د طالبانو د اطلاعاتو او فرهنګ وزارت د فرهنګ او هنر معیین د اسلامي همکاریو سازمان د بشري مرستو د چارو له مرستیال خلیل ابراهیم اوکور سره په لیدنه کې د افغانستان د تاریخي اثارو د ساتنې، درېبعدي ډیجیټلي ثبت او د فرهنګي بنسټونو د عصري کولو په اړه خبرې کړې دي.
د طالبانو د کور او ښار جوړولو وزارت په ننګرهار کې د ملاهبت الله د کډوالو ښارګوټي د څلورو فازونو اړوند پلانونه تایید او لاسلیک کړي دي. د دغه وزارت په وینا په یاد ښارګوټي کې تر ۲۵ زره ډېرې استوګنیزې نومرې ځانګړې شوې دي چې د راستنېدونکو کډوالو پر کورنیو وېشل کېږي.
د هلمند د مرکز لښکرګاه یو شمېر اوسېدونکو د هلمند امنیه قوماندانۍ ته څېرمه د شنې ساحې د غصبولو امله د طالبانو د مخابراتو وزیر ملا عبدالاحد فضلي خلاف د ملاهبت الله دفتر ته عریضه کړې ده. ددې عریضې یوه کاپي افغانستان انټرنشنل ته هم رسېدلې ده.
په اتریش کې د ۲۰۲۶ کال په لومړۍ ربع کې د بهرنیو وګړو د تابعیت ترلاسه کولو شمېر د تېر کال په پرتله شاوخوا ۲۱سلنه زیات شوی. سږ کال ۴۲۰ افغانانو د اتریش تابعیت ترلاسه کړی دی.
د طالبانو د کابل ښاروالۍ استازی نعمت الله بارکزی وایي، د کابل ښار په حضوري چمن سیمه کې د نجات څلی به، چې د هوايي پله د جوړېدو پروژې له امله ړنګ شوی، په نوې بڼه بیا ورغول شي.
د ملګرو ملتونو د کډوالو کمشنرۍ د معلوماتو له مخې، تاجکستان په ۲۰۲۶ کال کې لږ تر لږه ۸۲۴ تنه او ترکیې ۱۳ زره او ۵۰۰افغان وګړي افغانستان ته اخراج کړي دي. له ایران نه څه باندې ۱۷۳ زره او له پاکستان نه څه باندې ۵۳ زره تنه افغان کډوال اېستل شوي دي.
د امرالله صالح په مشرۍ زرغون بهیر اعلان وکړ چې د دوشنبې په ورځ یې د غور ولایت په مرکز فیروزکوه ښار کې د طالبانو د جلب او جذب پر مرکز برید کړی دی. زرغون بهیر ویلي چې ځواکونو یې د طالبانو د مرکزي دفتر په ودانۍ کې چاودیدونکي توکي ځای پر ځای کړي وو او بیا یې چاودنه ورکړې ده.
د طالبانو د کورنیو چارو وزارت د نشه يي توکو پر وړاندې د مبارزې معیین عبدالرحمان منیر په کابل کې د ملګرو ملتونو د نشه يي توکو او جرمونو ضد دفتر له سرپرست اردراغلي سره په کتنه کې د دوه اړخیزې همغږۍ پر پیاوړتیا خبرې کړې دي.
هند اعلان کړی، چې د تابعیت د اصلاح شوي قانون له مخې له افغانستان، پاکستان او بنګلهدېش نه د هند تابعیت غوښتونکي باید د خپلو اوسنیو یا پایته رسېدلو پاسپورټونو بشپړ معلومات دوی ته وړاندې کړي.
په کندهار کې یوشمېر یوټیوب چلوونکي او د خواله رسنیو فعالان وایي، چې د طالبانو د امر بالمعروف ریاست له لوري یو ځل بیا د ویډیو جوړولو او خپرولو پر فعالیتونو محدودیتونه لګېدلي دي. یوشمېر یوټیوب چلوونکي د طالبانو د امربالمعروف ادارې ته هم غوښتل شوي او په دې اړوند ګواښ هم ورته شوی.
