فرمان الله له هغو کارګرو څخه و چې په یوه داسې کارخونه کې یې کار کاوه چې د سیمې له کانونو څخه ایستل شوې سپینې ډبرې پکې میده کېږي او په پوډر بدلېږي.
دغه پوډر وروسته د پنجاب او کراچۍ بېلابېلو کارخونو ته لېږدول کېږي چې د سینګار توکو، په ځانګړي ډول د تالکم پوډر په جوړولو کې ترې کار اخیستل کېږي.
د فرمان الله ورور عرفان الله افغانستان انټرنشنل-پښتو ته ویلي چې ورور یې څلور کاله په دې کارخونه کې کار کړی خو په دې موده کې یې روغتیا ورځ تر بلې خرابېدله.
د هغه په وینا، فرمان الله له سختې ساه لنډۍ او د بدن له شدیدو دردونو سره مخ و. کورنۍ یې څو ځله د پرچاوۍ سیمې ته نږدې په یوه دولتي لومړني روغتیايي مرکز کې درملنه کړې خو روغتیا یې ښهوالی نه دی موندلی.
عرفان الله وايي، کله چې د ورور روغتیايي وضعیت لا پسې خراب شو نو د درملنې لپاره یې پېښور ته روغتون ته ولېږداوه.
د هغه په وینا، په پېښور کې یې درملنه لا هم روانه ده خو تر اوسه یې په روغتیا کې د پام وړ ښهوالی نه دی راغلی.
هغه زیاتوي، چې د ورور روغتیا ورځ تر بلې خرابېږي اوس د کار کولو توان نه لري او ډېری وخت پر بستر پروت وي.
د پېښور د سږو متخصص ډاکټر سجاد افغانستان انټرنشنل-پښتو ته ویلي چې د ډبرو د میده کولو او پروسس کولو پر مهال په هوا کې خپرېدونکې دوړې په ځانګړي ډول د سیلیکا لرونکو ډبرو واړه ذرات د کارګرانو روغتیا ته جدي ګواښ پېښوي.
د هغه په وینا، که کارګران د اوږدې مودې لپاره له دغو دوړو سره مخ وي او د مخنیوي لپاره یې لازم تدابیر ونه نیسي نو د سږو د جدي او اوږدمهاله ناروغیو له خطر سره مخ کېدای شي.
نوموړی وايي، د سیلیکا دوړو دوامدار تنفس د سږو د سیلیکوسیس په نوم د یوې جدي ناروغۍ لامل کېدای شي. په دې ناروغۍ کې د سږو نسجونه زیانمنېږي د ساه اخیستلو وړتیا کمېږي او ناروغ له ساه لنډۍ، ټوخي او د سینې له ستونزو سره مخ کېدای شي.
د هغه په وینا، د دې ناروغۍ نښې ښايي د دوړو له اوږدمهاله تماس وروسته څرګندې شي او په ځینو مواردو کې د سږو د فعالیت د دایمي کمزورتیا لامل شي.
ډاکټر ټینګار کوي چې د کارګرانو د روغتیا ساتنې لپاره باید په کارخونو کې د دوړو د خپرېدو د مخنیوي ځانګړي سیستمونه جوړ شي او کارکوونکو ته د سیلیکا دوړو پر وړاندې مناسب او ځانګړي محافظتي ماسکونه ورکړل شي.
د هغه په وینا، د کارخونو مسوولین باید کارکوونکي په منظم ډول روغتیايي معایناتو ته ولېږي د هغوی د سږو وضعیت وڅاري او د ناروغۍ د لومړنیو نښو په څرګندېدو سره ورته پر وخت طبي پاملرنه برابره کړي.
همدارنګه، د کارګرانو لپاره د کاري خوندیتوب په اړه روزنه او د روغتیايي اصولو عملي کول اړین دي.
د فرمان الله د کورنۍ اندېښنه دا ده چې په کارخونه کې د ډبرو د میده کولو پر مهال خپرېدونکو دوړو د هغه پر روغتیا ناوړه اغېز کړی دی.
د دوی په وینا، په داسې کارخونو کې د کارکوونکو د روغتیا ساتنې لپاره د ماسکونو، د دوړو د مخنیوي وسایلو او نورو خوندیتوب تدابیرو ته اړتیا ده.