د افغانستان پخواني مرستیال ولسمشر سرور دانش په سیمه کې د جګړې د پای ته رسولو لپاره د پاکستان د حکومت منځګړیتوب ستاینه کړې ده. سرور دانش د افغانستان د سولې پروسې ته په اشارې سره ویلي، «کاشکې د افغانستان په قضیه کې هم داسې مخلصانه او بېطرفه منځګړیتوب شوی وای».
په کابل کې د طالبانو د امنیې قوماندانۍ ویاند خالد ځدراڼ ویلي، چې د کابل ښار په شپږمه امنیتي حوزه کې پر درېیو نجونو د موټر برید عامل له خپل موټر سره یو ځای نیول شوی او دامهال تر څېړنو لاندې دی.
د طالبانو د بهرنیو چارو وزارت خبر ورکړی، چې په کابل کې به د سېشنبې په ورځ د ستراتیژیکو مطالعاتو مرکز په کوربهتوب د افغانستان، منځنۍ اسیا او اذربایجان د مخکښو څېړنیزو مرکزونو یوه مهمه او په لوړه کچه ناسته ترسره شي.
د ملګرو ملتونو د بشري مرستو د همغږۍ دفتر (اوچا) په تازه راپور کې راغلي، چې په ۲۰۲۶کال کې به په افغانستان کې شاوخوا ۳.۷ مېلیونه ماشومان پر خوارځواکۍ اخته شي او که د ژوند ژغورونکو او مخنیوي وړ تغذیوي پروګرامونو پراختیا ته بېړنۍ پاملرنه ونه شي؛ نو دغه وضعیت به لا کړکېچن شي.
یوه افغانه مېرمن چې مور یې د افغانستان د جګړو پرمهال وژل شوې، د طالبانو له لوري د جهادي اثارو د ساتنې قانون په غبرګون کې افغانستان انټرنشنل پښتو ته ویلي: «دغه قانون د جګړې د قربانیانو پر ټپونو د مالګې شېندلو معنا لري».
د طالبانو روغتیا وزارت وايي، چې په ننګرهار او فراه ولایتونو کې یې د خوراکي توکو د کیفیت، نېټې تېر درملو، بیو او ورته نورو برخو څارنه کړې ده. یاد وزارت زیاته کړې، چې د څار پرمهال یې ۸ درملتونونه او لابراتوارونه د سرغړونې له امله تړلي دي.
د خېبر پښتونخوا مردان کاټلنک سړک ته څېرمه د پاکستان د هوايي ځواک یوه روزنیزه الوتکه نسکوره شوې. د ژغورنې ادارو د معلوماتو له مخې؛ په دغه پېښه کې دوه پیلوټان وژل شوي او دوه ملکي وګړي ټپیان دي.
د طالبانو مخالفې مقاومت جبهې ویلي، چې د هرات ولایت په انجیل ولسوالۍ کې یې د عملیاتو پرمهال دوه طالبان وژلي دي. د یادې جبهې په وینا؛ دغه عملیات د شنبې په شپه (د غبرګولي ۲۳مه) ترسره شوي دي.
په بلخ کې د طالبانو د عامې روغتیا ریاست خبر ورکړی، چې د دغه ولایت په حوزوي روغتون کې یوې مېرمنې په یو ځل پنځه ماشومان زېږولي. بلخ کې د روغتیايي مسوولینو په وینا؛ له دغه پنځو ماشومانو درې یې نجونې او دوه هلکان دي.
په هرات کې د طالبانو د والي ویاند محمدیوسف سعیدي وایي، په دغه ولایت کې د ټاپي پروژې د ګازو لېږد نللیکې د غځولو ۸۴ کیلومتره چارې بشپړې شوې او د یادې پروژې عملي کارونه تر دې مهاله شاوخوا ۶۰ سلنه مخته تللي دي.
په داسې حال کې چې د ډونالډ ټرمپ اداره له ایران سره د «سولې هوکړې» ته د نږدې کېدو خبره کوي، دغه هوکړه په اسراییل کې له سختو نیوکو سره مخ شوې ده. اسراییلي نیوکه کوونکي وایي، چې دغه هوکړه د ایران د حکومت په اړه د دوی مهمې امنیتي اندېښنې له پامه غورځوي.
