د نیوزیلنډ یوه سیلانۍ مالي چې افغانستان ته د دوو نورو نارینه ملګرو سره تللې په یوه ویډیو کې ویلي، چې د افغانستان ښکلا او د خلکو مېلمه پالنه د ښخو پر حقونو د طالبانو محدودویتونه شي پټولای. هغه وایي هوټل، بانک او ځینو نورو ځایونو ته ځکه اجازه نه راکول کېده، چې «ښځه یمه».
مالي دغه ویډیو په افغانسان کې ثبت کړې او دغه هېواد ته له تلونکو سېلانیانو یې غوښتنه کړې، چې د طالبانو تر واک لاندې د خلکو او په ځانګړي ډول د مېرمنو د سخت ژوند انځور هم وړاندي کړي.
هغې په افغانستان کې د یو شمېر سېلانیانو ویډیو او عکسونو ته په اشارې ویلي: «هغه هلکان چې له طالبانو سره د عکسونو اخیستو پر مهال ځانونه په ځانګړو حالتونو کې نیسي، وسلې په لاس کې اخلي او له هغو کسانو سره خاندي چې د ښځو پر ژوند محدودیتونه لګوي، خو وروسته د هغو ښځو په اړه هېڅ نه وايي چې د دغو محدودیتونو تر سیوري لاندې ژوند کوي».
مالي ټنیګار کړی، چې دا ډول سفرونه یوازي د ښکلا او ښایست د کېسو فرصت نه دی بلکې دا مسولیت دی چې د خلکو روایتونه هم تر نورو ورسو.
هغه وايي: «زه پوهېدم، ان هغه پیسې چې د خپلې ویزې لپاره یې ورکوم، هغو طالب چارواکو ته رسېږي چې د ښځو د حقونو د محدودولو مسوول دي؛ خو زه باور لرم چې یو هېواد تر خپل حکومت ډېر څه لري او خلک یې باید د واکمنانو له امله هېر نه شي».
مالي اندېښنه ښودلې، چې بانک او هوټل ته ځکه نه پرېښودل کېدم، چې «ښځه یمه».
نوموړې ویلي، چې د دوو نارینه ملګرو سره د سفر دغه تجربې یې یو شان نه وې. هغه زیاتوي: « زه له دوو نیوزیلنډي نارینه وو سره سفر کوم. موږ له یوه سرحده تېرېږو، په هماغو سړکونو ګرځو او له هماغو خلکو سره مخ کېږو؛ خو په دغه هېواد کې زموږ تجربې یو شان نه دي. هغوی له کومې وېرې او اندېښنې پرته خبرې کوي، خو زه له ځانه پوښتم چې ایا اصلا د خبرو کولو اجازه لرم او که نه. همدا هغه څه وو چې تر ټولو ډېر یې ځورولم».
دغې سېلانۍ ویلي، چې د طالبانو د یو شمېر غړو ترڅنګ یې د خلکو رښتنې مهرباني هم تجریبه کړې خو ټینګار یې کړی، چې د ځینو طالبانو دغه ډول چلند د هغوی د حکومت واقعیت نه شي بدلولای.
مالي ویلي: «افغانستان ښکلی دی، خلک یې مېلمهپال دي او کیسې یې د اورېدو وړ دي؛ خو د هغو ښځو کیسې هم باید واورېدل شي چې د محدودیتونو په لومو کې بندې دي. موږ کولای شو د یوه هېواد ستاینه وکړو، پرته له دې چې د هغه هېواد د حکومت کړنې تایید کړو».
