اروپايي هوايي امنیت ادارې (EASA) خبرداری ورکړی چې د منځني ختیځ پراخېدونکې جګړې او په هوا کې د ډرونونو زیاتېدونکي استعمال د نړیوالو الوتنو په خوندیتوب جدي اغېزې کړي دي.
ملګرو ملتونو په یوه راپور کې د افغانستان په اړه یادونه کړې چې په دغه هېواد کې لا هم د بشري حقونو کړکېچ دوام لري. دوی د طالبانو له خوا د نجونو او ښځو پر وړاندې پراخو بندیزونو ته اشاره کړې.
د امریکا د تابعیت او کډوالۍ خدماتو ادارې د دوشنبې په ورځ وویل چې د ټرمپ اداره به د ځینو پناه غوښتونکو د قضیو پروسس بیا پیل کړي. په امریکا کې د یو کډوال له خوا د ملي ګارډ پر دوو غړو د برید وروسته دغه غوښتنې درولې وې.
د بلوچستان په مستونګ او جهل مګسي ولسوالیو کې د وسلهوالو په جلا جلا بریدونو کې لږ تر لږه درې امنیتي سرتېري وژل شوي او اووه نور ټپیان دي، چې ورسره د سیمې امنیتي وضعیت لا ترینګلی شوی دی.
طالبانو په کابل پوهنتون کې د ژمنپاڼو په وېشلو سره له محصلانو غوښتي، چې د دغې ډلې لارښوونو ته ژمن پاتې شي. په دې ژمنپاڼو کې له محصلانو غوښتل شوي، چې د ږیرې پرېښودلو، د خولۍ پر سر کولو، په لمانځه کې د ګډون، د موسیقۍ نه اورېدلو او د طالبانو له اصولو سره د سم چلند ژمنه وکړي.
د اسلامي مرستو سازمان خبرداری ورکړ، چې د طالبانو او پاکستان ترمنځ د نښتو له امله د افغانستان په ختیځ کې زرګونه کورنۍ د خپلو کورونو پرېښودو ته اړ شوې او خوړو او سرپناه ته بېړنۍ اړتیا لري. دغه خیریه بنسټ د کړکېچ د کمولو او د دواړو لوریو ترمنځ د اوربند د غځولو غوښتنه کړې ده.
اسوشېټېډ پرېس د امریکایي، اسراییلي او د فارس خلیج د هېوادونو د چارواکو له قوله راپور ورکړی چې د سعودي عربستان او متحده عربي اماراتو په مشرۍ د واشنګټن متحدانو له ټرمپ څخه غوښتي، چې له ایران سره جګړه تر بشپړې ماتې پورې روانه وساتي.
پاکستاني چارواکو اعلان کړی، چې د دغه هېواد په سوېل کې د طبیعي ګازو یوه مهمه نللیکه دوشنبه (د وري ۱۰مه) وچاودېده، چې له امله یې په څو سیمو کې د ګازو لېږد پرې شوی دی. د ګازو د دولتي شرکت ویاند ویلي، چې دغه چاودنه د کوټې ښار په څنډو کې شوې ده.
په اسلاماباد کې د مصر، سعودي عربستان او ترکیې د بهرنیو چارو وزیرانو له سفر وروسته یوه لوړپوړي پاکستاني چارواکي الجزیرې ټلوېزیون ته ویلي، چې پاکستان د امریکا او ایران له جګپوړو چارواکو سره په مشورو بوخت دی او د دواړو خواوو ترمنځ د مذاکراتو پیلېدو ته هیلهمندي شته.
د فارس خبري اژانس د دوشنبې په ورځ په خپله اېکسپاڼه کې لیکلي، چې د ایران د اسلامي شورا مجلس د ملي امنیت کمېسیون د هرمز تنګي د مدیریت طرحه تصویب کړې ده.
د امریکا د کانګرس غړي رنډي فاین خبرداری ورکړی، چې طالبان خپله واکمني لا پسې ټینګوي او داسې نوي قوانین وضع کوي چې خلک تر بل هر وخت ډېر تر فشار لاندې راولي. هغه ټینګار کړی، چې دغه ډله باید په هېڅ صورت په رسمیت ونهپېژندل شي.
