په بامیان کې د طالبانو پخوانی والي عبدالله سرحدي وايي، په ۲۰۰۱ کال کې یې د بامیان د بودا سترې مجسمې په خپلو لاسونو ویجاړې کړې. هغه دا کار د «خدای د غوښتنې» او د شریعت له مخې بللی او ویلي یې دي چې په خپل دې کړنه پښېمانه نه دی.
د ایران ولسمشر مسعود پزشکیان وايي، د «دښمنانو» کړنو د ایران ستونزې زیاتې کړې او د خلکو وضعیت ته د رسېدو مخه یې نیولې ده. پزشکیان پر یووالي ټینګار کړی او ویلي یې دي، امریکا او اسراییل هڅه کوي زمونږ له کورني اختلافاتو ناوړه ګټه واخلي.
په پنجشېر کې د طالبانو والي محمداغا حکیم ویلي چې یاده ډله په دغه ولایت کې هېڅ سیاسي بندي نه لري. نوموړي د طالبانو د ریاست الوزرا عبدالسلام حنفي سره د پنجشیر له زندان څخه د لیدني پرمهال ویلي، چې د یاد ولایت په زندان کې یوازې ۵۹ بندیان شتون او هېڅ یو یې سیاسي بندي نه دی.
د لوګر د مرکز پل علم ښار اوسېدونکو افغانستان انټرنشنل ته وویل، چې د ځینو مارکیټونو مسوولان له هټۍوالو د برېښنا بېلونه څو برابره لوړ اخلي. د دوی په وینا د یو مارکیټ څښتن له دوه ورځو راهیسې د خلکو هټۍ ځکه تړلي دي، چې هټۍوالو د برېښنا د لوړو بېلونو په اړه شکایتونه کړي وو.
د طالبانو د عامې روغتیا وزارت وايي، په بلخ کې یې د ۲۰۷ خصوصي روغتیايي مرکزونو له څارنې وروسته، د روغتیايي قوانینو د سرغړونو له امله شاوخوا سل درملتونونه او روغتیايي مرکزونه تړلي دي.
د طالبانو د بلخ ولایت د صنعت او سوداګرۍ رییس امیر محمد متقي وایي، چې د مولوي هبت الله د ځانګړي حکم پر بنسټ د دغه ولایت د صنعتکارانو د ملاتړ او صنعتي ښارګوټو د جوړولو لپاره ۲۰ زره جریبه ځمکه منظور شوې ده.
په جنیوا کې د افغانستان استازی نصیر احمد اندېشه وايي، طالبان د هېواد له ګڼو ټولنیزو او بشري سرو کرښو او تاریخي واقعیتونو اوړي. د نوموړي په وینا، د طالبانو پاروونکې کړنې او د ځینو کسانو چوپتیا د تفاهم، مصالحې، پخلاینې او عدالت لاره لا ستونزمنوي.
باوري سرچینو افغانستان انټرنشنل ته ویلي، چې د مقاومت جبهې د لوړپوړي قوماندان حسیب پنجشېري مړی له شاوخوا څلورو ورځو وروسته د دوشنبې په ورځ په خپل پلرني ټاټوبي کې خاورو ته وسپارل شو.
د طالبانو ویاند ذبیحالله مجاهد د ناورین نړۍوالې ډلې د تازه راپور په غبرګون کې ویلي، چې ډلې یې په بدخشان کې وروستۍ ناامني مهار کړې ده. نوموړي په بدخشان کې وروستي فعالیتونه «کوچني تحرکات او سرغړونې» بللي او ویلي یې دي، چې د دوی امنیتي ځواکونه د وضعیت د کنټرول بشپړ توان لري.
د ملګرو ملتونو د بشري چارو د همغږۍ دفتر اوچا وايي، جرمني د افغانستان د بشري مرستو صندوق ته ۶.۸ مېلیونه یورو چې شاوخوا ۷.۹۶ مېلیونه امریکايي ډالر کېږي مرسته کړې ده. اوچا ویلي، یاده مرسته به له کړکېچ ځپلو افغانانو سره د ژوند ژغورونکو مرستو دوام پياوړی کړي.
