د هرات یو اوسېدونکي افغانستان انټرنشنل ته ویلي، د یکشنبې په ورځ طالبانو یوه ۱۳ کلنه نجلۍ په زور خپل موټر ته پورته کړه. د نوموړي په خبره، دغه نجلۍ په لوړ غږ په چیغو د مرستې غوښتنه کوله. دغه اوسېدونکی زیاتوي: «د یادې نجلۍ چادري هم پر سر وه».
د پاکستان ډان ورځپاڼې د راپور له مخې، افغانستان د پاکستان پر ځای د ایران او منځنۍ اسیا له لارې د بدیلو سوداګریزو لارو کارول پراخ کړي چې له امله یې د خیبر پښتونخوا او په ځانګړي ډول د پېښور او خیبر ولسوالۍ صنعت، سوداګري او ټرانسپورټ له جدي ستونزو سره مخ شوي دي.
سرچینو افغانستان انټرنشنل ته ویلي، چې طالبانو د ملي مقاومت جبهې د قوماندان حسیب پنجشېري مړی د دوشنبې په سهار (د وږي ۲مه) د هغه کورنۍ ته وسپاره. طالبانو پرون د حسیب پنجشېري مړی له چاریکار نه کابل ته لېږدولی و.
د ایران د صنعت، کانونو او سوداګرۍ وزارت مرستیال او د دغه هېواد د ځمکپېژندنې او کاناکتشافي سازمان مشر محمود فاطمي عقدا د افغانستان د کانونو ظرفیتونو پېژندلو او د کاني سرچینو لپاره د معلوماتو بانک جوړولو په موخه د مطالعاتو د پیل خبر ورکړی.
د خوړو نړۍوال پروګرام په خپل تازه راپور کې ویلي، چې د اګست په درېیمه اوونۍ کې په افغانستان کې د ځینو خوراکي او سون توکو بیې لوړې شوې؛ خو د یوشمېر نورو خوراکي توکو بیې یوه اندازه راټیټې شوې دي، چې په ټولیز ډول د تېر کال پرتله د توکو د بیو لوړوالی ښیي.
د روان زېږدیز کال په لومړیو ۷ میاشتو کې په خیبر پښتونخوا او قبایلي سیمو کې د وسلهوالو په بریدونو کې ۱۵۶ پولیس وژل شوي دي. ډېری دغه پېښې په هنګو، بنو، کرک، ټانک، لکي مروت، ډېره اسماعیل خان او خیبر کې شوې دي؛ خو اوس دغه ګواښ د ملاکنډ او سوات غرنیو سیمو ته هم غځېدلی دی.
د ایران د اوسپنې پټلۍ عمومي رییس جبارعلي ذاکري وايي، د ایران او افغانستان ترمنځ د اوسپنې پټلۍ له لارې د توکو د لېږد کچه په کال کې له ۱۵زره ټنو څخه کمه وه؛ خو اوس په میاشت کې شاوخوا ۱۳۰زره ټنو ته لوړه شوې ده.
د طالبانو د کور او ښار جوړولو وزارت خبر ورکړی، چې د کونړ ولایت د سرکاڼو ولسوالۍ د پشد سیمې په نوي پلان شوي ښارګوټي کې راستنېدونکو کډوالو ته د ځمکو د وېش لړۍ پیل شوې ده.
د سوریې رسمي خبري اژانس وايي، د دغه هېواد او د اسراییل لوړ پوړو چارواکو په اردن کې د امریکا په منځګړیتوب ناسته وکړه؛ ترڅو د اسراییل د بریدونو د درولو او امنیتي هوکړې ته د رسېدو لپاره د خبرو اترو د بیا پیلولو په اړه بحث وکړي.
د خیبر پښتونخوا د خیبر ولسوالۍ په جمرود کې پر تخت بیګ پوستې د ناپېژاندو وسلهوالو په برید کې یو پولیس او د اېفسي یو سرتېری وژل شوي. پولیسو ویلي، لومړی وسلهوالو پر پوستې ډزې وکړې او وروسته د دواړه خواوو ترمنځ نښته وشوه چې په ډزو کې یو پولیس او د اېفسي یو سرتېری ټپیان شوي هم دي.
