه چې پاکستان د طالبانو پر وړاندې د «پرانیستې جګړې» اعلان وکړ. د نیویارک ټایمز په وینا، دغې جګړې د سولې لپاره د څو میاشتو هڅې له خنډ سره مخ کړې او لږ تر لږه ۱۱۰۰ افغان ملکي وګړي یې مړه یا ټپیان کړي دي.
پاکستان تور لګوي چې په افغانستان کې مېشتې وسلهوالې ډلې پر کرښه ور اوړي او پر پاکستاني امنیتي ځواکونو بریدونه کوي. د راپور له مخې، د پاکستان امنیتي چارواکي او کارپوهان د دغو بریدونو زیاتوالی له ۲۰۲۱ کال راهیسې د افغان طالبانو له خوا وسلهوالو ته له برابر شوي مناسب چاپېریال سره تړي.
د راپور په وینا، د تحریک طالبان پاکستان زرګونه وسلهوال له ډیورنډ کرښې تېرېږي او پر پاکستاني امنیتي ځواکونو بریدونه کوي. خو طالبانو په پاکستان کې د وسلهوالو بریدونو په ملاتړ کې د خپل لاس لرلو ادعاوې رد کړې دي.
د نیویارک ټایمز د راپور له مخې، چین، روسیې، ترکیې، سعودي عربستان او قطر د افغانستان او پاکستان ترمنځ د منځګړیتوب هڅې کړې، خو تر اوسه یې د جګړې د پای ته رسولو لپاره کومه څرګنده پایله نه ده لرلې.
چین په اپرېل میاشت کې د دواړو لورو ترمنځ د خبرو کوربه و، خو خبرې بېپایلې پای ته ورسېدې. همداراز، د اکتوبر په پنځمه په مسکو کې د سیمې د لسو هېوادونو په ګډون د افغانستان د امنیت په اړه غونډه د افغان او پاکستاني پلاویو ترمنځ د اختلافاتو له امله د ګډې اعلامیې له خپرولو پرته پای ته ورسېده.
د نړیوال کړکېچ ډلې کارپوه ابراهیم بهیس وايي، دواړه لوري پر خپلو دریځونو دومره ټینګ ولاړ دي چې هېڅ لوری، ان چین هم، نه شي کولای پر هغوی فشار راوړي او د دریځ بدلولو ته یې اړ کړي.
د پاکستان حکومت وايي، تر هغه به له طالبانو سره خبرې ونه کړي چې هغوی د وسلهوالو ډلو د ملاتړ د درولو ژمنه نه وي کړې. د اسلاماباد په یوه دولتي تمویل کېدونکي څېړنیز مرکز کې د افغانستان د پروګرام مشر اریش خان وايي، پاکستاني پوځي او سیاسي مشران تر هغه وخته پوځي اقدام یوازینۍ پاتې لاره ګڼي.
خو نوموړی خبرداری ورکوي چې دا ډول چلند ښايي طالبان دې ته وهڅوي چې پر پاکستان بریدکوونکو وسلهوالو ډلو ته لا ډېر ملاتړ برابر کړي. هغه وايي، د پاکستان اوسنی چلند ښايي د اوږدمهالې ستراتیژۍ پر ځای د راټولې شوې نارضایتۍ پایله وي او دا ډول نارضایتي په اوږدمهال کې د دوام وړ نه ده.
د راپور له مخې، د پولې دواړو غاړو ته ملکي وګړي د جګړې له امله له سختو ستونزو سره مخ دي.
پاکستاني رسنیو راپور ورکړی چې د افغانستان او پاکستان ترمنځ د سوداګرۍ د اوږدمهالې بندېدا له امله پاکستاني صادروونکي له درنو زیانونو سره مخ دي، توکي یې بند پاتې دي او د منځنۍ اسیا بازارونو ته بدیلې لارې هم خورا ګرانې پرېوځي.
د طالبانو او پاکستان ترمنځ تر خونړیو نښتو وروسته، تېر کال په اکټوبر میاشت کې د دواړو هېوادونو ترمنځ ټولې سوداګریزې لارې وتړل شوي.
