د طالبانو د کانونو او پټرولیم وزارت د کانونو د تفحص او اکتشاف رييس په مشرۍ پلاوي پنجشېر کې د کانونو چارو د ارزونې په ترڅ کې ویلي،دمګړۍ یوازې د پنجشنېر د ۲ ولسوالیو په کانونو کې څه باندې ۵ زره کارګر پر کار بوخت دي. خو د څارونکو په باور، د کان کېندونکو ساتنې ته هېڅ ډول پام نهکېږي.
د هرات ولایت د سوداګرۍ خونه وایي، چې د هرات د جامو تولیدوونکو د لومړي ځل لپاره عراق ته د ښځو او ماشومانو د ۲۰زره جوړو جامو یوه سوداګریزه جوپه صادره کړې ده.
د امریکا ولسمشر ډونالډ ټرمپ وایي، چې ایران له تېرو ۴۷کلونو راهیسې له امریکا او د نړۍ له نورو هېوادونو سره «لوبې» کړې دي.
د پاکستان د سند ايالت په کراچۍ ښار کې د ښځو لاريون بنسټ (عورت مارچ) د مور نړیوالې ورځې په مناسبت جوړه کړې غونډه کې غوښتنه کړې، چې ښځې دې د برابر انسان په توګه وپېژندل شي او پوره حقونه دې ورکړل شي.
د افغانستان د ازادۍ لپاره د متحده ښځو غورځنګ په یوې اعتراضي ناسته کې ویلي، چې په افغانستان کې د ښځو پر وړاندې پر تاوتریخوالي او جنایتونو چوپتیا، ظلم ته لا اسانتیا او لار برابروي. دوی د ښځو پر وړاندې د تاوتریخوالي د پای ته رسېدو او د ښځو د بشري حقونو د جدي ملاتړ غوښتنه کړې.
افغانې شاعرې او خبریالې شمیم فروتن د ایټالیا په نړیوال ادبي فستیوال «فرانکو لوی» کې د اوولسم پړاو جایزه ګټلې ده. د راپورونو له مخې، د دې ادبي فستیوال ګټونکي په دې وروستیو کې د ګروتاماره په ښار کې وستایل شول.
سرچینو افغانستان انټرنشنل- پښتو ته ویلي، د طلوعنیوز د ۲ خبریالانو د نیول کېدو په تړاو د طلوعنیوز په ټولنیزو شبکو کې د خبر له خپرېدو وروسته، نن موبيګروپ او په ځانګړې توګه طلوعنیوز د طالبانو د استخباراتو له لوري محاصره شو. سرچینې د ورغلو طالب وسلوالو شمېر له ۴۰ تر ۵۰ تنو ښودلی.
د افغانستان د رسنیو ملاتړ سازمان (امسو) ویلي، چې دا مهال لږ تر لږه اته خبریالان د طالبان له لوري په بند کې ساتل کېږي.
د طالبان د ننګرهار ولایت د رسنیو دفتر په یوه خبرپاڼه کې ویلي، چې په دغه ولایت کې د تالنده برېښنا او سخت توپان له امله دوه کسان مړه شوي او درې نور ټپیان دي.
د خیبر د تیرا قومي مشران وايي، چې ددوی په سیمه کې لس نوې پوستې جوړې شوې او شاوخوا دوه کیلومټره ونې، چې مېوه لرونکې ونې پکې شاملې دي، وهل شوې دي. د قومي مشرانو په وینا، د خیبر مرستیال کمشنر ددوی له ۱۴ غوښتنو څخه یوه هم نه ده منلې.
د طالبانو د لوړو زده کړو وزیر ندا محمد ندیم د دغه وزارت د رهبرۍ شورا په غونډه کې له طالب چارواکو غوښتي، چې «یوازې د دندې لپاره اطاعت مه کوئ بلکې د الله رضا لپاره اطاعت کوئ».
