د بشري حقونو یو شمېر سازمانونو د ملګرو ملتونو د بشري حقونو له شورا غوښتي چې د افغانستان لپاره د ځانګړي راپور ورکوونکي ماموریت په بشپړه توګه تمدید کړي او د افغان ښځو او نجونو د حقونو په اړه ځانګړي راپورونه او بحثونه دې همداسې دوام ومومي.
ایراني چارواکو ویلي، حسین پدران یې د اسراییلو د استخباراتي ادارې «موساد» لپاره د جاسوسۍ په تور اعدام کړی دی. د ایران د چارواکو په وینا، نوموړی په اصفهان ولایت کې د توغندیزو مرکزونو په اړه حساس معلومات موساد ته رسول.
د محمود خان اڅکزي په مشرۍ د پاکستان د اپوزیسیون ایتلاف پرېکړه کړې چې د هېواد د روان سیاسي او اقتصادي بحران د هواري لپاره د ټولو سیاسي ګوندونو کنفرانس جوړ کړي.
د طالبانو تر واک لاندې د دولتي شرکتونو عمومي ریاست وایي، چې د ازبکستان په ترمذ ښار کې د افغانستان او ازبکستان د سپکو صنایعو د تولیداتو لومړنی ګډ نندارتون جوړ شوی چې پکې د افغانستان د شمال د ډبرو سکرو دولتي شرکت په ګډون، لسګونو افغان شرکتونو خپل تولیدات نندارې ته وړاندې کړي دي.
د خیبر پښتونخوا حکومت د پاکستان تحریک انصاف ګوند د راتلونکي لاریون لپاره د دولتي وسایلو، موټرو او مالي سرچینو پر کارولو رسمي بندیز لګولی دی. د دغه ایالت یو چارواکي شهاب علي شاه ټولو چارواکو ته لارښوونه کړې چې اسلاماباد ته د لاریونوالو د تګ لپاره له دولتي امکاناتو کار وانخلي.
د طالبانو د حکومت د اقتصادي چارو سرپرست ملا عبدالغني برادر اخوند په بلخ کې د مفید تولیدي شرکت د لیدنې پر مهال ټینګار کړی چې د تولید کچه باید لوړه، د محصولاتو کیفیت ښه او ټاکل شوي معیارونه په بشپړه توګه رعایت شي.
ملګرو ملتونو نوی انلاین پلېټفارم جوړ کړی چې د دغه سازمان د ۲۶ ادارو نږدې ۴۴ میلیونه معلوماتي شمېرې په یوه ځای کې راټولوي. د «ملګرو ملتونو د معلوماتو ګډ پلېټفارم» په نوم دغه سیستم د بېلابېلو برخو معلوماتو ته د لاسرسي لپاره جوړ شوی دی.
د خیبر پښتونخوا په کوهاټ کې د پولیسو پر مرکز د پرونۍ ځانمرګې حملې وروسته، د امنیتي ځواکونو او په ودانۍ کې د پټو وسله والو ترمنځ نښته لا هم روانه ده. د پېښور د پولیسو د یوې سرچینې په وینا، په برید کې لږ تر لږه ۲۳ کسان وژل شوي او تر ۸۰ ډېر ټپیان دي چې ۱۸ وژل شوي کسان پولیس دي.
د طالبانو د بهرنیو چارو وزارت ویاند عبدالقهار بلخي د خیبر پښتونخوا د کوهاټ پر یوه جومات د جمعې د لمانځه پر مهال شوی برید غندلی او د قربانیانو له کورنیو سره یې خواخوږي څرګنده کړې ده.
د پاکستان د پنجاب د کورنیو چارو ادارې ویلي، تر اوسه له دغه ایالته ۱۴۲ زره او ۸۲۰ افغان وګړي افغانستان ته ستانه شوي دي او د هغو افغانانو د پېژندلو او ستنولو عملیات لا هم روان دي چې قانوني ویزې نه لري.
د طالبانو تر واک لاندې د برېښنا شرکت خبر ورکړی، چې د دغه شرکت عمومي ریس عبدالحق همکار د ترکمنستان د «ټي ایې پي» پروژې له مشر مراد ارتیکوف او د هغه له مل پلاوي سره په کابل کې د ۵۰۰ کیلوولټه برېښنا لېږد پروژې د چارو پر پرمختګ او د دغې پروژې د ژر پلي کېدو پر څرنګوالي خبرې کړې دي.
