د طالبانو د کډوالو او بېرته راستنېدونکو چارو وزارت وايي، په روانه اونۍ کې ۳۲۵ افغان کډوال چې په پاکستان کې بندیان وو، ازاد او خپل هېواد ته ستانه شوي دي. یاد وزارت ویلي، چې دغه کسان د ننګرهار او کندهار له لارو ستانه شوي او خپلو مېنو ته لېږدول شوي دي.
د خیبر پښتونخوا په لنډي کوتل سیمه کې د تورخم او د افغانستان او پاکستان ترمنځ د نورو لارو تړل پاتې کېدو پرضد د سوداګرو، ټرانسپورټرانو، کارګرو او سیاسي ګوندونو غړو احتجاج کړی او له حکومت یې غوښتي، چې یادې سوداګريزې لارې پرانیزي او د خلکو د تګراتګ لړۍ دې هم ژر تر ژره بېرته پیل کړي.
د افغان ښځو د ازادۍ غورځنګ ویلي، که څه هم طالبانو په تېرو پنځو کلونو کې افغان ښځې له خپلو بنسټیزو حقونو بېبرخې کړې؛ خو د ازادۍ، عدالت او انساني کرامت لپاره د هغوی مبارزه لاهم روانه ده.
پنځه کاله وړاندې د ۱۴۰۰کال (د زمري په ۱۵مه) د افغانستان د ولایتونو د سقوط هغه چټکه لړۍ پیل شوه، چې یوازې لس ورځې وروسته یې د کابل تر سقوط او د جمهوري نظام تر پای ته رسېدو پورې دوام وکړ. پنځه کاله وړاندې په همدې ورځ د مرکزونو د نیولو لړۍ د نیمروز له مرکز زرنج ښار پیل شوه.
د پاکستان تحریک انصاف ګوند د خپل بنسټګر عمران خان د بند درېیمه کلیزه د دغه هېواد په بېلابېلو ښارونو کې د احتجاجونو او غونډو په ترسره کولو ونمانځله.
د برېتانیا خیریه بنسټ کافوډ ویلي، برېتانیا باید هغه افغان محصلینو ته د تحصیلي ویزو د ورکړې لړۍ بېرته پیل کړي چې د طالبانو له لوري له لوړو زدهکړو بېبرخې شوې دي.
د طالبانو له واکمنېدو او د ښځو پر ورزشي فعالیتونو تر بندیز وروسته، د افغانستان د ښځینهو فوټبال پخوانۍ ملي لوبډله له پنځو کلونو جلاوطنۍ وروسته د لومړي ځل لپاره په نیوزیلنډ کې سره راټوله شوې او دوه دوستانه سیالۍ یې ترسره کړې دي.
د امریکا ولسمشر ډونالډ ټرمپ ویلي، غوره ګڼي له ایران سره هوکړې ته ورسېږي؛ ځکه نه غواړي خلک ووژل شي. هغه ټینګار کړی، چې ایران باید اټومي وسلې ترلاسه نهکړي. ټرمپ زیاته کړې، چې امریکا د «دویمې نړۍوالې جګړې راهیسې د تر ټولو ستر برید» لپاره چمتو شوې وه.
په ملګرو ملتونو کې د پاکستان دایمي استازي عاصم افتخار احمد د امنیت شورا په غونډه کې ویلي، چې په افغانستان کې لاهم ګڼې وسلهوالې ډلې خوندي پټنځایونه لري او فعالیتونه یې د سیمې امنیت ګواښي.
د کډوالۍ نړۍوال سازمان ویلي، چې په تېرو دوو اونیو کې تر ۱۰۰زره ډېر افغانان له ایران او پاکستان نه افغانستان ته ستانه شوي دي. د دغه سازمان په وینا؛ په تېرو دوو اونیو کې له دې ډلې ۵۵زره او ۶۳۱ کسان له پاکستان نه او ۴۴زره او ۷۳۷ کسان له ایران نه افغانستان ته ستانه شوي دي.
