د طالبانو د کانونو او پټرولیم وزیر هدایتالله بدري په هرات کې د سمنټو پروژې له روانو چارو د لیدنې پرمهال د یادې پروژې د چارو پر چټکتیا ټینګار وکړ. نوموړي اړوندو مسوولینو ته لارښوونه وکړه، چې د تړون له ژمنو سره سم کارونه لا ګړندي او پر وخت یې ترسره کړي.
په قطر کې د طالبانو سفیر سهیل شاهین د قطر د ښاروالۍ له وزیر عبدالله بن حمد بن عبدالله العطیه سره په کتنه کې د کابل او دوحې د ښاروالیو تر منځ د ګډو همکاریو پر پراختیا خبرې کړې دي.
د امریکا او اسراییل جګپوړو جنرالانو له ایران سره د زیاتېدونکو ترینګلتیاوو تر سیوري لاندې خبرې اترې کړې دي. چارواکو د امریکا د ګډو ځواکونو د لوی درستیز جنرال ډان کین او د اسراییل د وسلهوالو ځواکونو د لوی درستیز ایال زمیر ترمنځ د تړلو دروازو تر شا د خبرو جزییات نه دي څرګند کړي.
د اوکراین د دنیپروپېتروفسک ولایت ځایي چارواکي وایي، د روسیې د یوې بېپيلوټه الوتکې په برید کې، چې د مسافرو له یوه بس سره نږدې شوی، لږ تر لږه ۱۲کسان وژل شوي او اووه نور ټپیان دي.
د پاکستان حکومت اعلان وکړ، چې د دغه هېواد د کرېکټ ملي لوبډلې ته یې د ۲۰۲۶ کال په کرېکټ نړۍوال جام کې د ګډون اجازه ورکړې، خو د پاکستان لوبډله به د هند د کرېکټ لوبډلې سره لوبه ونهکړي.
په کابل کې یو شمېر دولتي مامورینو افغانستان انټرنشنل – پښتو ته ویلي، هغه کمپاین چې پر ټولنیزو شبکو خپور شوی و او پکې ادعا کېده چې ټولو دولتي ادارو ته د معاشونو د ورکړې بهیر پیل شوی، حقیقت نه لري او تر اوسه د طالبانو د مالیې وزارت له خوا دوی ته د جدي میاشتې معاش نه دی ورکړل شوی.
سیمه ییزو سرچینو افغانستان انټرنشنل ته وویل، چې د کندز د امام صاحب ولسوالۍ اړوند په دشت ابدان کې د طالبانو وسله والو درې تنه ملکیان په ډزو وژلي دي. د وژل شویو کسانو کورنۍ وايي، په دشت ابدان کې د څړځای پر سر جنجال روان و، چې د طالبانو غړو پکې مداخله وکړه او درې تنه یې ووژل.
د غزې تړانګې او مصر ترمنځ د رفح دروازه له شاوخوا دوو کلونو وروسته، نن د یکشنبې په ورځ په محدود ډول پرانیستل شوې او یو شمېر فلسطینیان له دې لارې وتلي دي. دا اقدام د امریکا د منځګړیتوب له لارې د اوربند د لومړۍ مرحلې بشپړیدو برخه ګڼل کېږي.
قاري سعید خوستی چې د یوې ښځینه محصلې په جنسي ځورونې تورن دی، په دې وروستیو کې د طالبانو د جهادي اثارو او د سندونو د ثبت ادارې رییس ټاکل شوی دی. هغه پخوا د طالبانو د کورنیو چارو وزارت ویاند او بیا د دې ډلې د اطلاعاتو او کلتور وزارت سلاکار و.
د پاکستان د علماوو شورا مشر طاهر اشرفي وایي چې د پاکستان «دښمنان» په افغانستان کې حضور لري او طالبان یې ملاتړي دي او هڅه کوي دغه هېواد بېثباته کړي. هغه ټینګار کړی، چې اسلامي نړۍ او نړیواله ټولنه باید د اسلاماباد دا اندېښنې جدي وګڼي.
د طالبانو د لوړو زده کړو وزیر د کونړ تخصص جامعې د پرانیستې پرمهال وویل، چې د دې جامعې د جوړیدو هدف د محکمو او دارالافتاء چارو معیاري او مسلکي کول دي. ندیم وویل چې د عصري علومو په څېر په دیني برخو کې هم باید د تخصص پروګرامونه پلي شي.
