د پاکستان تحریک انصاف ګوند د ملي اسمبلۍ غړی اقبال اپرېدی او زوی یې عرفان اپرېدی تېره شپه په پېښور کې له خپل کوره د مخ پټو وسلهوالو له خوا تښتول شوي دي. د نوموړي خپلوانو ویلي، وسلهوالو د حیاتاباد په سیمه کې د دوی پر کور چاپه وهلې او دواړه یې نامعلوم لوري ته لېږدولي دي.
د طالبانو د حج او اوقافو وزارت له دیني عالمانو غوښتي چې د جمعې په خطبو کې د لویو او کوچنیو ګناهونو په اړه خلکو ته پوهاوی ورکړي؛ خو د ټولنیزو رسنیو یو شمېر کاروونکي ټینګار کوي چې طالبان دې د اصلاحاتو او بدلونونو پیل له خپلو کړنو وکړي.
د ایران ولسمشر مسعود پزشکیان ویلي، د بېلابېلو هېوادونو سره د دوهاړخیزو او څو اړخیزو اقتصادي اړیکو پراخول او د بریکس، شانګهای او اوراسیا په څېر د سیمهییزو او نړیوالو سازمانونو د ظرفیتونو فعالول د ایران د حکومت له ستراتیژیکو پروګرامونو څخه دي.
د افغانستان او پاکستان ترمنځ روانه شخړه، چې د ۲۰۲۶ کال په فبرورۍ کې د پاکستان له لوري د «پرانیستې جګړې» تر اعلان وروسته سخته شوه، لا هم دوام لري. راپورونه ښيي چې دواړه لوري په زیاتېدونکي ډول پر نیابتي وسلهوالو ډلو تکیه کوي او دې وضعیت د شخړې د لا پراخېدو اندېښنې راپارولي دي.
د طالبانو مشر ملا هبتالله اخوندزاده یو ځل بیا خپلو منسوبینو ته د قومي تعصب، ملګرتیاپالنې او شخصي ګټو د پرېښودو سپارښتنه کړې؛ د دغو سپارښتنو تکرار د طالبانو په لیکو کې د یادو ستونزو د دوام په اړه پوښتنې راپورته کوي.
د روغتیا نړیوال سازمان وايي، د هرات ولایت د ګذره ولسوالۍ په روغتون کې د سختې حادې خوارځواکۍ د درملنې ځانګړی مرکز د خوارځواکو ماشومانو د ژوند ژغورلو لپاره مهم خدمات وړاندې کوي او هره میاشت له ۳۰ زیاتو ماشومانو ته درملنه برابروي.
د خیبرپښتونخوا په ډېره اسماعیل خان کې وسلهوالو د انډس پر لویه لار له ۲۰ زیات کسان برمته کړي دي. د پولیسو په وینا، په تښتول شویو کې د بورې د یوې کارخانې کارکوونکي او حکومتي مامورین شامل دي چې د وسلهوالو له لوري نامعلوم لوري ته وړل شوي دي.
د روغتیا نړیوال سازمان خبرداری ورکړی چې سخته ګرمي د امیندوارو ښځو او ماشومانو روغتیا ګواښي او د وخت مخکې زېږون احتمال ۲۶ سلنه زیاتوي. په افغانستان کې هم د یونیسف د راپور له مخې، له ۸،۸ میلیونو ډېر ماشومان له وچکالۍ، سېلابونو او تودوخې څپو په ګډون له څو اقلیمي ګواښونو سره مخ دي.
طالبانو د واخان له لارې له چین سره د افغانستان د نښلولو لپاره نوی سړک پرانیستی، خو چین لا هم خپله پوله د منظمې سوداګرۍ لپاره نه ده پرانیستې. د «ډیپلومات» مجلې د راپور له مخې، طالبان دا لاره د سوداګرۍ د پراختیا وسیله بولي، خو چین پرې تر ډېره د امنیت له نظره تمرکز کوي.
د ایران د سپاه پاسداران سمندري ځواک وايي، ځواکونو یې په شمالي خلیج فارس کې د تېلو لېږدوونکې څلور بېړۍ موندلي او په هممهاله توګه یې په نښه کړې دي. د سپاه په وینا، دغو بېړیو تر دې مخکې په ناقانونه توګه تګ راتګ کاوه.