د ایران د حکومت ویاندې فاطمه مهاجراني ویلي، حکومت د انټرنېټ د لاسرسي محدودولو پلوی نهدی او هڅه کوي چې د مشرتابه لارښوونو او شته ملاحظاتو ته په پام د انټرنېټ ستونزو د حل لارې چارې ومومي.
یو افغان چې دامهال په ترکیه کې پر مالدارۍ بوخت دی وایي، د بېروزګارۍ له امله اړ شوی چې افغانستان پرېږدي او کډوالۍ ته مخه کړي. دغه ځوان ویلي، ۱۶کاله یې زدهکړې کړې او هیلهمن و چې خپل هېواد ته به د یوه لوستي ځوان په توګه خدمت وکړي؛ خو اوس د بېکارۍ له امله مالداري کوي.
ځایي سرچینې وايي، د کندهار ولایت د ډنډ ولسوالۍ په کلمتر سیمه کې ناپېژاندو وسلهوالو تېره شپه یو قومي مشر په ډزو وژلی دی. وژل شوی قومي مشر حاجي احمدشاه خان ادوزی نومېده او په سیمه کې به یې په ناستو او قومي جرګو کې هم برخه اخیسته.
بيبيسي په یوه راپور کې په غور ولایت کې د پراخې بېوزلۍ او بېکارۍ د روان وضعیت په اړه لیکلي، چې افغان کورنۍ د سختې مجبورۍ له امله د خپلو لګښتونو برابرولو لپاره د خپلو ماشومانو د پلورلو په ګډون سختو انتخابونو ته اړ اېستل کېږي.
نیویارک ټایمز راپور ورکړی، چې ایران د لنډمهالي اوربند له فرصت څخه ګټه پورته کړې؛ ترڅو د جګړې پرمهال په نښه شویو د لسګونه بالستیک توغندیو ځایونه پرانیزي.
د طالبانو تر واک لاندې د المپیک، بدني روزنې او سپورټ ریاست وایي، افغان لوبغاړي محمد قاسمي د اسیايي رزمي لوبو په سیالیو کې د خپل هندي سیال په ماتولو سره د برونزو مډال ګټلی دی.
د افغانستان د ملي موزیم د بیارغونې څانګې مشر یحیی محبزاده وايي، تېر کال شاوخوا ۲۱زره کسانو له یادې ادارې څخه لیدنه کړې چې نږدې ۶زره او ۷۵۰ یې بهرنيان وو. هغه ویلي: «له نېکه مرغه د تېرو کلونو پرتله د سېلانیانو شمېر زیات شوی دی».
د طالبانو د رسنیو مرکز خبر ورکړی، چې د یادې ډلې د ریاستالوزرا د دفتر رییس ملا عبدالواسع له یوه چینایي پانګهوال وانګ بن چاینګ سره کتلي دي. په خپرې شوې خبرپاڼه کې د دغه پانګهوال په حواله راغلي، چې په افغانستان کې د طبیعي زېرمو او بېلابېلو اقتصادي برخو کې پانګونې ته لېواله دی.
د طالبانو روغتیا وزیر نور جلال جلالي د پولیو لیګاسي چلنج له اجراييوي غړو، تمویلوونکو او بورډ له مشرانو سره په انلاین ناسته کې د روغتیايي سیسټم د اوږدمهاله پیاوړتیا په اړه خبرې کړې. هغه د واکسیناسیون د منظم ترسره کېدو او روغتیايي کارکوونکو د ظرفیت لوړونې پر اهمیت هم ټينګار کړی.
په کندهار کې د طالبانو د امر بالمعروف، نهې عنالمنکر او شکايتونو اورېدو رياست خبر ورکړی، چې د دغه ولايت په مرکز کې یې ۹ کوډګر نيولي دي. د یاد ریاست په وینا؛ نیول شویو کسانو پر خپلو کړنو اعتراف کړی او د «شرعي پرېکړې» په موخه عدلي او قضايي ارګانونو ته سپارل شوي دي.
د طالبانو د کرنې، اوبو لګولو او مالدارۍ وزارت وایي، افغانستان د شاتو د تولید په برخه کې د پام وړ پرمختګ کړی او دا مهال د هېواد په کچه ۳زره او ۲۰۰ د شاتو تولید فارمونه فعالیت لري چې په کلني ډول شاوخوا ۲زره او ۲۰۰ مټریک ټُنه شات تولیدوي.