د طالبانو د ۲۰۷ الفاروق قول اردو قوماندان له ایران او ترکمنستان سره پر پولو له خپلو سرحدي ځواکونو لیدنه کړې ده. د طالبانو دفاع وزارت وايي، په دې سفر کې د هرات او بادغیس ولایتونو په پولو کې امنیتي وضعیت او د نویو سرحدي پوستو چارې هم ارزول شوې دي.
ایران ویلي چې د جګړې د پای ته رسولو لپاره یې د امریکا د سولې وړاندیز ته خپل ځواب استولی دی. د ایران دولتي خبري اژانس راپور ورکړی چې تهران خپل ځواب پاکستان ته سپارلی، ځکه دغه هېواد د منځګړي رول ترسره کوي.
په کابل کې د طالبانو اړوند سرچینې وايي، ددې ډلې تصفیوي کمېسیون پرېکړه کړې، چې له دې وروسته خپلو جنګیالیو ته د تصفیې فورمه نه ور کوي. د سرچینې په وینا، له دې وروسته د دندې لپاره د تصفې فورمه شرط نه ده خو که د چا په اړه معلومات غوښتل کېږي د طالبانو په رسمي ډېټابېس کې به کتل کېږي.
په کاپیسا کې د طالبانو د امنیه قوماندانۍ ویاند ویلي، چې په تګاب ولسوالۍ کې د سختو ورښتونو له امله د یوه کور چت نړېدلی او د ښځو او ماشومانو په ګډون د یوې کورنۍ څلور غړي پکې مړه شوي دي.
د طالبانو د ریاست الوزرا اداري مرستیال وايي، په تېرو دریو کلونو کې پنځه میلیونه افغانان هېواد ته ستانه شوي او په دې سره د هېواد نفوس ۱۱ سلنه ډېر شوی. نوموړي په لوګر کې راستنېدونکو کډوالو ته د زر استوګنیزو نومرو د وېش په مراسمو کې وویل، چې هره ورځ له ۴ تر ۷زرو افغانان را ستنیږي.
په کابل کې د غلاوو او جنايي پېښو له ډېرېدو سره هممهاله د طالبانو د کابل د والي په مشرۍ امنیتي غونډه شوې ده. د طالبانو امنیتي مسوولانو په کابل کې د جنایي پېښو د مخنیوي او د عامه نظم د ټینګښت لپاره پر ګډ کار ټینګار کړی دی.
د نړیوالو ورځپاڼو د خپروونکو ټولنې (WAN-IFRA) د اعلامیې له مخې، د منځني ختیځ د ډیجیټلي رسنیو د۲۰۲۶ کال سیالیو کې د ایراناینټرنشنل بېلابېلې پروژې بریالۍ اعلان شوې. په دغو پروژو کې «میډیا بات»، د «ښځه، ژوند، ازادي» کمپاین او نورو په بېلابېلو برخو کې جایزې ګټلې.
په کابل کې د پاکستان سفیرعبیدالرحمن نظاماني له طالبانو غوښتنه کړې، چې دده په وینا، «د افغانستان له خاورې راپورته کېدونکو ترهګریزو ګواښونو» پر ضد عملي اقدامات وکړي. هغه دغه څرګندونې له هند سره د پاکستان د جګړې د کال پوره کېدو په مناسبت غونډې ته کړې دي.
په تخار ولایت کې د طالبانو امنیه قوماندانۍ ویلي، چې په تېره یوه میاشت کې یې د یاد ولایت په ۱۶ ولایتونو کې د تاریاکو اړولو کمپاین په ترڅ کې پر ۲۰۰۰ جریبه ځمکه کرل شوي تاریاک له منځه وړي دي.
پر ډیورنډ کرښه له نښتو وروسته د وروستیو هوکړو په اړه له طالبانو د پخواني ولسمشر حامد کرزي پر وضاحت غوښتنې شاوخوا ۲۴ ساعته تېریږي، خو طالبانو تر اوسه هیڅ راز غبرګون نه دی ښودلی. کرزي دغه کړنې ډیورنډ کرښې ته د رسمیت ورکولو په تړاو د پاکستان هڅه بللې.