د خیبر پښتونخوا اعلی وزیر سهیل اپریدي د خیبر امن جرګې ته د وینا پر مهال وویل، چې د خیبر جرګې پرېکړې به د نورو ولسوالیو له خلکو سره شریکې شي او بیا به د خیبر پښتونخوا د پښتنو قومي جرګه راوغوښتل شي او د حکومت د پردې ترشا پرېکړو پر وړاندې به دریږي.
د ملګرو ملتونو د بشري چارو د همغږۍ دفتر «اوچا» خبرداری ورکوي چې د افغانستان دوه پر درېیمې ډېر ولایتونه، چې ۶۷ سلنه کیږي، له وچکالۍ سره مخ دي. اوچا د ۱۶۳ ملیون ډالرو غوښتنه کړې ده، چې په ټول افغانستان کې د شاوخوا ۱۶ میلیونه خلکو لپاره د خوندي اوبو بیړنۍ اړتیا په ګوته کوي.
د هند بهرنیو چارو وزارت د پاکستان هغه څرګندونې چې ګواکې په بلوچستان کې د تېرې ورځې د بریدونو تر شا د نوي ډیلي لاس و، رد کړې او ویې ویل، «دا د پاکستان پخوانۍ تګلاره ده اوغواړي له خپلو کورنیو ناکامیو د خلکو پام واړوي».
د طالبانو د کلیو د بیارغونې او پراختیا وزیر عبداللطیف منصور د موسساتو له استازو سره په ناسته کې هغوی ته په ټولو ولایتونو کې د امنیت ډاډ ور کړی. منصور د متوازن انکشاف ترڅنګ ویلي، چې پراختیايي پروژې باید د خلکو د اړتیاوو پر بنسټ تطبیق شي او مرستې پر ځای ولګول شي.
د روسیې د امنیت شورا مشر سېرګي شویګو بیجنګته رسېدلی، چې د چین د بهرنیو چارو وزیر وانګ یی سره پر امنیتي مسایلو وغږیږي. انټر فاکس خبري اژانس خبر ورکړی، چې «دواړه به د نړیوال او سیمهییز امنیت په برخه کې د بدلونونو په اړه خبرې وکړي».
د اوکراین ولسمشر ولادیمیر زیلینسکي د یکشنبې په ورځ وویل، چې د امریکا په منځګړیتوب د اوکراین او روسیې ترمنځ د درې اړخیزو خبرو اترو نوی پړاو به د فبروري په ۴مه او ۵مه په ابوظبي کې ترسره شي. هغه زیاته کړه، چې کییف د "اصلي بحث" لپاره چمتو دی.
د ملګرو ملتونو د نشهیي توکو او جرمونو پر وړاندې د مبارزې دفتر( یو این او ډي سي)وایي چې په افغانستان کې لا هم دودیز نشهیي توکي تر ټولو ډېر کارېږي، خو ورسره د صنعتي نشهیي توکو او د درملو ناوړه استعمال هم د زیاتېدو په حال کې دی.
په جرمني کې د افغانستان کونسلګرۍ چې اوس یې طالبان اداره کوي، د هغو افغانانو لپاره په ګواښ بدلې شوې، چې له دغه رژیم نه تښتېدلي دي. په جرمني کې د افغان سازمانونو ټولنې (VAFO) ویلي چې دغه کونسلګرۍ د اغیزمنو افغانانو واقعیتونه په پام کې نه نیسي.
د طالبانو د کورنیو چارو وزارت وایي چې په هرات ولایت کې یې د یو لړ کشفي عملیاتو پر مهال ۱۷۰ کیلوګرامه نشه یي توکي نیولي دي.
د طالبانو د ریاست الوزرا اقتصادي مرستیال ملا عبدالغني برادر په هرات کې د ترکمنستان د لومړي وزیر مرستیال او بهرنیو چارو وزیر سره د ټاپي، ریل پټلۍ او برېښنا پروژو په اړه خبرو کې ویلي، چې د سعودي عربستان دلتا انټرنشنل کمپنۍ د ټاپي په پروژه کې پانګونې ته لیوالتیا ښودلې ده.