د سوداګرو د اټکل لهمخې، چې د کابل او اسلام اباد ترمنځ د سوداګرۍ بندښت له امله په تېر یوه کال کې سوداګرۍ ته ۲،۵ میلیارده ډالر زیان اوښتی دی.
د پاکستاني رسنیو د راپورونو لهمخې، د کابل او اسلام اباد ترمنځ د سوداګرۍ بندښت له امله د پاکستان د درمل جوړولو صنعت سخت اغېزمن شوی، ځکه افغانستان یې د درملو تر ټولو لوی بازار دی.
د پېښور په حیات اباد کې د درملو یوې فابریکې مسوولان، چې لا هم پکې تولید دوام لري، د لارو تړل کېدو له امله اړ دې چې د خپلو تولیداتو پلور او لېږد له سره و ارزوي.
د دغې فاریکې ۷۰ سلنه بسته بندي شوي درمل د افغانستان او منځنۍ اسیا د بازارونو لپاره ځانګړي شوي وو، خو د فابریکې مسول جنید الطاف ویلي چې د لارو تړل کېدو له امله سخت زیانمن شوي دي.
الطاف زیاته کړې:« کله چې لار وتړل شوه، موږ لا له مخکې فرمایشونه ترلاسه کړي وو. د توکو یوه برخه چمتو وه او د یوې برخې تولید لا روان و.»
هغه زیاته کړه چې شرکت درانه زیانونه ګاللي دي. نوموړي زیاته کړې چې «د بستهبندۍ ځینې توکي په فارسي ژبه وو. د روسیې او ازبکستان لپاره بستهبندي په روسي ژبه وه. د بستهبندۍ دا ټول توکي وغورځول شول.»
د لارو بندښت له امله د خوراکي توکو او کرنیزو محصولاتو صادروونکي هم زیانمن شوي دي او د ډیورنډ کرښې پورې غاړې په سوداګرۍ کې د ښکېلو کارګرانو او سوداګریزو شرکتونو شبکه هم له ستونزو سره مخ شوې ده.
د وریژو، غوښې، مېوو او کچالو صادروونکي شرکت «اېم اېم الهي ټرېډرز» اجرایوي مشر او شریک مدیر منظور الهي وویل: «دا نه یوازې زما لپاره، بلکې د افغانستان او ازبکستان په سوداګرۍ کې د ټولو ښکېلو کسانو، د پېښور د سوداګریزې ټولنې، کارګرانو او د ګمرکي تصفیې د استازو لپاره ټکان ورکوونکی وضعیت و.»
د سوداګرۍ له ځنډېدو مخکې، د افغانستان او منځنۍ اسیا بازارونو د هغه د شرکت د عوایدو ۸۰ سلنه جوړوله، خو اوس دا ونډه پنځه سلنې ته راټیټه شوې ده.
اوږدې لارې او لوړ لګښتونه
په داسې حال کې چې له مهمو لارو څخه سوداګریزه لا هم بنده ده، د الهي په څېر صادروونکي د منځنۍ اسیا بازارونو ته د رسېدو لپاره د بدیلو لارو په لټه کې دي. په دغو لارو کې د ایران له لارې لېږد هم شامل دی، چې لګښتونه یې لوړ او سفرونه یې اوږده دي.
د ایران له لارې بدیله لاره د پاکستان د بلوچستان ایالت له سیمو تېرېږي، چې امنیتي ګواښونه پکې لوړ دي، او نږدې شپږ اونۍ وخت نیسي.
صادروونکي محمد نعیم وویل: «پخوا به د تورخم له لارې بار په یوه اونۍ کې ازبکستان ته رسېده او د لېږد لګښتونه به له دوه زره تر درې زره امریکايي ډالرو پورې وو. اوس د ایران له لارې د لېږد لګښت شاوخوا له ۱۰ زره تر ۱۳ زره ډالرو پورې دی».
