د اسلاماباد پولیسو یو وار بیا د سېشنبې په ورځ (د غویي ۲۹مه) هغه مهال اډیاله زندان ته د خېبر پښتونخوا د سر وزیر سهیل اپریدي د ننوتو مخه نیولې، چې غوښتل یې د تحریک انصاف ګوند بنسټګر او د پاکستان له پخواني لومړي وزیر عمران خان سره وګوري.
په هلمند کې د طالبانو امنیې قوماندانۍ خبر ورکړی، د دغه ولایت د خانشین ولسوالۍ په کلا سبز کلي کې د یوې زړې مرمۍ د چاودنې له امله دوه ماشومان وژل شوي او د هغوی مور ټپې شوې ده. د معلوماتو له مخې؛ دغه ماشومانو یاده مرمۍ اور ته غورځولې او چاودنه یې کړې.
د کډوالو ملاتړې ادارې «افغان اېواک» له امریکا غوښتي، چې له افغان متحدینو سره خپلې کړې ژمنې پوره کړي او هغوی له پامه ونه غورځوي. یادې ادارې د سویلي افریقا د کډوالو منلو لپاره د امریکا د چمتووالي په اړه ځینو راپورونو ته په اشارې ویلي: «افغان متحدین یو وار بیا له پامه غورځول کېږي».
د طالبانو د امربالمعروف، نهې عنالمنکر او شکایتونو اورېدو وزارت خبر ورکړی، چې په کابل او لوګر ولایتونو کې یې ۳ کوډګر د کوډو له وسایلو سره یو ځای نیولي دي. د یاد وزارت په وینا؛ نیول شویو ګوډګرو د دم او تعویذ په نومونو د کورنیو ترمنځ نفاق او ستونزې راولاړولې.
د خیبر پښتونخوا د شمالي وزيرستان د دته خېلو سیمې زرګونه کورنۍ د احتمالي پراخو امنيتي عملياتو له وېرې د خپلو مېنو پرېښودو ته اړې شوې دي. ځايي خلک وايي، له تېرو څو ورځو راهيسې په سيمه کې حالت سخت ترينګلی شوی او د کډو د بارېدو لړۍ شپه او ورځ روانه ده.
د کانګو دیموکراتیک جمهوریت په ختیځ کې د اېبولا وبا له امله د مړو شویو کسانو شمېر ۱۳۱ ته لوړ شو. ځایي چارواکو ویلي، چې د یادې وبا له امله په تېرو ۲۴ ساعتونو کې ۲۶ نور شکمن کسان مړه شوي دي. لاتراوسه ۵۴۳ شکمنې او ۳۳ تایید شوې پېښې ثبت شوې او دوه پېښې په یوګانډا کې هم موندل شوې دي.
په کندوز کې د طالبانو د امنیې قوماندانۍ ویاند جمعهالدین خاکسار خبر ورکړی، چې د دغه ولایت په خاناباد لسوالۍ کې د دوو موټرو د ټکر له کبله ۷ کسان ټپیان شوي دي. د هغه په وینا؛ د یادې پېښې ټپيان نږدې روغتون ته لېږدول شوي دي.
د ګډ امنیتي تړون سازمان خبر ورکړی، چې دوی به د شانګهای همکاریو سازمان او د ګډو ګټو خپلواکو هېوادونو ټولنې سره د منځنۍ اسیا د امنیت او د افغانستان د وضعیت په اړه ګډه غونډه جوړه کړي.
د طالبانو تر واک لاندې د ازموينې ملي ادارې ویاند ناصرخان شېرزي خبر ورکړی، چې د ۱۴۰۵کال د عمومي کانکور دويم پړاو ازموينه به سبا پنجشنبه او د جمعې په ورځ د افغانستان په ۱۸ ولايتونو کې ترسره شي.
د چهارشنبې په ورځ (د غویي ۳۰مه) د پاکستان د هوایي ډګرونو ادارې خبر ورکړی، چې د هندي الوتکو پر وړاندې یې د خپل هوایي حریم تړل کېدو موده نوره هم غځولې او (د جون تر ۲۴مې) به دغه بندیز دوام وکړي.
