د مالدیپ ولسمشر محمد معیز د پاکستان د لومړي وزیر شهباز شریف په بلنه په درې ورځني رسمي سفر اسلاماباد ته رسېدلی دی. ټاکل شوې ده چې نوموړی د پاکستان له ولسمشر او لومړي وزیر سره د لیدنو ترڅنګ د دواړو هېوادونو د اړیکو او په بېلابېلو برخو کې د همکارۍ پر پراختیا خبرې وکړي.
فاکس نیوز د دوو امریکایي چارواکو په حواله راپور ورکړی، چې متحده ایالات منځني ختیځ ته د «تیودور روزوېلټ» په نوم الوتکهوړونکې بېړۍ او د سمندري ځواکونو ۱۳مه قطعه لېږي، چې په دې سره به په سیمه کې شاوخوا ۱۰ زره نور امریکایي سرتېري ځای پر ځای شي.
د ملګرو ملتونو د ماشومانو د ملاتړ صندوق (یونیسف) اعلان کړی، چې تر ۲۰۲۶ کاله پورې به په افغانستان کې لږ تر لږه ۱۵۰۰ تنکي ځوانان چې له جدي امنیتي او ټولنیزو ګواښونو سره مخ دي، تر خپل ملاتړ لاندې راولي او د مسلکي کسبونو روزنه به ورکړي.
د بلوچستان اسمبلۍ د غړې او د لوبو او ځوانانو چارو سلاکارې مینا مجید ورور اورنګزېب مجید د کیچ ولسوالۍ په مند سیمه کې د ناپېژاندو وسلهوالو له خوا تښتول شوی دی. بل لور ته د بلوچستان حکومت وايي چې په دغه ایالت کې د ترهګرۍ پر ضد تر ۶۰ زرو ډېر عملیات شوي دي.
د طالبانو د امربالمعروف او شکایتونو اورېدو وزارت اعلان کړی، چې د دوی د محتسبانو په هڅو بلخ ولایت کې د چین دوه تنه وګړي مسلمانان شوي دي. دغه وزارت ویلي چې یادو بهرنیو وګړو په خپله خوښه د دغه دین احکام منلي دي.
په ملګرو ملتونو کې د افغانستان استازي نصیر احمد فایق ویلي، د افغانستان اقتصادي بیارغونه د خلکو له بنسټیزو حقونو، په ځانګړې توګه د ښځو او نجونو له حقونو څخه نه شي بېلېدای. هغه ټینګار کړی، افغان ښځې او نجونې د طالبانو تر واکمنۍ لاندې لا هم له سیستماتیک تبعیض او محرومیت سره مخ دي.
د طالبانو د اطلاعاتو او کلتور وزیر، د ملا هبتالله اخوندزاده د یوه کتاب د پېژندنې غونډه کې اقتصاد او رزق «ضمني مسایل» ګڼلي او له خلکو یې غوښتي، چې اصلي پام دې پر عقیدې وساتي. د طالبانو په واک د ملي ټلوېزیون مشر په دې غونډه کې ویلي، چې د دوی د مشر اساسي چاره امر بالمعروف دی.
د بادغیس ولایت یو شمېر سوداګرو او د صنعت برخې فعالانو د طالبانو د صنعت او سوداګرۍ له وزیر نورالدین عزیزي سره په لیدنه کې، د دغه ولایت د صنعتي پارک د پړاوونو د ژر بشپړېدو او د پرانیستل کېدو غوښتنه کړې ده.
د خېبر پښتونخوا په بنو ولسوالۍ کې د «المرکز الاسلامي» دیني مدرسې استادانو او زدهکوونکو د پاکستان مرکزي اسمبلۍ د غړي مولانا سید نسیم علي شاه د نیولو پر ضد اعتراضي غونډه کړې او د هغه د سمدستي خوشې کېدو غوښتنه یې کړې ده.
په خوست کې د طالبانو د امربالمعروف او شکایتونو اورېدلو ریاست په دغه ولایت کې د ترانو او ذکري نظمونو ۱۲ سټوډیوګانې تړلې او مهرلاک کړې دي. د دوی په وینا، یادې سټوډیوګانې د شرعي اصولو خلاف وې.