هغه زیاته کړه: «که کوم توکی تاریخ تېر شي یا خراب شي، یوازینۍ حللاره یې غورځول دي.»
اسلاماباد ویلي، تر هغه به له افغانستان سره سوداګري بېرته پیل نه کړي، څو د طالبانو اداره په خپله خاوره کې د فعالو وسلهوالو پر وړاندې اقدام ونه کړي.
شنونکي خبرداری ورکوي چې د پاکستان دا پرېکړه ښايي برعکس پایلې ولري، په داسې حال کې چې د دغه هېواد د ټولې سوداګرۍ کسر لا هم پراخېږي. دوی ټینګار کوي چې اقتصاد باید سیاسي نه شي.
د اقتصادي پالیسۍ د مشارکت بنسټ د څېړنو مشر وقار احمد د چین او هند ترمنځ سوداګرۍ ته په اشاره وايي، چې د دواړو هېوادونو ترمنځ د اوږدمهالو سیاسي او پوځي ترینګلتیاوو سربېره دوام لري. هغه د پاکستان د صادراتو د وضعیت په اړه هم خبرداری ورکړ او ویې ویل چې دغه هېواد اړتیا لري د پیسو نړیوال صندوق د پروګرام په چوکاټ کې د خپلو بهرنیو اسعارو زېرمې پیاوړې کړي. هغه زیاته کړه: «دا چې د پاکستان صادرات نه زیاتېږي، ډېر د اندېښنې وړ دي.»
نوموړي زیاته کړې«که دا پروګرام بریالی شي، نو د پاکستان د بهرنیو اسعارو زېرمې باید زیاتې شي.»
پاکستاني سوداګریزو ډلو له اسلاماباد او کابل نه غوښتي چې خپل اختلافونه د خبرو له لارې حل کړي، خو داسې نښې نشته چې دغه کړکېچ به په نږدې راتلونکي کې پای ته ورسېږي.
د یونسکو او یونیسف ګډ راپور ښيي چې په افغانستان کې د زدهکړو ناورین د نجونو تر محرومیت ورهاخوا پراخ شوی دی. د راپور له مخې، د افغانستان په پوهنتونونو کې د نارینه محصلانو شمېر په ۲۰۱۹ کال کې له شاوخوا ۳۰۶ زرو څخه په ۲۰۲۶ کال کې ۲۰۸ زرو ته راکم شوی دی.
په راپور کې لوړو زدهکړو ته د خلکو د لېوالتیا کمېدل په افغانستان کې د ښوونیز ناورین د پراخېدو نښه بلل شوې ده.
راپور همداراز له لوړو زدهکړو څخه د ښځو د بشپړ محرومیت، په منځنیو ښوونځیو کې د هلکانو د ګډون د کمېدو او د کانکور ازموینې د ګډونوالو د شمېر د راټیټېدو یادونه کوي.
«په افغانستان کې د ۲۰۲۶ کال د زدهکړو وضعیت» تر سرلیک لاندې راپور چې د اکتوبر په ۲۰مه خپور شوی، ښيي چې د کانکور ازموینې د ګډونوالو شمېر په ۲۰۲۰ کال کې له ۲۱۰ زرو څخه په ۲۰۲۳ کال کې شاوخوا ۸۴ زرو ته راکم شوی و. که څه هم دغه شمېر په ۲۰۲۶ کال کې شاوخوا ۱۱۸ زرو ته لوړ شوی، خو لا هم د طالبانو له واکمنېدو مخکې دورې له کچې سره د پام وړ واټن لري.
د راپور له مخې، پوهنتونونو ته د بریالیو کسانو شمېر هم په ۲۰۲۰ کال کې له شاوخوا ۸۱ زرو څخه په ۲۰۲۶ کال کې ۷۴ زره او ۵۰۰ تنو ته راکم شوی دی. خو پوهنتونونو ته د بریالیو کسانو کچه لوړه شوې او په ۲۰۲۰ کال کې له شاوخوا ۳۹ سلنې څخه په ۲۰۲۶ کال کې ۶۳ سلنې ته رسېدلې ده.
