د جرمني لپاره الترناتیو ګوند د افغانانو په ګډون د ۲.۶ مېلیونه کډوالو د اېستلو غوښتنه کړې

د جرمني لپاره د الترناتیو ښياړخي افراطي ګوند یوه مشر تینو کروپالا له دغه هېواده د ۲.۶ مېلیونه افغان، سوریایي او اوکرایني پناهغوښتونکو د اېستلو غوښتنه کړې. هغه ویلي، په دغه هېوادونو کې د جګړې تر پای ته رسېدو یا امنیتي وضعیت ښه کېدو وروسته باید یاد کسان خپلو هېوادونو ته ستانه شي.
کروپالا له «بیلد» ورځپاڼې سره په مرکه کې ویلي، د هغه پناهغوښتونکو ترڅنګ چې د استوګنې قانوني اسناد نهلري او بهرني مجرمان دي؛ د افغانستان، سوریې او اوکراین وګړي هم باید د پناه غوښتنې لاملونو تر لهمنځه تلو وروسته جرمني پرېږدي.
هغه د دغه کسانو شمېر ۲.۶ مېلیونه ښودلی دی. د نوموړي یادې غوښتنې ته د جرمني یوشمېر وګړو مخالفت ښودلی دی. د جرمني د کنستانس پوهنتون د کډوالۍ د حقونو استاد ډانیل تیم ویلي، په قانوني توګه په ډلهییز او چټک ډول د مېلیونونه کسانو اېستل شونې نهدي.
هغه څرګنده کړې، چې د هر پناهغوښتونکي وضعیت باید جلا وڅېړل شي او په یوه هېواد کې د امنیتي وضعیت ښه کېدل په خپله د هغه هېواد د ټولو وګړو د استوګنې د حق پای ته رسېدو معنا نهلري. دغه حقوقي کارپوه د ۲.۶ مېلیونه کسانو شمېر هم تر هغه ډېر لوړ بللی، چې په رښتیا یې له جرمني اېستل شونې دي.
د جرمني لپاره الترناتیو ګوند بل غړي ماکسیمیلیان کراه هم تر دې مخکې د کډوالو د اېستلو په اړه د غیرواقعي ژمنو پر وړاندې خبرداری ورکړی و. هغه ویلي و، ان د ۲۰۰زره کسانو بېرته ستنول به هم له دویمې نړۍوالې جګړې وروسته په اروپا کې د دغه ډول تر ټولو لوی عملیات وي.
د جرمني لپاره الترناتیو د دغه هېواد یو ښياړخی افراطي ګوند دی، چې له پراخې کډوالۍ سره مخالفت کوي او د پناه غوښتنې قوانینو سختولو او د کډوالو د اېستلو پراخې څپې غوښتنه کوي.