د ملګرو ملتونو د سرمنشي مرستیال ویاند فرحان حق ویلي، چې اوسمهال د غړو هېوادونو ترمنځ د طالبانو د رسمیت پېژندلو کومه هڅه نه تر سترګو کېږي. هغه وایي، د رسمیت پېژندلو په اړه پرېکړې د حکومتونو لهخوا کېږي.
د طالبانو کابل ښاروالۍ د نرخونو د کنټرول او له احتکاره د مخنیوي کمېسیون د تېل او ګازو د نرخپاڼې په تعدیل سره تېل او ګازو ته نوې بیې وټاکلې. د دغه تعدیل پر بنسټ، د یو لیټر پټرول۹۲ بیه ۸۰ افغانۍ او د یو لیټر ډيزل بیه ۷۵ افغانۍ او د یوه کیلو ګاز بیه ۶۷ افغانۍ ټاکل شوې ده.
د سيبياېس خبري شبکې د باخبرو سرچینو له قوله راپور ورکړی، چې د امریکا په لږ تر لږه ۱۲ ایالتونو کې د اوبو پر سیستمونو سایبري بریدونه پیژندل شوي. چارواکي اټکل کوي، چې دا بریدونه د ایران اړوند هکرانو پورې تړاو لري.
د اوکراین د نظامي استخباراتو سازمان یوه چارواکي رویټرز ته ویلي، د شمالي کوریا د توغندیو یوه قطعه لوېدیځې روسیې ته لېږدول شوې او کېدای شي د اوکراین پر ضد د بریدونو لپاره وکارول شي.
د طالبانو مخالفې ډلې، ازادۍ جبهې د چهارشنبې په ورځ ادعا کړې چې ځواکونو یې د کندز هوايي ډګر په راکټونو ویشتی دی. دغې جبهې تر اوسه د برید د دقیق وخت، د اوښتو زیانونو او یا هم د احتمالي مرګژوبلې په اړه جزییات نه دي خپاره کړي.
د جرمني له لایپزیګ هوايي ډګر څخه کابل ته د ۳۱ افغانانو ایستل، په ځانګړې توګه د هغو کسانو په ډله کې د یوه داسې افغان شتون چې جنايي محکومیت یې نه درلود، په جرمني کې د افغان کډوالو د ایستلو د تګلارې په اړه بحثونه نوي پړاو ته داخل کړي دي.
د هند د بهرنیو چارو وزارت د پاکستان د پوځ د ویاند وروستیو څرګندونو ته غبرګون ښودلی او ویلي یې دي چې د طالبانو او هند د اړیکو په اړه د اسلاماباد اندېښنې د دواړو لوریو د مثبتو دوهاړخیزو اړیکو له پراختیا څخه د پاکستان د ژورې وېرې څرګندونه کوي.
العربیه ټلوېزیون د چهارشنبې په ماښام د لبناني سرچینو له قوله راپور ورکړی، چې د اسراییل له لوري د پوځي کړکېچ زیاتېدو د دواړو هېوادونو د خبرو بهیر له ګواښ سره مخ کړی او د لبنان او اسراییل ترمنځ ټاکل شوې تخنیکي غونډې ځنډېدلې دي.
باوري سرچینو افغانستان انټرنشنل ته تایید کړې چې په بدخشان ولایت کې سیمهییز خبریال ناظم قاسمي د چهارشنبې په شپه د طالبانو د استخباراتو له خوا نیول شوی دی. د هغه یو خپلوان وايي، د نوموړي د نیول کېدو لامل په فېسبوک کې د یوې انتقادي لیکنې خپرول وه.
د ایران ولسمشر مسعود پزشکیان د دغه هېواد له دولتي ټلوېزیون سره په مرکه کې ویلي، چې د اسلامي جمهوریت له مشر مجتبی خامنهيي سره اړیکه په اوسنیو شرایطو کې «ډېره سخته» ده. نوموړي د دې ستونزې د لامل په اړه نور جزییات ورنه کړل.
د افغانستان د بشري حقونو څار بنسټ یو ځل بیا پر طالبانو غږ کړی چې په افغانستان کې دې د شپږم ټولګي څخه پورته د نجونو پر مخ د ښوونځیو دروازې بېرته پرانیزي او د نجونو د زدهکړو روان بندیز دې پای ته ورسوي.