د اکثریت ګوند غړي فضل محمود فضلي د پاکستان له لوري د ایران، افغانستان او هند په ګډون له ګاونډیو هېوادونو سره د سوداګریزو لارو د بندېدو په تړاو ویلې، د اسلاماباد دا کړنې هېڅ ملي منطق نه لري، بلکې دا یوازې د بهرنیو قدرتونو جیوپولیټیکي اطاعت دی.
افغانستان انټرنشنل په ازبکي ژبه د یوې خپرونې نشرات پیلوي. دا خپرونه ټاکل شوې د چارشنبې په ورځ، د تلې په ۲۹مه د ازبکي ژبې له ملي ورځې سره هممهاله خپره شي.
د کندهار طالب چارواکي وايي، چې د دغه ولایت له مرکزي زندان څخه یې ۱۴ تنه بندیان خوشې کړي او د ۹۱ نورو د بند په موده کې یې کمښت راوستی. طالب چارواکو نه دي ویلي، چې دغه کسان په کومو تورونو بندیان دي، خو طالبان له سیاسي بندیانو سره په ځانګړي ډول په ډېر ناوړه چلند تورن شوي دي.
د پولنډ لومړي وزیر ډونالډ ټوسک د افغانستان په جګړه کې د ناټو د متحدینو د ونډې په اړه د امریکا د دفاع وزیر څرګندونې وغندلې او وايي، د پولنډي سرتېرو د هڅو او سرښندنو سپکاوی باید ونه شي.
په شمالي وزیرستان کې ناپېژاندو وسلهوالو د میرانشاه د پولیسو د مرکز مشر میرا خان وژلی دی. د شمالي وزیرستان پولیسو افغانستان انټرنشنل پښتو ته تاييد کړه، چې دا پېښه د سې شنبې په ورځ، د تلې په ۲۸مه، شوې ده.
په هرات کې ځايي سرچینو افغانستان انټرنشنل ته ویلي، چې د طالبانو د امر بالمعروف محتسبانو د دغه ولایت په لیلامي چوک کې پنځه ښځې او نجونې نیولې دي. د ځايي سرچینو په وینا، د طالبانو د امر بالمعروف مامورانو دغه ښځې د دې ډلې د خوښې وړ پوښاک د نه لرلو له امله له ځان سره بیولې دي.
د پاکستان د بلوچستان ایالتي چارواکو ويلي، چې په تېرو دوو کلونو کې یې له دغه ایالت څخه له يو ميليون ډېر افغان کډوال بېرته خپل هېواد ته ستانه کړي دي.
د پاکستان د بهرنیو چارو وزیر اسحاق ډار د تاجکستان په پلازمېنه دوشنبه کې د شانګهای د همکارۍ سازمان په غونډه کې ويلي، چې د سیمې دوامدار پرمختګ په افغانستان کې له تلپاتې سولې او ثبات سره تړلی دی.
د تاجکستان ولسمشر امام علي رحمان په پلازمېنه دوشنبه کې د شانګهای همکاریو سازمان د غړو هېوادونو د پلاویو له مشرانو سره په کتنه کې د ترهګرۍ، افراطیت، او د نشهيي توکو د ناقانونه قاچاق خلاف د ګډې مبارزې پر پیاوړتیا ټینګار کړی دی.
د طالبانو تر واک لاندې د افغانستان برېښنا شرکت وايي، چې له اندخوی څخه تر میمنې پورې د ۱۱۰ کېلوولټه برېښنا د لېږد مزي د نوي کولو پروژې له ۹۰ سلنې زیاتې چارې بشپړې شوې دي. په دې پروژه کې د مزو تر څنګ انسلیټرونه یا برېښنايي عایق او زیانمن شوي تجهیزات هم په نویو وسایلو بدلیږي.
د پاکستان د جمعیت علمای اسلام مشر مولانا فضلالرحمان ويلي، چې له خیبر پښتونخوا څخه د پخوانیو قبایلي سیمو یا فاټا جلا کول او بېرته د فدرالي حکومت واک ته سپارل د دغې سیمې پر کانونو او طبیعي زېرمو د ولکې لپاره دي.