د کوېټ د بهرنیو چارو وزارت پر سعودي عربستان د یمن یاغیانو وروستي توغندیز او ډرون بریدونه په کلکه غندلي او دا کړنه یې د دغه هېواد د ملي حاکمیت او نړیوالو قوانینو ښکاره نقض بللی دی. د کوېټ حکومت د دغو بریدونو په غبرګون کې له سعودي عربستان سره د بشپړ یووالي او همکارۍ اعلان کړی دی.
د طالبانو د کلیو، بیارغونې او پراختیا وزیر عبداللطیف منصور ادعا کړې، چې نړیواله ټولنه په افغانستان کې د ښځو ازادي او د نجونو زدهکړې یوازې د یوې «معمولي پلمې» په توګه کاروي او له همدې امله د دوی حکومت په رسمیت نهپېژني.
د امریکا بهرنیو چارو وزارت په منځني ختیځ کې د کړکېچ د زیاتېدو له امله په دغې سیمه کې مېشتو او همداراز یادې سیمې ته د سفر کوونکو امریکایي وګړو لپاره د سفر جدي خبرداری خپور کړی دی. واشنګټن له خپلو ټولو وګړو غوښتي، چې په سیمه کې له خورا ډېر احتیاط څخه کار واخلي.
د پاکستان پوځ وايي، چي د بلوچستان په کلات ولسوالۍ کې د وسلهوالو له یوه مرکز څخه ۲۳ برمته شوي کسان ازاد کړي دي. د سرچینې په وینا، د دغو برمته شویو کسانو د ازادولو پر مهال په نښته کې ۵ وسلهوال هم وژل شوي دي. پوځ د ازاد شویو کسانو د هویت په تړاو څه نهدي ویلي.
د اسلامي همکاریو سازمان وایي، د ملګرو ملتونو د عمومي غونډې د ۸۱مې ناستې په څنډه کې به د افغانستان په اړه د دغه سازمان د تماس ډلې غونډه هم په نیویارک کې ترسره شي. خو د اسلامي همکاریو سازمان تر اوسه د افغانستان په اړه د تماس ډلې د دغې غونډې د جوړېدو کره نېټه نهده په ډاګه کړې.
د هالیووډ وتلې فلمي ستورې او د بشري حقونو فعالې انجلینا جولي او د نوبل د سولې جایزې ګټونکې ملالې یوسفزۍ په نیویارک کې د افغان ښځو په انځوریز نندارتون کې په ګډون سره یو ځل بیا له افغان ښځو خپل ملاتړ اعلان کړ.
امريکايي رسنۍ «میډیا لاين» په یوه راپور کې ویلي، ايران کې د جګړې خطر، د بېساري اقتصادي فشارونو زیاتوالی او د ژوند د لګښتونو لوړېدل د دې لامل شوي چې سلګونه زره افغان کډوال بېرته خپل هېواد ته ستانه شي. راپور کاږي، دغه کړکېچ افغان کډوال بېرته بېکارۍ او د طالبانو واکمنۍ ته ستنوي.
د پاکستان په سنا کې د اپوزېسیون مشر علامه راجا ناصر عباس د کورنیو چارو له وزیر مُحسن نقوي سره په لیدنه کې ویلي، چې د سپټمبر په ۲۷مه د تحریک انصاف د اوږد لاریون د ځنډولو پرېکړه یوازې د دغه ګوند بنسټګر عمران خان کولای شي.
ایټالیا کې د افغانستان د تېر جمهوري نظام سفارت کابل او کندهار ته د ترکیې د استخباراتو د مشر او د قطر د لوړپوړو امنیتي چارواکو پر وروستیو سفرونو او د هغو پر احتمالي پایلو سخته اندېښنه ښودلې ده. دغو پلاوو تېره اونۍ افغانستان ته سفر کړی او له بېلابېلو طالب چارواکو سره یې کتلي وو.
د افغانستان د کرېکټ د ملي لوبډلې پخواني لوبډلمشر راشد خان ویلي، د کرېکټ بورډ لهخوا د شل اوریزو سیالیو له کپتانۍ څخه د ده له لرې کېدو وړاندې ورته هېڅ معلومات نهوو ورکړل شوي. نوموړی وایي، یوازې هغه وخت د کپتانۍ له بدلون څخه خبر شو چې کرېکټ بورډ په رسمي ډول دا پرېکړه اعلان کړه.