د پاکستان د پوځ مشر سید عاصم منیر او د دغه هېواد د کورنیو چارو وزیر محسن نقوي ایران ته تللي دي. د دغه سفر موخه په سیمه کې د سولې او ټیکاو د هڅو پیاوړتیا او په منځني ختیځ کې د روانې شخړې د سولهییز حل په اړه خبرې اترې دي.
د پاکستان د سند ایالت د کراچۍ ښار پولیسو د دغه ښار په بېلابېلو سیمو کې د افغان کډوالو پر ضد عملیات کړي او ۳۴ افغانان یې نیولي دي. په نیول شویو کسانو کې ښځې او ماشومان هم شامل دي.
د ایران د بهرنیو چارو وزارت ویاند اسماعیل بقایي وايي، ایران او افغانستان باید د دواړو هېوادونو ترمنځ د سوداګرۍ پراختیا لپاره سرحدي او ګمرکي خنډونه لرې او په دې برخه کې همکاري لا پیاوړې کړي.
په هرات کې درېیو عیني شاهدانو افغانستان انټرنشنل ته ویلي، چې د طالبانو د امر بالمعروف او نهې عن المنکر محتسبانو په درېیو جلا پېښو کې یوشمېر ښځې او نجونې نیولې او له ځان سره یې وړې دي.
د ملګرو ملتونو د ماشومانو ملاتړ صندوق (یونېسف) وايي، په نورستان او نهو نورو ولایتونو کې سېلابونو ۲۶ کسان مړه او ۱۳۱ نور ټپيان کړي دي. یونېسف زیاته کړې، چې دغه سېلابونه د جولای له ۲۰مې د اګسټ تر ۳مې په یادو سیمو کې راوتلي او د ګڼو خلکو ژوند یې اغېزمن کړی دی.
د کابل یو اوسېدونکي افغانستان انټرنشنل ته ویلي، طالبانو یې خور له دې امله نیولې او زنداني کړې چې د وېښتانو یوه برخه یې ښکاره شوې وه. د کابل دغه اوسېدونکي د طالبانو لهخوا د ښځو پر نیولو او د خلکو پر چوپتیا سختې نیوکې کړې دي.
په افغانستان کې د خوراکي توکو لوړو بیو او د خلکو کمزوري اقتصادي وضعیت د کابل په ګډون د یوشمېر ولایتونو اوسېدونکي سخت اندېښمن کړي دي. د خوړو نړۍوال پروګرام هم په خپل تازه راپور کې ویلي، چې په افغانستان کې د ځینو خوراکي او سون توکو بیې لوړې شوې دي.
پاکستان کې د سختو ورښتونو، سېلابونو او ځمکښویېدنې له امله د مړو شویو کسانو شمېر ۱۶۶ ته رسېدلی او په بېلابېلو پېښو کې شاوخوا ۵۰۰ کسان ټپیان شوي دي. د پاکستان د طبیعي پېښو د مدیریت ادارې ویلي، د جون له ۲۶مې راهیسې د سختو ورښتونو او سېلابونو له امله خلکو ته پراخ زیانونه اوښتي دي.
د روغتیا نړۍوال سازمان په تازه راپور کې راغلي، چې په افغانستان کې تازه د ګوزڼ څلور مثبتې پېښې ثبت شوې دي. د راپور له مخې، له دې ډلې دوه پېښې د هرات ولایت په شینډنډ او ادرسکن ولسوالیو، یوه د پکتیکا ولایت په ډیله ولسوالۍ او یوه د کندهار ولایت په ارغستان ولسوالۍ کې ثبت شوې ده.
پر ایران د امریکا د احتمالي بندیزونو د اعلان په درشل کې د برنېټ خامو تېلو بیه له یو سلنې ډېره راټیټه شوه. رویټرز راپور ورکړی، چې د برنېټ خامو تېلو راتلونکې معاملې د هر بېرل بیه ۱.۲۲ ډالره راټیټه او ۹۳.۱۷ ډالرو ته ورسېده.
د خیبر پښتونخوا د پېښور پولیسو د دغه ښار په بېلابېلو سیمو کې د افغان کډوالو پر ضد د عملیاتو پرمهال شاوخوا ۲۰ افغانان نیولي دي. دغه عملیات د پېښور په بورډ بازار، تاجاباد او نورو سیمو کې شوي دي.