د بادغیس د قادس ولسوالۍ په شاوخوا سیمو کې د یوه دېوال د نړېدو له امله یو ۳ کلن ماشوم ومړ. د ځايي طالب مسوولینو په وینا، یاد ماشوم د دېوال په شاوخوا کې پر لوبو بوخت وو، چې ناڅاپي دېوال پرې راونړېد او ورسره یې خپل ژوند له لاسه ورکړ.
د اسراییل لومړی وزیر بنیامین نتنیاهو ویلي، چې په ایران کې د حکومت کمزوري کېدل یا سقوط کولی شي په سیمه کې د دغه هېواد د نیابتي ځواکونو د شبکې د پاشل کېدو لامل شي، خو دا بدلون حتمي نه دی.
د طالبانو د امربالمعروف وزارت محتسبینو د کابل ښار له ۵۰ روغتیايي مرکزونو سره په «اصلاحي» کتنو کې هغوی ته خبرداری ورکړی، چې په خپلو مرکزونو له اختلاط څخه ډډه او مخنیوی وکړي. دغه وزارت د یادو روغتیايي مرکزونو د مسوولینو له قوله لیکلي،چې هېڅ چاته به د «غیر شرعي» کړنو اجازه ورنهکړي.
د سوکوهنې افغانه کډواله لوبغاړې فاطمه جعفري د پاکستان د سوکوهنې په څانګه کې د «بلوچستان لپاره سوله» په نوم سیالیو کې د اتلولۍ لقب خپل کړ.
د خيبرپښتونخوا په بنو ولسوالۍ کې د تېرې شپې په وسله وال بريد کې د ۱۵ پاکستاني پوليسو د وژلو وروسته سيمه ييز پوليس مشر (ډي ای جي) سجاد خان ویلي، چې «د وژل شويو هر يوه پوليس په بدل کې به یې لس کسان ووژنو».
نیویارک ټایمز راپور ورکړی، چې د ایران او امریکا ترمنځ د سولې پر طرحې د توافق نهرامنځته کېدو وروسته، د تیلو نړیوالې بیې لوړې شوي او د ونډو د بازار د راتلونکو معاملو ارزښت راټیټ شوی دی.
د هرات ولایت لپاره د طالبانو والي نور احمد اسلامجار له یوه ترکمنستاني پلاوي سره په کتنه کې ویلي، د تور غونډۍ بندر د ۲۴ ساعته کېدو طرحه باید ژر تر ژره عملي شي. طالبانو له پاکستان سره د سوداګرۍ له پرېکون وروسته د منځنۍ اسیا پر هېوادونو او ایران تکیه ډېره کړې ده.
د طالبان قاضي القضات عبدالحکیم حقاني په بلخ کې له امنیتي او ملکي طالب چارواکو سره په غونډه کې ویلي، هېچا ته اجازه نشته چې په خپل سر کوم مجرم ته سزا ورکړي. په داسې حال کې چې هره ورځ په کابل او نورو ولایتونو کې د دغه ډلې د وسله والو له لوري د خپل سري نیونو او سزاوو راپورونه خپرېږي.
په افغانستان کې د ملګرو ملتونو د مرستندویه پلاوي دفتر (یوناما) د مور نړیوالې ورځې په مناسبت په افغانستان او نړۍ کې د میندو د رول ستاینه کړې او ویلي یې دي چې د سوله ییزو ټولنو په رامنځته کولو کې د هغوی ونډه اساسي او مهمه ده.
د میلیونونو کډوالو د ستنېدو او محدود شمېر کسانو ته د استوګنې د نمرو د وېش په تړاو د افغانستان انټرنشنل - پښتو له راپور وروسته د طالبانو د کور او ښار جوړولو وزارت ویلي، راستنو شویو د ملاتړ په موخه د ځمکو ورکړې بهیر چټک شوی او تر اوسه یې په څه باندې ۲۰ زره راستنو شویو ځمکې وېشلي.