د طالبانو د اقتصاد وزارت مسلکي مرستیال عبداللطیف نظري چین د افغانستان د سیاسي، اقتصادي او صنعتي پرمختګ لپاره یو غوره ماډل بللی دی. نوموړی وايي، افغانستان په علمي او ټکنالوژیکي برخو کې د چین د پرمختګونو اړوند تجربې په خپل هېواد کې پلي کولای شي.
د کندوز لپاره د طالبانو والي نصرالله مطیع د یو شمېر نړیوالو مرستندویو بنسټونو له استازو سره په لیدنه کې ویلي، چې د «اسلامي او افغاني ارزښتونو» په پام کې نیولو سره، له بشري مرستو ملاتړ کوي. تر دې مخکې ګڼو مرستندویانو په خپلو چارو کې د طالبانو له لاسوهنو شکایت کړی دی.
د ترکیې د بهرنیو چارو وزیر هاکان فیدان وویل، د یمن د یاغیانو له بریدونو وروسته کېدای شي سعودي عربستان په ځینو تخنیکي برخو کې نظامي اړتیاوې ولري او ترکیه د «مکې دفاعي اېتلاف» په چوکاټ کې له سعودي عربستان او پاکستان سره د دې اړتیاوو د پوره کولو لپاره هېڅ ستونزه نهلري.
د طالبانو تر ادارې لاندې د المپیک، بدني روزنې او سپورټ ریاست په کابل کې د ۲۶۰ ورزشکارانو ترمنځ د «کابل نخبګانو» په نوم د سوک وهنې د لومړي پړاو سیالیو له پیلېدو خبر ورکړی دی.
د بلخ ولایت لپاره د طالبانو امنیه قوماندانۍ وايي، چي د مزارشریف- کابل پر لویه لاره د دوو کرولا موټرو د ټکر له امله یو کس مړ شوی او ۱۱ نور ټپیان شوي دي.
د دعوت خصوصي پوهنتون د رهبرۍ شورا غړي حبیبالرحمان سیاف د طالبانو له لوري د دغه پوهنتون نیول او د نوي پلاوي ټاکل په کلکه غندلي او دا کار یې پر علمي او قانوني حقونو ښکاره تېری بللی دی. تر دې مخکې ندا محمد ندیم د دغه پوهنتون مسوولین له دندو ګوښه او نوي کسان یې پر ځای ګومارلي دي.
د طالبانو د المپيک، بدني روزنې او سپورټ اداره وايي، ۳۴ افغان ورزشکاران په جاپان کې د اسیايي المپیک ۲۰م پړاو سیالیو کې د ګډون لپاره دغه هېواد ته رسېدلي دي. په دغو سیالیو کې له ۴۵ اسیایي هېوادونو او سیمو څخه څه باندې ۱۱ زرو ورزشکارانو ګډون کړی دی.
د طالبانو کورنیو چارو وزارت وايي، په تخار کې یې په دوو عملیاتو کې ۵۴۳ کیلوګرامه نشهيي توکي کشف او ترلاسه کړي دي. د دغه وزارت په وینا، د دغو توکو د لېږد په تړاو ۹ کسان هم نیول شوي دي.
په افغانستان کې د بېوزلۍ او اقتصادي ناورین د شدت له راپورونو سره هممهاله؛ د طالبانو امربالمعروف او نهې عنالمنکر وزارت په بلخ او فراه کې د دوو ماشومانو د پلور له مخنیوي خبر ورکړی دی. د دغو ماشومونه عمرونه ۴ میاشتې او همداراز ۹ کاله ښودل شوي دي.
د طالبانو د کانونو او پټرولیم وزارت وايي، چې د افغانستان د کانونو کورنی او نړیوال ننداراتون به د روان کال د لړم میاشتې له ۶مې تر نهمې نېټې جوړ شي. د دغه وزارت ویاند وایي، چې دغه نندارتون د باختر درخشان شرکت په همکارۍ جوړېږي.
د بدخشان د مرکز فیضاباد سیمه ییزې سرچینې او اوسېدونکي وایي، طالبانو د خپلو مخالفو ډلو د بریدونو له زیاتېدو وروسته، پر ښار د بېپيلوټه الوتکو ګزمې زیاتې کړې دي. د فیضاباد اوسېدونکي وایي، بېپيلوټه الوتکې شپه او ورځ د ښار پر بېلابېلو برخو ګزمې کوي.