د جرمني د بایرن ایالت لومړي وزیر زودر افغانستان او سوریې ته د هغو کسانو د بېرته شړلو پر دوام ټینګار کړی، چې په باور یې په جرمونو ککړ دي او یا هم د دغه هېواد امنیت ته ګواښ ګڼل کېږي.
نوموړي د جمعې په ورځ (د لړم په لومړۍ) وویل، جرمني باید د دغو کسانو د اېستلو بهیر په جدي توګه وڅاري او په دې برخه کې به له هېڅ ډول نرمښت څخه کار وانهخیستل شي.
ښاغلي زودر په خپلو څرګندونو کې وویل، په دغه ایالت او په ټول جرمني کې ناقانونه کډوالي په بېساري ډول راکمه شوې او د پناه غوښتنې د غوښتنلیکونو کچه هم ۵۰ سلنې ته را ټیټه شوې ده.
د هغه په خبره، د پناه غوښتونکو د منلو ظرفیت ۲۰ زره کسانو ته راکم شوی او ورسره د دوسیو د څېړلو چارې چټکې شوې دي.
هغه څرګنده کړه: «اوس به راتلونکي ګامونه په جدي توګه پورته کړو. زموږ په هېواد کې به له مجرمانو او امنیتي ګواښونو سره هېڅ ډول جوړجاړی ونهشي او دوی باید ان افغانستان او سوریې ته هم وشړل شي».
د بایرن د لومړي وزیر دا ټینګار په داسې حال کې دی، چې په افغانستان کې د بشري حقونو وضعیت ته په پام سره د پناه غوښتونکو بېرته لېږل لا هم له ګڼو حقوقي او سیاسي خنډونو سره مخ دي.
له دې سره سره، جرمني او یو شمېر نور اروپايي هېوادونه هڅه کوي، چې له طالبانو او د سیمې له هېوادونو سره د اړیکو له لارې د افغان کډوالو د اېستلو بهیر عملي او چټک کړي.
جرمني په وروستیو کلونو کې د کډوالۍ ضد سخت سیاستونه خپل کړي او پر هغو کسانو یې تمرکز ډېر کړی، چې د پناه غوښتنې اسناد یې رد شوي او یا جرمي مخینه لري.
برلین د دغو سختو سیاستونو له مخې، لومړی د هغو افغانانو شړل پیل کړل چې په جنايي جرمونو تورن وو او وروسته یې د رد شویو پناه غوښتونکو د بېرته لېږلو لړۍ هم پراخه کړه.
دا مهال د اروپايي هېوادونو لهخوا شاوخوا ۲۲ زره افغان پناه غوښتونکو ته له اروپا څخه د وتلو رسمي امر ورکړل شوی دی.
له بلې خوا، تېر کال ۳ میلیونه افغانان له ایران، پاکستان او ترکیې څخه بېرته ستانه شوي چې ډېری یې په زوره اېستل شوي او د اروپايي ټولنې چارواکو هم د کډوالو د بېرته لېږلو پر لارو چارو د بحث لپاره د طالبانو د پلاوو کوربهتوب کړی دی.
