په کابل کې د طالبانو د امنیه قوماندانۍ ویاند خالد ځدراڼ وايي، چې د افغان خبریال بشیر هاتف د زوی عبدالله هاتف د قتل په تړاو یې دوه کسان نیولي او پلټنې ترې روانې دي. د هغه په وینا، د نوموړي جسد څو ورځې وړاندې د کابل اتمې حوزې اړوند موندل شوی و.
د امریکا د خزانې وزیر سکاټ بسنټ ویلي، چې د امریکا د خزانې وزارت ښايي هره اوونۍ پر ایران د اقتصادي فشار د زیاتوالي لپاره نوي بندیزونه اعلان کړي. د نوموړي په وینا، بانکونه به د دغه اقداماتو په لومړي پړاو کې په نښه شي.
د روزګان ولایت د انځرو بڼوال او د دغه ولایت د غرمګان سوداګریزې منډۍ کاروباریان وایي، د تېرکال پرتله سږګال د انځرو د حاصلاتو بیې ټیټې شوې دي. دوی له طالبانو غواړي، چې د دغه حاصلاتو لپاره د بازار موندنې په برخه کې جدي اقدامات ترسره کړي.
د امریکا ولسمشر ډونالډ ټرمپ ویلي، ایران ته باید د اټومي وسلو د ترلاسه کولو اجازه ورنه کړل شي او ټینګار یې کړی چې ایران به «هېڅکله» اټومي وسلې ترلاسه نهکړي.
د پاکستان تحریک انصاف ګوند په یوې مشورتي ناسته کې د دغه ګوند بنسټګر او د پاکستاان د پخواني لومړي وزیر عمرانخان او د هغه د مېرمنې بشرا بيبي پرضد جوړې شوې قضیې «جعلي او سیاسي» بللې او د دغه قضیو د بېرته اخیستلو غوښتنه یې کړې ده.
د طالبانو د لومړۍ واکمنۍ پرمهال په کابل کې د یوې افغانې مېرمنې زرمینې اعدام چې نږدې ۲۷ کاله وړاندې د زرګونه کسانو پر وړاندې ترسره شو، یو ځل بیا د افغانستان د ښځو د حقونو په اړه اندېښنې راپارولې دي.
له ایران نه یو افغان محصل افغانستان انټرنشنل ته په لېږلي پیغام کې ویلي، چې د تهران په پیام نور پوهنتون کې شاوخوا له ۱۰۰ تر ۱۵۰ پورې افغان محصلان له نږدې شپږو میاشتو راهیسې د استوګنې قانوني اسنادو (اقامې) د مودې غځولو په برخه کې له ګڼو ستونزو سره مخ دي.
په کندوز کې د طالبانو د کرنې، اوبو لګولو او مالدارۍ ریاست وایي، چې په دغه ولایت کې د انګورو حاصلات د تېرکال پرتله زیات شوي او سږکال یې کچه ۶۹زره او ۸۴۶ مټریک ټنو ته رسېدلې ده. د یاد ریاست په وینا، تېرکال په کندوز کې ۶۷زره او ۸۱۲ مټریک ټنه د انګورو حاصلات راټول شوي وو.
د طالبانو د بهرنیو چارو وزیر امیرخان متقي ویلي چې د طالبانو حکومت له متحده ایالاتو سره د اړیکو عادي کېدل غواړي او له واشنګټنه یې غوښتي چې د طالبانو له ادارې سره له «تقابلي چلند» څخه لاس واخلي.
د اردن پوځ ويلي، د دوشنبې په ورځ د (وږي په ۹مه) سهار وختي یې د دغه هېواد په هوايي حریم کې د ۸ توغنديو مخه نیولې او شنډ کړي یې دي.
د افغانستان د تېر جمهوري نظام لوی درستیز جنرال هبتالله علیزی وايي، افغان امنیتي او دفاعي ځواکونو د طالبانو پر وړاندې جګړه کړې او د جمهوري نظام سقوط د دې لپاره نه و چې پوځیانو له جګړې ډډه کړې وه.