د ایران د بهرنیو چارو وزیر د سېشنبې په سهار په خپل اېکس کې د متحده ایالاتو د یوې (E-3) الوتکې انځور خپور کړ، چې د سعودي عربستان په پرنس سلطان اډه کې د بالسټیک توغندیو په واسطه ویشتل شوې وه. هغه سعودي عربستان ته په خطاب کې لیکلي: «د دې وخت رارسېدلی چې امریکایي ځواکونه وباسو».
د مرکزي اسیا د فوټبال اتحادیې د ۱۷ کلنو ځوانانو د فوټبال اتلولۍ (کافا ۲۰۲۶) سیالیو مهالوېش او وختونه اعلان کړل. د دې پروګرام پر بنسټ، د افغانستان د ۱۷ کلنو ځوانانو د فوټبال ملي لوبډله به خپله لومړۍ لوبه د دوشنبې په ورځ (د وري ۱۷مه) پیل کړي او د اتلولۍ ګټلو لپاره به سیالي وکړي.
د اتو اسلامي او عربي هېوادونو د بهرنیو چارو وزیرانو په یوه ګډه اعلامیه کې د اسراییل هغه وروستي اقدامات وغندل، چې په بیتالمقدس ښار کې یې د عبادت ازادي محدوده کړې ده.
سپینې ماڼۍ اعلان کړی، چې په هرمز تنګي کې د تېل وړونکو بېړیو د تېرېدو اوسنی بهیر د واشنګټن او تهران ترمنځ د مستقیمو او غېر مستقیمو مذاکراتو پایله ده او امریکا په دغه لاره کې پر بېړیو د هر ډول محصول له لګولو سره مخالفه ده».
د خېبر پښتونخوا د طبیعي پېښو د مخنیوي ادارې (پيډياېماې) ویلي، چې له تېرې اوونۍ راهیسې د دې ایالت په بېلابېلو ولسوالیو کې د پرلهپسې بارانونو له کبله په سېلابونو او نورو پېښو کې ۱۸ کسان مړه او ۷۲ نور ټپیان شوي دي.
په قطر کې د پاکستان سفارت په یوې اعلامیه کې ویلي، چې د روانو حالاتو له امله د پاکستاني وګړو لپاره له رسېدو وروسته د ویزې اسانتیا لغوه شوې ده. تر دې وړاندې به پاکستاني وګړو ته په هوايي ډګر کې له رسېدو سره سم د قطر ویزې ورکول کېدې.
د ترکیې پولیسو د دوشنبې په ورځ اعلان وکړ، چې د شرناک ښار په انداچ کلي کې یې د یو لړ عملیاتو پر مهال ۲۴ افغان کډوال چې په ناقانونه توګه هلته مېشت وو، نیولي دي. پولیسو همداراز درې تنه د دغو کډوالو د قاچاق او لېږد په تور نیولي او عدلي ارګانونو ته یې سپارلي دي.
د بلوچستان په هرنایي ولسوالۍ کې ځايي پولیس وايي، د سکرو په یوه کان کې د یوې لویې ټوټې د راپرېوتو له امله یو افغان کانکېندونکی مړ شوی دی. د پولیسو په وینا، له دې سره تېره اوونۍ په بلوچستان کې د سکرو په کانونو کې د بېلابېلو پېښو له امله د مړو شویو افغانانو شمېر درېیو ته ورسېد.
افغانستان انټرنشنل-پښتو ته په چمن کې یو شمېر پرلتوالو ویلي، چې پولیسو پر دوی د "کرکې خپرولو" په تور دوسیه ثبت کړې ده. د دوی په وینا، په دغه دوسیه کې پولیسو ادعا کړې چې د پرلت پر مهال د پاکستان او افغانستان د جګړو په تړاو څرګندونې کرکه پاروونکې وې.
د مارچ پر اتلسمه پاکستان او افغانستان د وړوکي اختر په تړاو موقتي اوربند اعلان کړ. که څه هم دا اوربند د پاکستان هوايي بمباریو درولو پورې محدود و، په ډېرو ځایونو کې ځمکنۍ جګړې روانې وې. کونړ او نورستان کې پاکستان د خپلو مرموزو اهدافو لپاره د سیمو نیولو په موخه جګړو ته ادامه ورکړې.