په غزني کې د طالبانو امنیې قوماندانۍ خبر ورکړی، چې د دغه ولایت د درېیمې امنیتي حوزې اړوند د دښت کیوان په سیمه کې د یوې ناچاوده مرمۍ د چاودنې له امله یو ماشوم مړ او دوه نور ټپیان شوي دي.
د لوګر ولایت د «ابچکان کلي» اوسېدونکو د طالبانو د سترې محکمې پر هغه پرېکړه نیوکې کړې، چې د دوی شخصي زرګونه جریبه ځمکه یې د بل چا په نوم کړې ده. طالبانو ویلي، پر دغه ځمکه تېر حکومت پرېکړه کړې او دوی یې عملي کوي؛ خو خلک بیا وایي ځینو کسانو د پېسو او واسطې په زور پرې اسناد جوړ کړي.
پاکستاني رسنیو راپور ورکړی، چې د دغه هېواد د سند ایالت د چچرو په سیمه کې د پولیسو او استخباراتي ادارو د ګډو عملیاتو په ترڅ کې ۱۵ افغان وګړي نیول شوي دي. ځایي اوسېدونکي وایي، چې ډېری نیول شوي کسان له تېرو شلو کلونو راهیسې په دغه سیمه کې اوسېدل او د فرنیچر په کاروبار بوخت وو.
په هرات او د افغانستان په نورو ولایتونو کې د طالبانو لهخوا د ښځو د نیونې او همدارنګه د هرات په جبرییل سیمه کې د ولسي لاریونونو ځپلو په غبرګون کې د کاناډا په ونکوور ښار کې لسګونه جلاوطنه افغانان واټونو ته راووتل او یوه اعتراضي غونډه یې ترسره کړه.
اسماعیل کاکړ چې د افغانستان د جودو او کورش ملي لوبډلې پخوانی غړی و او څه باندې دوه اوونۍ وړاندې د جرمني په برلېن ښار کې د زړه د حملې له امله مړ شوی و، مړی یې کابل ته انتقال شو.
په هلمند کې د طالبانو د صنعت او کانونو ریاست وایي، چې له دغه ولایت څخه شاوخوا ۸۰ زره مټریک ټنه پنبه بهرنیو هېوادونو ته صادره شوې ده. د یاد ریاست په وینا؛ د هلمند پنبه اوسمهال چین، ترکیې، ایران او ازبکستان ته صادرېږي.
خوست کې د طالبانو امنیې قوماندانۍ خبر ورکړی، چې د دغه ولایت د باک ولسوالۍ مانه کلي په یوه کور کې د چت پرېوتو له امله د یوې کورنۍ څلور غړي مړه او یو اته کلن ماشوم ټپي شوی دی. دغه پېښه د یکشنبې په سهار (د غبرګولي ۲۴مه) شوې ده.
د عوامي نشنل ګوند د خيبرپښتونخوا ايالتي اسمبلۍ غړي نثار باز خان د تحریک انصاف ګوند په ايالتي حکومت نيوکې کړي او پوښتنې یې راولاړې کړي چې ولس ته دې وويل شي، چې د ايالت د پرمختيايي بوديجې څخه ۱۰۹ ميليارده کلدارې ولې مرکز ته ورکړل شوي دي؟.
د افغانستان د علماوو د څېړنیزې ټولنې مرستیال طارق عثمان د حجاب په اړه پر دودیزو تعبیرونو نیوکه کړې او ویلي یې دي چې ځینې ملايان حجاب له «ستر عورت» سره ګډوي، حال دا چې د ده په وینا ستر عورت تر ډېره یوه اخلاقي موضوع ده، نه د زور له لارې د پلي کېدو وړ شرعي حکم.
د امریکا ولسمشر ډونالډ ټرمپ ادعا کړې، چې د ایران اسلامي جمهوریت سره د امریکا هوکړه نهايي شوې ده. ټرمپ په یوه پیغام کې ویلي: «ټولو ته مبارکي وایم. له ایران اسلامي جمهوریت سره هوکړه اوس نهايي شوې ده.»