په تېرو ۲ ورځو کې هلمند کې یوه ۶ کلنه نجلۍ د ۲۰۰ زره کلدارو په بدل کې یوه ۶۰ کلن سړي ته او یوه ۸ کلنه نجلۍ بیا ۸۰ کلن سړي ته په نکاح ورکړې شوې وې. نړۍوالو بنسټونو تر دې مخکې ویلي، چې د نجونو ښوونځيو د تړل کېدو او د فقر د ډېرښت له امله د کم عمره نجونو د ودونو ګراف ډېر لوړ شوی دی.
پښتون ملي جرګې د جبري ورکېدنو د قربانیانو د نړیوالې ورځې په مناسبت په خپره کړې اعلامیه کې ویلي چې په پاکستان کې جبري ورکېدنې د پښتنو د ځپلو او پر هغوی د فشار راوړلو لپاره د پوځ له لوري د یوې سیستماتیکې تګلارې په توګه کارول کېږي.
فاکسنیوز د یوې امریکايي سرچینې له قوله راپور ورکړی چې ایران په اردن کې مېشت امریکايي ځواکونه په نښه کړي دي.
یورېشیا ریویو په یوه تحلیلي مقاله کې وایي، د طالبانو له واکمنۍ پنځه کاله وروسته له هم افغانستان له سیاسي انزوا، ټولنیزو محدودیتونو او د بشري حقونو له اندېښنو سره مخ دی او د ښځو او نجونو پر زدهکړو او کار محدودیتونه د طالبانو د حکومت د نړیوال مشروعیت پر وړاندې له اساسي خنډونو دي.
امریکایي ځواکونو د یکشنبې په ورځ په هرمز تنګي کې د ايران د توغندیو ویشتونکي سیستمونه په نښه کړي، دا په یوه میاشت کې د دوی لومړی پوځي اقدام دی او په دې توګه یې په هغې نوبتي جګړه کې لنډمهاله ارامي ماته کړه چې له شپږو میاشتو راهیسې روانه ده.
د بشري حقونو سازمان «حالوش» راپور ورکړی چې د ایران د سیستان او بلوچستان ولایت د خاش ښار په یوه پېښه کې یو افغان وګړی د ناپېژانده وسلهوالو په ډزو وژل شوی دی.
د بامیان لپاره د طالبانو والي ګلحیدر شفق د افغانستان لپاره د ملګرو ملتونو د بشري مرستو د همغږۍ دفتر (اوچا) له ساحوي مشر کېنټ باتوراجر سره په کتنه کې ویلي، د دغه ولایت اړتیاوو ته په کتلو بشري مرستې کافي نهدي. نوموړي له اوچا وغوښتل، چې له اړمنو سره په خپلو مرستو کې ډېروالی راولي.
په ایران کې مېشه افغان دیني عالم حجتالاسلام سیدبصیر احساني په وینا، په افغانستان کې د اسلامي وحدت د پیاوړتیا لپاره د ټولو اسلامي مذاهبو شتون او حقونه باید په پام کې ونیول شي او هېڅ قوم او مذهب ته باید پر بل د برترۍ دریځ ورنه کړل شي.
د طالبانو د المپیک، بدني روزنې او ورزش ادارې ویلي چې د پاورلفټینګ فدراسیون له لوري د هېواد د ۱۳ ولایتونو د ۱۴۰ ورزشکارانو ترمنځ د پاورلفټینګ لسم پړاو ملي ټاکنیزې سیالۍ پیل شوې.
د ملګرو ملتونو د خوړو او کرنې ادارې (ایف ای او) په مالي ملاتړ په ننګرهار کې ۲۱ زره او ۳۷۰ بزګرانو ته د غنمو اصلاح شوي تخمونه او کیمیاوي سرې وېشل کېږي، چې له ډلې به ۱۲ زره او ۳۷۰ بزګرانو ته دغه مرستې وړیا او ۹ زره نورو ته په نیمه بیه ورکړل شي.