په کندهار کې د طالبانو د کرنې، اوبو لګولو او مالدارۍ ریاست خبر ورکړی، چې په لوړ میوند او ارغنداب ولسوالیو کې یې د ۴۰ جریبه دولتي ځمکې د غصب مخه نیولې ده. دغه ریاست په دې تړاو د کوم کس د نیولو په اړه بیا څه نهدي ویلي.
د طالبانو د کډوالو ستونزو ته د رسېدنې کمېسیون خبر ورکړی، چې د یکشنبې په ورځ له پاکستان او ایران نه ۳۰۸ کډوالې کورنۍ افغانستان ته ستنې شوې دي. یاد کمېسیون ویلي، چې دغه کورنۍ له هرات، نیمروز، کندهار او ننګرهار له لارو ستنې شوې دي.
د اسراییل ۱۲ شبکې راپور ورکړی، د دغه هېواد امنیتي چارواکو امریکا ته خبرداری ورکړی چې ایران ښايي د اټومي وسلو په اړه محدود نرمښت وښيي؛ خو د توغندیزو وړتیاوو او د سیمهییزو نیابتي ځواکونو له پروګرام څخه به شاتګ ونه کړي.
له «پولیو پاک افغانستان» سازمان وايي، چې نن دوشنبه (د سلواغې ۱۳مه) به د افغانستان په بېلابېلو ولایتونو کې د ګوزڼ ضد واکسینو کمپاین پیل شي. دغه سازمان د افغانستان له خلکو غواړي، خپل ماشومان واکسین کړي چې له ګوزڼ څخه وژغورل شي.
په تخار کې د طالبانو د کرنې، اوبو لګولو او مالدارۍ ریاست ویلي، د دغه ولایت په بنګي، ورسج، ینګي کلا او چال ولسوالیو کې د سبو د تولید او د کاري زمینو د برابرولو لپاره ۵۵ نوې شنې خونې جوړې شوې چې د بزګرانو اقتصادي بیاوړتیا کې به مرسته وکړي.
د پاکستان د الوګانو بازار د زیات تولید او له افغانستان سره د سوداګریزې راکړې ورکړې بندېدو له امله سخت زیانمن شوی او بیې یې په چټکۍ سره کمې شوې دي. اقتصادي شنونکي دغه وضعیت د کرنې په برخه کې د پاکستان حکومت د ناسم پلان او کمزورې پالیسۍ پایله بولي.
د فلسطین روغتیا وزارت خبر ورکړی، چې د اکټوبر له لسمې نېټې د اوربند له پیل راهیسې تر اوسه پر غزې د اسراییل په بریدونو کې لږترلږه ۵۲۳ فلسطینیان وژل شوي او ۱۴۴۳ نور بیا ټپیان شوي دي. د راپور له مخې؛ یوازې د اکټوبر په ۱۹مې او ۲۹مې نېټې بریدونو کې ټولټال ۱۵۴ کسان وژل شوي دي.
ایراني چارواکي وایي، د ایران، افغانستان او چین ترمنځ د درېاړخیزې سوداګریزې، صنعتي ازادې سیمې د جوړېدو طرحه چې مرکز یې د سوېلي خراسان ولایت ټاکل شوی؛ کولای شي د ایران ختیځ د سیمې په یوه مهم ترانزیتي مرکز بدل کړي.
یو ډیموکراټ نوماند په پراخ توپیر سره وتوانېده، د امریکا د ټېکساس په ایالتي ټاکنو کې د سنا مجلس لپاره د جمهوريپال ګوند هغه نوماند ته ماتې ورکړي چې د ډونالډ ټرمپ له ملاتړه برخمن و. دا په تېرو څو لسیزو کې لومړی ځل دی، چې دغه څوکۍ د یوه ډیموکرات په برخه کېږي.
د هند حکومت د راتلونکي مالي کال بودجه کې له یو شمېر ګاونډیو هېوادونو سره خپلې پراختیایي مرستې زیاتې کړې دي. هندي رسنیو راپور ورکړی، چې په دې لړ کې د افغانستان، منګولیا، نیپال او سریلانکا په څېر هېوادونو ته ځانګړې شوې بودجه د پام وړ پراخه شوې ده.
