په تهران کې د طالبانو سفارت وايي، د دې ډلې د سفارت سرپرست مولوي فضلمحمد حقاني د ایران د بهرنیو چارو وزارت د قونسلي چارو له مشر مجتبی شصتي کریمي سره لیدلي او د قونسلي خدمتونو په اړه یې خبرې کړې دي.
د افغانستان رسنیو ملاتړ سازمان په هېواد کې د ازادو رسنیو او خبریالانو پر وضعیت او خبري محتوا د طالبانو د استخباراتو زیاتېدونکي سانسور او کاري فشارونو په تړاو ژوره اندېښنه څرګنده کړې ده. دغه سازمان پر افغان خبریالانو او رسنیو «د کلماتو تحمیلول» د بیان پر ازادۍ یو بل ګوزار بللی دی.
د طالبانو مخالفه ډله، ازادۍ جبهه وايي چې د ننګرهار د بټيکوټ ولسوالۍ لپاره د طالبانو یو ځايي قومندان یې په یوه کمین کې وژلی او دده ۲ ساتونکي یې ټپيان کړي دي. د دغې جبهې په وینا، دغه قومندان ملا داوود افضل نومېده او په ختیځ زون کې د طالبانو د یوې مخکښې څېرې مولوي خورشید زوی وو.
د طالبانو له پېښو سره د مبارزې چمتووالي اداره وايي، د سمنګان په فیروز نخچین ولسوالۍ کې یې یو ۵۰۰ کیلويي بم کشف او لهمنځه وړی دی. ویل کېږي دا روسی بم په اوزان کلي کې کشف او د ماین پاکۍ د یوې موسسې له لوري له انتقالېدو وروسته لهمنځه وړل شوی دی.
د خیبر پښتونخوا اعلی وزیر سهیل اپریدي چې د یکشنبې په ورځ بونېر ولسوالۍ ته سفر کړی چې په بونېر کې د بېلابېلو سیاسي ګوندونو له سختو نیوکو سره مخ شوی دی. دوی وایي، وزیر اعلی د خپلو سیاسي موخو لپاره دولتي امکانات کاروي خو د ناامنیو په اړه هېڅ نه وایي.
د امریکا د استازو جرګې مشر مایک جانسون ویلي، تمه لري چې د ایران جګړه به ډېر ژر نوي پړاو ته داخله شي او د متحده ایالاتو متحدان به د جګړې په پای ته رسولو کې مرسته وکړي.
د طالبانو د لوړو زدهکړو وزارت علمي مرستیال ضیاالرحمان مدني محصلینو ته ویلي، چې ستاسو وروڼو، پلرونو او خپلوانو د نظام لپاره ځانونه ټوټه ټوټه کړل. د دې ډلې د اطلاعاتو او کلتور وزارت یوه مرستیال بیا له محصلینو غوښتي، چې د خپل قلم، ژبې او علم په وسیله د کفارو پر وړاندې مقابله وکړي.
له افغانستان څخه په قاچاقي لارو کراچۍ ته تللی افغان وايي، په هېواد کې د کار او روزګار نشتوالي، لوړو بیو او بېوزلۍ له امله هغه کډوال چې له پاکستان او ایران څخه هېواد ته ستانه کړل شوي، یو ځل بیا د کار او ډوډۍ پیدا کولو لپاره دغو هېوادونو ته په قاچاقي لارو د تګ هڅه کوي.
د اسلامي همکاریو سازمان د فقهي اکاډمۍ غړي عبدالرزاق لقمان، وایي چې د عقل او شریعت د بېلوالي په اړه د طالبانو استدلال له دې امله دی چې دوی له دین سره لوبې کوي. هغه زیاته کړې، څرګنده نهده چې د طالبانو استادان څوک دي او څه ډول کتابونه یې لوستلي.
په کابل کې د قطر سفیر مردف بن علي القاشوطي د طالبانو د لوړو زدهکړو له وزیر سره په کتنه کې ژمنه وکړه، چې افغانستان ته به د قطر او نورو اسلامي هېوادونو د استادانو لېږلو، د کابل طبي علومو پوهنتون د سرطان د تشخیص او درملنې مرکز د تجهیز برخو کې همکاري او مرسته وکړي.
