آرشیف

د امریکا د بهرنیو چارو وزارت العربیه شبکې ته وویل، چې د ایران له خلکو ملاتړ دوام لري او دوی ټول بدلونونه تر څارنې لاندې لري.

د برېتانیا، فرانسې او هالنډ اېر فرانس، برېټش اېرویز او کې‌اېل‌اېم شرکتونو اسراییل او د منځني ختیځ ځینو هېوادونو ته خپلې الوتنې لغوه کړې دي.

د المان د کارګرانو سراسري اتحادیې په یوه اعلامیه کې له ایراني ولس سره خپل بې‌قید او شرط پیوستون اعلان کړ.

د ملګرو ملتونو د بشري مرستو د همغږي کوونکي دفتر د راپور له‌مخې، په افغانستان کې په وروستیو ورښتونو او په ځانګړې توګه په واورې ورېدنو کې لږ تر لږه ۱۶ کسان مړه او لسګونه نور ژوبل شوي دي. په دغو مړه شویو کې ډېری یې ماشومان دي.

د اقتصادي همکاریو سازمان د سوداګرۍ او صنعت خونې ۳۰مه غونډه د پاکستاني سوداګرو فډراسیون په کوربتوب د جمعې په ورځ د پاکستان په کراچۍ ښار کې ترسره شوه. په دې غونډه کې په کراچۍ کې د طالبانو کونسل عبدالجبار تخاري هم ګډون درلود.

د پولنډ لومړي وزیر ویلي، د افغانستان په جګړه کې باید د وژل شویو پنځو پولنډي سرتېرو د جنازې او رخصتۍ پر ورځ، د هغوی قرباني د امریکا ولسمشر ډونالډ ټرمپ ته ور یادې کړای شي. هغه زیاتوي: «په هماغه ورځ لوړپوړو امریکايي پوځي افسرانو ماته ډاډ راکړ چې دا قربانۍ به هېڅکله هېرې نه‌شي»

د ترکیې د بهرنیو چارو وزیر هاکان فیدان وایي، داسې نښې شته چې اسراییل لا هم پر ایران د برید په هڅه کې دی.

د طالبانو د کار او ټولنیزو چارو وزارت له کاري شریکانو او خصوصي سکټور سره د کارګرو د کاري حقونو د خوندینې په تړاو غونډه کې د کارګرانو حقونو پر ټینګښت ټینګار کړی، خو د خصوصي سکټور یو شمېر کارګر د خپلو بنسټونو له‌خوا د کاري چاپېریال او همداراز پر وخت د تنخواوو له نه‌ورکړې شکایت لري.

د طالبانو د اطلاعاتو او کلتور وزارت د خپرونو معین مولوي حیات‌الله مهاجر فراهي وايي، د دوی د نظام ټول قوانین پر قران‌کریم، حدیثونو او حنفي فقهې باندې ولاړ دي. د هغه په وینا، نظام یې یوازې د شرعي احکامو په پلي کولو پابند دی.

د امریکا د خزانې وزارت د ایران اړوند ۸ سمندري شبکې او ۹ بېړۍ د دغه هېواد د سلګونه میلیونه ډالرو په ارزښت د نفتي موادو او محصولاتو د صادراتو له امله تحریم کړي دي. په هند کې د ایت او په لېبریا کې د بنوېل شرکتونو حقوقي کسان هم تحریم شوي دي.

د خېبرپښتونخوا په دېره اسماعېل خان کې د امن کمېټې د مشر نور عالم محسود په کور کې د واده پر مراسمو ځانمرګي برید کې د نور عالم محسود په ګډون ۱۰ کسان وژل شوي او ګڼ نور ټپيان دي. دغه پېښه نن ماخوستن رامنځته شوې ده

د حزب اسلامي ګوند د مشر ګلبدین حکمتیار زوی حبیب‌الرحمان حکمتیار د طالبانو تازه «جزایي اصول‌نامې» ته په اشارې سره وایي، د انسانانو په طبقو وېشل د جاهلیت او غلامۍ له دورې پاتې عمل دی. هغه وایي، طالبان پر افغانانو د اسلام په نوم بې‌عدالتي تپي.