د سعودي عربستان د بهرنیو چارو وزارت پر متحده عرب امارات، قطر او کویټ د بریدونو غندنه کړې او دا یې د دغو هېوادونو د خاورې او ځمکنيو اوبو پر ضد «خیانتکارانه هدف ګرځول» بللي دي.
د عوامي نشنل ګوند مشر ايمل ولي خان په خېبرپښتونخوا کې د روانې ناامنۍ څپې ته په غبرګون کې ويلي، دلته چې څوک په ناامنۍ کې لاس لري او کوي یې، «د پاکستان حکومت د دې هر یوه ترهګر په اړه معلومات لري».
د طالبانو د تصفیې فورمې د بندېدو په تړاو د افغانستان انټرنشنل له راپور وروسته طالبانو ویلي، د تصفیې فورمې لغوه شوي نهدي، بلکې د تصفیې بهیر پایته رسېدلی دی. د طالبانو تصفيوي کمېسیون ویلي، تر دې وروسته د تقرر او نورو امتیازاتو لپاره د تصفیې فورمه د سند په توګه اعتبار نهلري.
العربیه شبکې د باخبره سرچینو له قوله راپور ورکړی، چې د ایران له لوري امریکا ته په ورکړل شوي ځواب کې د غني شویو یورانیمو برخلیک د مذاکراتو له بریا سره تړل شوی او که د تهران او امریکا ترمنځ خبرې بریالۍ شي، نو غني شوي یورانیم به له ایران څخه بهر ولېږدول شي.
نړیوالو رسنیو راپور ورکړی، چې د افغانستان د ښځینه کرکټ ملي لوبډلې جلاوطنه غړو د کرکټ له نړیوالې شورا غوښتي چې دوی د یوې رسمي ملي لوبډلې په توګه په رسمیت وپېژني.
په کندهار کې طالب مسوولین وايي، د دغه ولایت په میوند، ژېړۍ، پنجوايي او سپنبولدک ولسوالیو کې د ۴۷ ځانمرګو بریدګرو له کورنیو سره یې نغدي مرستې کړې دي. ځانمرګي بریدګر په افغانستان کې د تېر جمهوري دولت پر وړاندې د طالبانو تر ټولو مرګونې وسیله وه چې تر ډېره یې ولسي وګړي قربانیان وو.
د طالبانو د ټرانسپورټ او هوايي چلند وزارت د هواپوهنې ادارې د هېواد په ۱۸ ولایتونو کې د شدیدو بارانونو، تالندې برېښنا، بادونو او ناڅاپي سېلابونو راوتلو خبرداری ورکړی دی.
د طالبانو د کانونو او پټرولیم وزارت د کانونو د تفحص او اکتشاف رييس په مشرۍ پلاوي پنجشېر کې د کانونو چارو د ارزونې په ترڅ کې ویلي،دمګړۍ یوازې د پنجشنېر د ۲ ولسوالیو په کانونو کې څه باندې ۵ زره کارګر پر کار بوخت دي. خو د څارونکو په باور، د کان کېندونکو ساتنې ته هېڅ ډول پام نهکېږي.
د هرات ولایت د سوداګرۍ خونه وایي، چې د هرات د جامو تولیدوونکو د لومړي ځل لپاره عراق ته د ښځو او ماشومانو د ۲۰زره جوړو جامو یوه سوداګریزه جوپه صادره کړې ده.
د امریکا ولسمشر ډونالډ ټرمپ وایي، چې ایران له تېرو ۴۷کلونو راهیسې له امریکا او د نړۍ له نورو هېوادونو سره «لوبې» کړې دي.
د پاکستان د سند ايالت په کراچۍ ښار کې د ښځو لاريون بنسټ (عورت مارچ) د مور نړیوالې ورځې په مناسبت جوړه کړې غونډه کې غوښتنه کړې، چې ښځې دې د برابر انسان په توګه وپېژندل شي او پوره حقونه دې ورکړل شي.