د راپور په وینا، دا ښيي چې پوهنتونونو ته د ننوتلو لپاره سیالي کمه شوې ده.
د لوړو زدهکړو په برخه کې راپور د نارینه محصلانو د شمېر د کمېدو یادونه هم کوي. شمېرې ښيي چې د نارینه محصلانو شمېر په ۲۰۱۹ کال کې له شاوخوا ۳۰۶ زرو څخه په ۲۰۲۶ کال کې شاوخوا ۲۰۸ زرو ته راټیټ شوی دی.
دا کمښت په داسې حال کې دی، چې د نجونو له محرومېدو وروسته د افغانستان پوهنتونونه له مالي ستونزو سره هم مخ شوي دي.
له کانکور ازموینې د نجونو بشپړ حذف
راپور د کانکور ازموینې له بهیر څخه د نجونو د بشپړ حذف کېدو یادونه هم کوي.
د خپرو شویو شمېرو له مخې، په ۲۰۲۰ کال کې شاوخوا ۸۰ زره نجونو د کانکور په ازموینه کې ګډون کړی و او په ۲۰۲۱ کال کې هم د ښځینه ګډونوالو شمېر له ۸۱ زرو څخه ډېر و. خو له ۲۰۲۳ کال راهیسې په کانکور ازموینه کې د ښځو د ګډون کچه صفر ښودل شوې ده.
یونسکو او یونیسف د راپور په یوه بله برخه کې وايي چې په ۲۰۲۱ کال کې د نجونو پرمخ د منځنیو ښوونځیو او لېسو له تړل کېدو راهیسې، له ۲،۶ میلیونو څخه ډېرې افغانې نجونې له منځنیو زدهکړو بېبرخې پاتې شوې دي.
د ملګرو ملتونو دغو دوو ادارو خبرداری ورکړی چې د وضعیت دوام نه یوازې پوهنتونونو ته د نجونو د ننوتلو فرصتونه له منځه وړي، بلکې د عام تصور خلاف، د زدهکړو ناورین یوازې نجونې نه اغېزمنوي.
راپور وايي چې په ښوونځیو کې د هلکانو ګډون هم د کمېدو په حال کې دی او په منځنیو او لوړو ټولګیو کې د هغوی د نوملیکنې کچه راټیټه شوې ده. د یونسکو او یونیسف په وینا، دغه بهیر ښيي چې په افغانستان کې د ډېرو ځوانانو لپاره له ښوونځي څخه پوهنتون او ورپسې د کار بازار ته د تګ لاره ورځ تر بلې تنګېږي.
راپور د پوهنتونونو د علمي کادر د کمزوري کېدو یادونه هم کوي. د پوهنتونونو د استادانو او تدریسي کارکوونکو شمېر په ۲۰۱۹ کال کې له شاوخوا ۱۸ زره او ۹۰۰ تنو څخه په ۲۰۲۵ کال کې شاوخوا ۱۲ زره او ۷۰۰ تنو ته راکم شوی دی. د ښځینه استادانو شمېر هم له شاوخوا ۲۶۰۰ تنو څخه څه باندې ۱۰۰ تنو ته راټیټ شوی دی.
یونسکو او یونیسف د پایلې په توګه ویلي، چې د افغانستان ښوونیز نظام له څو هممهالو ناورینونو سره مخ دی، چې له زدهکړو څخه د میلیونونو نجونو محرومیت او له پوهنتونونو د ښځو حذف کېدل، د هلکانو د ګډون کمېدل، د کانکور ازموینې د ګډونوالو د شمېر راټیټېدل، د محصلانو کمېدل او د علمي کادر کوچني کېدل پکې شامل دي.
دغو ادارو خبرداری ورکړی چې د دوامدارې پانګونې او پر زدهکړو د محدودیتونو له لرې کولو پرته به د افغانستان د ښوونیز نظام وړتیا نوره هم کمزورې شي.