د افغان اېواک په نوم د کډوالو د ملاتړ بنسټ مشر شان وانډایور وایي، دوی لا هم امریکا ته د افغان پناه غوښتونکو د لېږد لپاره مبارزه کوي. د نوموړي په وینا، دغو پناه غوښتونکو کې د کډوالۍ ځانګړو ویزو لرونکي (اېس‌ای‌وي)، پي۱، پي۲ او ورته نور مهاجرتي بهیرونه شامل دي.

د ننګرهار په شېرزاد ولسوالۍ کې د دوو کورنیو ترمنځ شخړه کې یو تن وژل شوی او ۳ نور ټپيان دي او همداراز په لعلپورې ولسوالۍ کې بیا د یوه کور د چت د نړېدو له امله ۳ ماشومان ټپيان شوي دي.

د طالبانو د صنعت او سوداګرۍ وزارت مرستیال احمدالله زاهد پرون د بنګله‌دېش په پلازمېنه ډاکه کې د دغه هېواد د سوداګرۍ ټولنې له غړو سره په کتنه کې افغانستان د سوداګرو او پانګه‌ونوالو لپاره یو «باوري او پرانېستی» بازار وباله.

د افغانستان د مخکېني جمهوري نظام د چارو ادارې مشر جمعه د (سلواغې ۳مه) ویلي، هېواد کې د بې‌ثباتۍ ریښې مذهبي او قومي نه دي، بلکې لامل طبقاتي نابرابري او فوقیت طلبي ده. فضل محمود فضلي زیاتوي، چې طبقاتي امتیازات او خلک له حقونو محرومول غېر انساني عمل دی.

د افغانستان د مخکېني جمهوري نظام پر مهال د ملي امنیت رییس رحمت‌الله نبیل د طالبانو د «جزايي اصول‌نامې» په تړاو توندې نیوکې کړي. هغه ویلي، د دین سیاسي کېدل او له مذهب څخه افراطي او وسیلوي تعبیرونه، افغانستان تیارو او له ناورین څخه ډک راتلونکي ته بیایي.

ازبکستاني رسنیو راپور ورکړی چې طالبانو۲۰ کیلوګرامه خام سره زر، چې ارزښت یې شاوخوا ۲،۹ میلیونه ډالره کېږي، د پروسس په موخه ازبکستان ته صادر کړي دي.

د ملګرو ملتونو د بشري حقونو عالي کمېشنر ولکر ترک، نن د جمعې په ورځ د امریکا له حکومت څخه وغوښتل چې ډاډ ترلاسه کړي د کډوالۍ تګلارې یې د فردي حقونو او نړیوالو قوانینو سره سمون لري. نوموړي په ځانګړي ډول د کډوالو د نیونو او د زور د کارولو په اړه جدي اندېښنه څرګنده کړې ده.

د ښځو د سولې او ازادۍ غورځنګ وایي، چې د طالبانو له‌خوا د محکمو لپاره تصویب شوې «جزایي اصول‌نامه» په افغانستان کې تاوتریخوالی بنسټیز او قانوني کوي. دغه غورځنګ له خلکو غوښتي چې طالبانو ته اجازه ورنه کړي چې خپل جنایتونه د قانون تر نامه لاندې عادي او رسمي کړي.

د ډونالد ټرمپ هغه څرګندونو چې ویلي یې دي «د ناټو متحدینو په افغانستان کې د جګړې په لومړۍ کرښه کې ګډون نه دی کړی،» د بریتانیا د سیاستوالو سخت غبرګون راپارولی. ټرمپ ویلي چې د ناټو ځواکونه په افغانستان کې د امریکایي سرتېرو په پرتله شاته پاتې شول او د «لومړۍ کرښې» څخه لرې شول.