په افغانستان کې د ملګرو ملتونو د مېشتځایونو ادارې (یو این هبیتات) خبرداری ورکړی چې په ګڼمېشتو غیررسمي مېشتځایونو کې د کثافاتو ناسم مدیریت د خلکو روغتیا او هوساینې ته جدي زیان رسولی شي.
د نیوزیلنډ یوه سیلانۍ مالي چې افغانستان ته د دوو نورو نارینه ملګرو سره تللې په یوه ویډیو کې ویلي، چې د افغانستان ښکلا او د خلکو مېلمه پالنه د ښخو پر حقونو د طالبانو محدودویتونه شي پټولای. هغه وایي هوټل، بانک او ځینو نورو ځایونو ته ځکه اجازه نه راکول کېده، چې «ښځه یمه».
د تایوان سمندري لېږد شرکت وان های لاینز اعلان کړی چې افغانستان، ازبکستان، قزاقستان او د منځنۍ اسیا نورو هېوادونو ته د پاکستان د بندرونو له لارې د بارونو د لېږد نوې غوښتنې نه مني. شرکت ویلي، دا پرېکړه سمدستي نافذه شوې، خو د پای نېټه یې نه ده ټاکل شوې.
د قبایلو د انضمام ضد غورځنګ مشر حاجي بسم الله خان وايي، د خیبر پښتونخوا د ۱۲ ولسوالیو لپاره د سیمهییزې پرمختیايي شورا جوړول د قبایلو د ادغام د بهیر د پای ته رسولو لومړی ګام دی او د کابل او اسلاماباد ترمنځ د اړیکو په ښه کېدو کې هم مرسته کولای شي.
د پاکستان د درملو صادرات په ۲۰۲۵-۲۶ مالي کال کې ۲۶ سلنه کم شوي او له ۴۵۷،۴ میلیونه ډالرو څخه ۳۱۹ میلیونه ډالرو ته راټیټ شوي دي. د دغه هېواد د درملو صنعت وايي، له افغانستان سره د سوداګرۍ ټکني کېدل د دې کمښت یو مهم لامل دی.
په افغانستان کې د تېلو د بیو له لوړېدو سره هممهاله په نیمروز کې طالب مسولین وايي، چې د ورېښمو پله له لارې یې د ایران ۹۷ ټانکره پټرول، ډېزل او مایع ګاز د کیفیت له ارزونې وروسته بازار ته د عرضیې اجازه ورکړې.
د امریکا میلیاردر ایلن مسک ګواښ کړی چې که ډیموکراتان د کانګرس په منځمهاله ټاکنو کې واک ترلاسه کړي او د هغه د ادعا شویو فسادونو او په حکومت کې د رول په اړه پلټنې پیل کړي، دی به هم د دغو پلټنو د طرحه کوونکو پر ضد اقدام وکړي.
د انټرنیشنل پالیسي ډایجسټ د راپور له مخې، د طالبانو ضد وسلهوالو ډلو د ۲۰۲۶ کال په اګست او سپتمبر کې په ۲۶ ولایتونو کې د ۱۱۹ بریدونو ادعا کړې ده. د دوی په وینا، په دغو بریدونو کې ۲۵۶ طالبان وژل شوي او ۲۵۶ نور ټپیان شوي، خو دا شمېرې په خپلواکه توګه نه دي تایید شوې.
د امریکا د نیو لاینز انسټیټیوټ په یوه تازه راپور کې ویل شوي چې په افغانستان کې د طالبانو له بیا واکمنېدو وروسته د ښځو او نجونو پر وړاندې جنسي او جنسیتي تاوتریخوالی دوام لري، خو د وېرې، محدودیتونو او د شکایت د لارو د نشتوالي له امله ډېری پېښې نه ثبتېږي.
د ایران جګړې د انرژۍ نړیوال بازار اغېزمن کړی؛ د تېلو بیه په هر بېرل کې ۱۱۰ ډالرو ته لوړه شوې او په اروپا او اسیا کې د ګازو بیې هم د ۲۰۲۲ کال له ډسمبر راهیسې تر ټولو لوړې کچې ته رسېدلې دي، چې ورسره د کورنیو ورځني لګښتونه هم زیات شوي دي.
الحدث شبکې د چهارشنبې په ورځ (د تلې ۲۹مه) د ډیپلوماټیکو سرچینو له قوله راپور ورکړی، چې د پاکستان د پوځ قومندان عاصم منیر تهران ته د خپل سفر په ترڅ کې د امریکا «شدیداللحن» خبرداری د ایران چارواکو ته رسولی دی.