د امریکا پخواني مرستیال ولسمشر مایک پینس ویلي چې په سیمه کې د امریکايي ځواکونو حضور ساتل د ایران پر وړاندې د نورو احتمالي بریدونو لپاره اړین دی او دغه اقدام یې «نهمخنیوی کېدونکی» بللی دی.
د طالبانو د ټولګټو وزارت اعلان کړی چې د دې ډلې د مشر ملا هبتالله اخوندزاده په امر، د اوسپنې پټلۍ معینیت له دغه وزارت څخه جلا او په یوه خپلواکه اداره بدل شوی دی.
په افغانستان کې د ملګرو ملتونو دفتر (یوناما) وايي، د دغه سازمان د سرمنشي ځانګړې سرپرستې استازې او مرستیالې جورجت ګانیون بدخشان ته سفر کړی دی. هغې ویلي، چې د اقتصادي فرصتونو رامنځته کولو او د کوکنارو کرکېلې پرځای د بدیلو لارو لپاره پانګونې ته اړتیا ده.
د ملګرو ملتونو پراختيايي پروګرام ویلي چې د افغانستان یوازې شاوخوا ۴۰ تر ۴۲ سلنه وګړي د برېښنا عمومي شبکې ته لاسرسی لري او داهم ۹۰ سلنه په ښاري سیمو متمرکزه ده. د یاد سازمان په وینا، کلیوالي سیمې لا هم تر ډېره له برېښنايي خدمتونو بې برخې دي.
د هند په ختیځ کې د پاناما بیرغ لرونکې «اوشن وینر» باروړونکې بېړۍ له ډوبېدو وروسته ۲۲ کسان لا هم ورک دي. د هند سمندري ځواکونو د ورکو کسانو د موندلو لپاره د لټون او ژغورنې عملیات پیل کړي او تر اوسه یې دوه چینایي وګړي ژغورلي دي.
د افغانستان ازادۍ جبهې ادعا کړې چې د بدخشان په زیباک ولسوالۍ کې یې له طالبانو سره په تازه نښته کې دې ډلې ته «درنه مرګژوبله» اړولې ده. جبهه ادعا کوي، چې د طالبانو برید د دوی د ځواکونو له مقاومت سره مخ شوی. طالبانو دې ادعا ته تر دې دمه غبرګون نه دی ښودلی.
د ننګرهار یو اوسېدونکي ویلي، چې پلار یې د یکشنبې په سهار د فارم هډې پر عمومي سړک د څلورو وسله والو کسانو له خوا لوټل شوی او شاوخوا ۱۵۰ زره افغانۍ او ۱۰۰ ډالر یې ترې وړي دي. نوموړی وایي، چې وسله وال په کرولا موټر کې له سیمې تښتېدلي دي.
د ایران د بهرنیو چارو وزیر عباس عراقچي وايي، امریکا د ایران له خلکو سره له درناوي او په «عدالت او شرافت» ولاړو خبرو پرته بله لار نه لري. نوموړي د امریکا اقتصادي فشارونه او د پوځي اقدام ګواښونه «تکراري سناریو» بللې او ویلي یې دي چې ایران ترې نه وېرېږي.
د طالبانو د سوداګرۍ وزارت ویلي چې په هند کې د سوداګرۍ او سوداګریزو ناستو په ۴۵م نړۍوال نندارتون کې د افغانستان د تولیداتو او محصولاتو د نندارې په موخه یې د غالیو، وچې مېوې او زعفرانو د تولیدوونکو او صادروونکو اتحادیو له استازو سره ناسته کړې ده.
د افغانستان کرکټ بورډ د اسیا کرکټ شورا د مشرۍ لپاره په وړ بورډونو کې شامل شوی دی. دا پرېکړه په بنکاک کې د اسیا کرکټ شورا په کلنۍ غونډه کې شوې ده. له دې وروسته به د افغانستان کرکټ بورډ په خپل نوبت د دې مهمې شورا د مشرۍ دنده پرغاړه واخلي.
د پاکستان د جمعیت علمای اسلام مشر مولانا فضل الرحمن په پېښور کې د خپل ګوند غونډې ته وویل، چې پاکستان په افغانستان کې د امریکا پخوانۍ تګلاره پر مخ وړي. هغه زیاته کړه چې دغه هېواد د ترهګرۍ ضد جګړې په نوم له امریکا څخه پیسې ترلاسه کوي، خو په خپله خاوره کې یې امنیت نه دی خوندي کړی.