د ننګرهار په بهسودو ولسوالۍ کې د والیبال د ۲۴ لوبډلو ترمنځ ۱۵ ورځنۍ سیالۍ د شګې لوبډلې په اتلولۍ پای ته ورسېدې. د پایلوبې په لوبه کې د شګې لوبډلې د تعمیراتو لوبډلې ته ۳-۱ ماتې ورکړه او د سیالیو اتلولي یې خپله کړه.
د پاکستان د بلوچستان ایالت په کوټه، پنجګور، خضدار او نوشکي سیمو کې په بېلابېلو امنیتي پېښو کې لږ تر لږه ۱۰ کسان وژل شوي دي. پولیس وايي، په پېښو کې د چاودنې، ډزو او د مرمیو په لګېدو د وژل شویو کسانو جسدونه موندل شوي دي.
په کاپیسا کې د طالبانو د کرنې، اوبو لګولو او مالدارۍ ریاست وایي چې سږ کال په دغه ولایت کې د ځڼغوزیو حاصلات د تېر کال په پرتله ۴۰ سلنه زیات شوي دي.
د امریکا ولسمشر ډونالډ ټرمپ پلان لري چې د چین ولسمشر شي جینپینګ واشنګټن ته د راتلونکې اوونۍ د سفر پر مهال د اندروز ګډې پوځي اډې په هوايي ډګر کې پخپله هرکلی وکړي. د امریکايي چارواکو په وینا، د یوه بهرني مشر هرکلي لپاره د امریکا د ولسمشر هوايي ډګر ته تلل نادر اقدام دی.
شمالي کوریا وايي، د اټومي وسلو د ساتلو په اړه یې دریځ بېرته نه بدلېدونکی دی او هېڅ ډول نړیوال فشار به دغه هېواد اړ نه کړي چې له خپلو اټومي وسلو لاس واخلي.
د کډوالۍ نړیوال سازمان د بېځایه کېدو د څارنې د تازه راپور له مخې، د اګست له ۳۰مې د سپټمبر تر ۱۲مې افغانستان ته له ایران او پاکستانه د ۱۰۲ زره او ۹۰۳ تګ راتګ ثبتېدو په مقابل کې، له افغانستانه د وتلو ۴۱ زره او ۹۵۸ تګ راتګ ثبت شوی دی.
د بشري حقونو څار سازمان وايي، په ترکیه کې د نرښځیانو د حقونو د سازمانونو او فعالانو پر وړاندې د حکومت وروستي اقدامات د قانون حاکمیت او بنسټیزو حقونو ته ګواښ دی. دغه سازمان وايي، د ترکیې پولیسو په بېلابېلو ښارونو کې ۱۱۲ کسان نیولي چې لږ تر لږه ۲۴ فعالان او یو خبریال پکې شامل دي.
د روغتیا نړیوال سازمان وايي، د ماشومانو د سرطان ژر تشخیص او پر وخت درملنه د ژوند ژغورلو لپاره حیاتي ده. په داسې حال کې چې افغانستان لا هم د سرطان د تشخیص او تخصصي درملنې له محدود لاسرسي سره مخ دی.
د امریکا ولسمشر ډونالډ ټرمپ هغه فرمان د یوه بل کال لپاره هم غځولی چې له مخې یې د بهرنیو مسلکي کارکوونکو لپاره د امریکا د کار ویزې د ترلاسه کولو پر مهال د ۱۰۰ زره ډالرو فیس اخیستل کېږي.
د ملګرو ملتونو د جینوا دفتر وايي، د فساد د افشا کوونکو او څېړنیزو خبریالانو خونديتوب د روڼتیا او اداري بشپړتیا لپاره حیاتي دی. دا څرګندونې داسې مهال کیږي چې په افغانستان کې د طالبانو له بیا واکمنېدو وروسته د رسنیو پر فعالیتونو محدودیتونه او معلوماتو ته د لاسرسي لا هم دوام لري.