افغان سوک وهونکي قیس خادمي د مکسیکو «مارګاریتو پرز امادور» ته ماتې ورکړه. دغه سیالي د WBM (Warren Boxing Management) سازمان لهخوا د لندن په یارک هال کې په شپږو پړاوونو کې ترسره شوه. خادمي د لوبڅارانو د ګډې پرېکړې له مخې وتوانېده، چې بریا خپله کړي.
د بلوڅ ازادۍ پوځ وړمه ورځ (شنبه د سلواغې ۱۱مه) پر یوه وخت د بلوچستان پر کوټه، سیبۍ، نوشکي، چین او نورو سیمو پراخ بریدونه وکړل. لومړی برید ځانمرګی برید وو، چې د بلوچستان په نوشکي کې د پاکستان د ایاېسای پر مرکز وشو. سرچینې افغانستان انټرنشنل ته وايي، دغه بریدګره «ښځه» وه.
په برېتانیا کې د ټېمز ولي سیمې پولیسو د یکشنبې په ورځ اعلان وکړ، چې د نجیبالله عرب په نوم یې یو ۳۹ کلن افغان د دوو ښځو د تښتونې، جنسي تېري او جنسي ځورونې په تور نیولی دی.
د اسلامي همکاریو سازمان عمومي سرمنشي په قاهره کې د ښځو د حقونو د پیاوړتیا په اړه په یوه نړۍوال کنفرانس کې وویل، چې د ښځو پیاوړتیا د هېوادونو لپاره د دوامدار پرمختګ ستنه ده. حسین ابراهیم طه زیاته کړه، چې دین باید د ښځو د حقونو د ملاتړ لپاره وکارول شي.
د ۲۰۲۶ کال د ۱۹ کلنو کرېکټ نړۍوال جام کې د افغانستان د ۱۹ کلنو کمعمره ملي لوبډله د هند د کرېکټ لوبډلې پر وړاندې لوبېږي.
د تېر جمهوري نظام د دفاع وزارت سرپرست شاه محمود میاخېل له افغانستان انټرنشنل- پښتو سره په ځانګړې مرکه کې وايي، له دین څخه د طالبانو تعبیر او تفسیر د نورو اسلامي هېوادونو او علماوو له تعبیر او تفسیر سره فرق لري. هغه وايي، د طالبانو «اصولنامه» د قدرت د تحکیمولو لپاره ده.
امریکایي سناتور لینډسي ګراهام له فاکسنیوز سره په خبرو کې ویلي، په منځني ختیځ کې واقعي سوله هغه وخت پیلېږي چې د ایران رژیم نسکور شي. هغه په ایران کې روانو اعتراضونو ته په اشارې سره زیاته کړې، چې د ایران خلک د غوره ژوند لپاره سړکونو ته راوتلي او د نړۍوالې ټولنې د ملاتړ مستحق دي.
د امریکا د بهرنیو چارو پخواني وزیر مایک پمپیو د اسراییل ۱۳چینل سره مرکه کې د امریکا او ایران ترمنځ د مذاکراتو په اړه ویلي: «زه د یوې رښتینې هوکړې لپاره هېڅ چانس نه وینم. هغوی ښايي پر ځینو مسایلو هوکړه وکړي، خو په ټوله کې یې له دې وړاندې هر ډول هوکړه ماته کړې ده».
په روسیه کې د طالبانو سفیر ګل حسن د روسیې ټاس خبري اژانس ته ویلي، چې د افغانستان او روسیې ترمنځ به د مستقیمو الوتنو شمېر زیات شي. نوموړي ویلي، چې د اریانا هوايي شرکت د اونیزې الوتنې ترڅنګ به ډېر ژر کام ایر هم مسکو ته مستقیمې الوتنې پیل کړي.
په داسې حال کې چې امریکا په سیمه کې خپل پوځي حضور پراخ کړی، ترکیه، مصر او قطر هڅه کوي چې د ایران د بهرنیو چارو وزیر عباس عراقچي او د ټرمپ د ځانګړي استازي سټیو ویټکاف ترمنځ په انقره کې د مخامخ لیدنې زمینه برابره کړي.
په ناټو کې د امریکا سفیر فاکسنیوز ته ویلي، چې د کړکېچ کمولو توپ اوس د ایران په میدان کې دی او د ټرمپ صبر هم په ختمېدو دی. نوموړي ټینګار وکړ، چې د ایران ساحلونو ته د امریکا د سمندري بېړیو ځای پر ځای کول یوازې د ځواک ښودنه ده او ټرمپ د ایران د بېثباته کولو نیت نه لري.