په جوزجان کې د طالبانو د صنعت او سوداګرۍ ریاست خبر ورکړی، چې د دغه ولایت په شبرغان ښار کې د کورنیو تولیداتو او صنعتي توکو دویم نندارتون پرانیستل شوی دی. دغه نندارتون چې د وږي په لومړۍ نېټه پرانیستل شوی، د روانې میاشتې تر ۳مې نېټې به دوام وکړي.
د طالبانو د اقتصاد وزارت مرستیال عبداللطیف نظري په بامیانو ولایت کې له خلکو غوښتي چې د نوموړي په وینا، «فتنهګرو» ته اجازه ورنه کړي چې د دغه ولایت امنیت ګډوډ کړي.
د افغانستان د خپلواکۍ د ۱۰۷مې کلیزې په مناسبت په اسټرالیا کې د ملبورن ښار په کچه پراخ فرهنګي او ټولنیز مراسم ترسره شول، چې د افغان کډوالو ترڅنګ د اسټرالیا د پارلمان غړو، مدني او بشري حقونو فعالانو او د کارګر ګوند یو شمېر استازو هم په کې ګډون کړی و.
د امریکا د استازو جرګې غړی سېټ مولټون وايي، له یو شمېر امریکايي پخوانیو سرتېرو سره په ګډه هڅه کوي چې د افغانستان د پخواني حکومت هغه همکاران امریکا ته ولېږدول شي چې له امریکايي ځواکونو سره یې کار کړی دی.
د فرانسې ولسمشر ایمانویل مکرون فرانسې ته د سعودي عربستان د ولیعهد محمد بن سلمان سفر د پاریس او ریاض ترمنځ په اړیکو کې یو «مهم پړاو» بللی دی.
د ملګرو ملتونو د بشري مرستو د همغږۍ دفتر «اوچا» وايي، په افغانستان کې د روغتیايي برخې بودجه یوازې ۳۷ سلنه تمویل شوې، خو په لرې پرتو سیمو کې ګرځنده روغتیايي ډلې د بشري مرستو صندوق په ملاتړ خلکو ته اړین روغتیايي خدمات وړاندې کوي.
د طالبانو د کډوالو ستونزو ته د رسېدنې عالي کمېسیون وايي، چې د تېرې زمري میاشتې پر مهال له ایران او پاکستان څخه ۱۱زره او ۲۸۷ افغانې کورنۍ افغانستان ته راستنې شوې دي.
د پاکستان د بهرنیو چارو وزیر د ۵ ورځني سفر په موخه نن لندن ته ورسېد. اسحاق ډار به له خپل بریتانوي سیال او نورو حکومتي چارواکو سره له کتنو سربېره د ختیځې سیمې د سمندري امنیت په اړه د خبرو لپاره د نړیوال سمندري سازمان له عمومي منشي سره هم وګوري.
د خیبر پښتونخوا په خیبر ولسوالۍ کې یوه ۱۷ کلنه نجلۍ د «ناموس» په نوم وژل شوې ده. پولیس وايي، د پېښې په تړاو یې یو کس نیولی او د نورو تورنو د نیولو هڅې یې هم پیل کړې دي.
په تهران کې د طالبانو سفارت وايي، د دې ډلې د سفارت سرپرست مولوي فضلمحمد حقاني د ایران د بهرنیو چارو وزارت د قونسلي چارو له مشر مجتبی شصتي کریمي سره لیدلي او د قونسلي خدمتونو په اړه یې خبرې کړې دي.
د افغانستان رسنیو ملاتړ سازمان په هېواد کې د ازادو رسنیو او خبریالانو پر وضعیت او خبري محتوا د طالبانو د استخباراتو زیاتېدونکي سانسور او کاري فشارونو په تړاو ژوره اندېښنه څرګنده کړې ده. دغه سازمان پر افغان خبریالانو او رسنیو «د کلماتو تحمیلول» د بیان پر ازادۍ یو بل ګوزار بللی دی.