د طالبانو د کور او ښار جوړولو وزارت خبر ورکړی، چې تر دې دمه د افغانستان په بېلابېلو ولایتونو کې پر تازه ستنو شویو ۲۹زره او ۹۲۹ کډوالو استوګنیزې نمرې وېشل شوې او دغه لړۍ په چټکۍ سره روانه ده.
په خېبر پښتونخوا کې د سختو ورښتونو او تندر پرېوتو له امله دوه کسان مړه او ۱۱ نور ټپيان شوي دي او لسګونه کورونه زيانمن شوي دي. ځایي چارواکي وايي، د یادو ورښتونو له کبله په شانګله کې يو ښوونځی هم زيانمن شوی دی.
په بلوچستان کې د طالبانو کونسلګرۍ خبر ورکړی، چې د پاکستان بهرنیو چارو وزارت له استازو سره یې په ناسته کې د لادرکه شویو او بندي افغانانو د وضعیت ارزونې او څار لپاره د رسمي مېکانیزم د جوړېدو غوښتنه کړې.
په ملګرو ملتونو کې د افغانستان د دایمي استازولۍ سرپرست نصیراحمد فایق په ملګرو ملتونو کې د طالبانو د استازي پر موجودیت د یادې ډلې د بهرنیو چار وزیر امیرخان متقي د څرګندونو په غبرګون ویلي، په ملګرو ملتونو کې استازیتوب د هغو دولتونو مشروع حق دی چې له مشروع لارو واک ته رسېدلي دي.
د بلخ د سوداګرۍ او پانګونې خونې مرستیال نصیراحمد سلطان زاده ویلي، چې افغان او ازبک سوداګرو د اقتصادي ودې، کاري فرصتونو رامنځ ته کېدو، د دواړو هېوادونو ترمنځ د سوداګریزو اړیکو د پراختیا په موخه ناستې کړې دي.
تحریک انصاف ګوند او د پاکستان حکومت اپوزېسیون اعلان کړی، چې د جمعې په ورځ به د عمران خان د خلاصون، د لوړو بیو، د سون توکو بیو پر زیاتوالي او د سیاسي بندیانو د خوشې کېدو لپاره په ټول هېواد کې پراخ احتجاجونه وکړي.
د پېښور سترې محکمې یوې دوه کسیزې جرګې پرېکړه کړې، چې له یوې پاکستانۍ مېرمنې سره واده کړي افغان وګړي ته دې د شپږو میاشتو دننه د «پاکستاني اصل» کارت ورکړل شي. محکمې همداراز امر کړی، تر هغه چې دغه کارت نهوي صادر شوی؛ یاد افغان وګړی دې له پاکستان نه نهاېستل کېږي.
د رزمي لوبو افغان لوبغاړي روحید ستانکزي د ازبکستان د ۲۰۲۶کال د اسیا د ځوانانو په رزمي سیالیو کې خپله دویمه لوبه د قرغزستان فردوس ارګاشیف پر وړاندې وګټله. ستانکزي د یادې لوبې په ګټلو سره بل پړاو ته لار وموندله.
د برېتانیا حکومت نږدې ۹زره هغو افغانانو ته چې د برېتانیا د بیا مېشتېدو پروګرام مستحق ګڼل شوي ویلي، چې باید په خپله له افغانستان نه ووځي او درېیم هېواد ته ولاړ شي؛ ځکه حکومت د مستقیمې تخلیې بهیر درولی دی.
د امریکا ولسمشر ډونالډ ټرمپ په سپینه ماڼۍ کې د یوې وینا پر مهال ویلي، چې د ایران پر ضد روانه شخړه به «ډېر ژر» پای ته ورسوي او ټینګار یې کړی چې تهران د یوې هوکړې د ترلاسه کولو لپاره جدي لېوالتیا ښيي.
دملګرو ملتونو د بشري مرستو د همغږۍ دفتر (اوچا) ویلي، چې د افغانستان په زیانمنو سیمو کې د دوامدار ملاتړ او بشري مرستو لپاره بېړنۍ اړتیا موجوده ده.